ၶွမ်ႊမတီႊ ၾၢႆႇၸတ်းပၢင်ပွႆးၶၢဝ်းၵတ်း ငၢၼ်းရိုဝ်ႉၻူႊၼၢဝ် ဝဵင်းၵဵင်းမႆႇ ပိုၼ်ၽၢဝ်ႇတေၸတ်းပွႆးၶၢဝ်းၵတ်းငၢၼ်းရိုဝ်ႉၻူႊၼၢဝ် တီႈဝဵင်းၵဵင်းမႆႇ ၸွမ်းၼင်ႇယၢမ်ႈၸတ်းမႃးၵူႈပီ၊ ႁႅင်းငၢၼ်းတၢင်ႇၻၢဝ်ႉ(ႁႅင်းၵၢၼ်ယၢၼ်မိူင်း) ၸိူဝ်းတေၶဝ်ႈပွႆး တၵ်းလႆႈမီးဝႂ်ႁပ်ႉႁွင်းတီႈပေႃႈလဵင်ႉလႄႈ ဝႂ်ႁပ်ႉႁွင်းပၢႆးယူႇလီ ဝႃႈၼႆ။

ဝၼ်းတီႈ 25/12/2020 ၾၢႆႇၽွင်းငမ်းလႄႈၾၢႆႇႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ဝဵင်းၵဵင်းမႆႇ ၸိုင်ႈထႆး ဢွၵ်ႇလိၵ်ႈပိုၼ်ၽၢဝ်ႇဝႃႈတေၸတ်းပွႆးၶၢဝ်းၵတ်း (ပွႆးၶၢႆၶူဝ်းၵုၼ်ႇဢွၵ်ႇၼႂ်းပိုၼ်ႉတီႈ OTOP) ၼႂ်းဝၼ်းတီႈ 30/12/2020 တေႃႇထိုင်ဝၼ်းတီႈ 10/1/2021 ၼႆလႄႈမီးၶေႃႈမၢႆမီႈ ဢွၵ် ႇ8 ၶေႃႈ။

ႁႂ်ႈပဵၼ်ပိုၼ်ႉတီႈၵႂၢင်ႈ တႃႇႁႄႉၵင်ႈတၢင်းပဵၼ်ၶူဝ်ႊဝိတ်ႉ ၊ ႁႂ်ႈၸဝ်ႈၼႃႈတီႈ ပႂ်ႉၵူတ်ႇထတ်းတၢင်းပဵၼ်ၶူဝ်ႊဝိတ်ႉတီႈၽၵ်းတူၶဝ်ႈပွႆး၊ ႁႂ်ႈယူႇႁၢင်ႇယၢၼ်ၵၼ် ၸဵမ်ၸိူဝ်းၼႆႉသေဢမ်ႇၵႃး ၵူၼ်းၸိူဝ်းလုၵ်ႉတီႈဝဵင်းဢၼ်မီး ၵူၼ်းၸပ်းတၢင်းပဵၼ်ၶူဝ်ႊဝိတ်ႉ-19 ၼၼ်ႉသေ ပွၵ်ႈမႃးၶိုၼ်း၊ ၵူၼ်းၸိူဝ်းလုၵ်ႉမိူင်း သမုတ်ႇသႃၶွၼ်ႊ (တီႈဢၼ်မီးတၢင်းပဵၼ်ၶူဝ်ႊဝိတ်ႉ-19 ၽႄႈလၢမ်းႁၢဝ်ႈႁႅင်း) မႃးၸိူဝ်းၼႆႉ ႁၢမ်ႈၶဝ်ႈပွႆး ။

ၼႂ်းၶေႃႈပိုၼ်ၽၢဝ်ႇၶေႃႈတီႈ 7 ၼၼ်ႉ တႅမ်ႈဝႆႉတႃႇႁႅင်းၵၢၼ်ယၢၼ်မိူင်းဝႃႈ – ပေႃးပဵၼ်ႁႅင်းၵၢၼ်ယၢၼ်မိူင်းတေမႃးၶဝ်ႈပွႆးၸိုင် တေလႆႈဢဝ်ဝႂ်ႁပ်ႉႁွင်းတီႈပေႃႈလဵင်ႉမႃးလွင်ႈဝႃႈ ၼႂ်း ၶၢဝ်းတၢင်း 15 ဝၼ်းပူၼ်ႉမႃး ဢမ်ႇလႆႈဢွၵ်ႇတၢင်းၵႂႃႇတၢင်ႇၸႄႈတွၼ်ႈလႄႈတၢင်ႇၸႄႈဝဵင်း၊ ပေႃးပဵၼ်ႁႅင်းၵၢၼ် ၸိူဝ်းဢမ်ႇမီးပေႃႈလဵင်ႉသမ်ႉတေလႆႈၵႂႃႇၵူတ်ႇထတ်းတၢင်းပဵၼ် ၶူဝ်ႊဝိတ်ႉ 19 တီႈႁူင်းယႃ သူၼ်ၻွၵ်ႇ၊ ႁူင်းယႃ သၼ်သၢႆး၊ ႁူင်းယႃႁၢင်ၻူင်ႊ လႄႈႁူင်းယႃသႃရၽီး ၸိူဝ်းၼႆႉ
သေဢဝ်ဝႂ်ႁပ်ႉႁွင်းလွင်ႈဝႃႈဢမ်ႇမီးတၢင်းပဵၼ်ၶူဝ်ႊဝိတ်ႉ ၼၼ်ႉမႃးၼေတီႈၸဝ်ႈၼႃႈတီႈ ၽၵ်းတူၶဝ်ႈပွႆးၼၼ်ႉ ၸင်ႇတေပၼ်ၶဝ်ႈဢႅဝ်ႇပွႆး -ၸဵမ်ၸိူဝ်းၼႆႉ။

ပၢင်ပွႆးၶၢဝ်းၵတ်း ၼႆႉၸတ်းႁဵတ်းတီႈၵဵင်းမႆႇ ၵူႈပီ ၊ ႁႅင်းၵၢၼ်ယၢၼ်မိူင်း ၶဝ်ႈႁူမ်ႈဢႅဝ်ႇယဵမ်ႈသိုဝ်ႉၶူဝ်းၼမ်သုတ်း ၵူႈပီ။

တီႈဝဵင်းၵဵင်းမႆႇ ၸိုင်ႈထႆးၼႆႉ ႁႅင်းၵၢၼ်ယၢၼ်မိူင်း ၵူၼ်းမိူင်းတႆး ၶဝ်ႈႁဵတ်းၵၢၼ်ယူႇသဝ်းၼမ် ။ ၵူၺ်းၵႃႈတေႃႇထိုင်ဝၼ်းမိူဝ်ႈၼႆႉ ပႆႇမီးႁႅင်းၵၢၼ်တႆး ဢၼ်တိတ်းၸပ်းၶူဝ်ႊဝိတ်ႉ-19 သေၵေႃႉလႄႈ ႁႅင်းၵၢၼ်ၵေႃႈတိုၵ်ႉယူႇသဝ်းႁဵတ်းၵၢၼ်လႆႈလွတ်ႈလႅဝ်းထၢင်ႇႁၢင်ႈယူႇ။