သိုၵ်း TNLA တင်း RCSS ပဵၼ်ပၢင်တိုၵ်းၵၼ် တီႈႁိမ်းဝၢၼ်ႈၼမ်ႉပၢႆႇ ၸႄႈဝဵင်းၼမ်ႉတူႈသေ မၢၵ်ႇလူင်တူၵ်းသႂ်ႇ ၸၢၵ်ႇမၢၵ်ႇတိူဝ်ႉ ၵူၼ်းဝၢၼ်ႈ လႆႈမၢတ်ႇၸဵပ်းႁၢဝ်ႈႁႅင်း 4 ၵေႃႉ ၼႂ်းၼၼ်ႉ ပႃးမႄႈပုမ်လူင်(ၵူၼ်းမၢၼ်း) ၵေႃႉၼိုင်ႈ ဝႃႈၼႆ။
ဝၼ်းတီႈ 10/12/2020 ယၢမ်းႁူဝ်ၶမ်ႈမွၵ်ႈ 5 မူင်းပၢႆၼႆႉ သိုၵ်း TNLA တင်း သိုၵ်း RCSS ပဵၼ်ပၢင်တိုၵ်းၵၼ် ႁိမ်းဝၢၼ်ႈ ၼမ်ႉပၢႆႇ ဢိူင်ႇၼမ်ႉတွင်ႇၵူင်း ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ မၢၵ်ႇလူင်တူၵ်းသႂ်ႇ ၵူၼ်းဝၢၼ်ႈ ၽွင်းတိုၵ်ႉလူၺ်ႇၶဝ်ႈၵၢပ်ႇယူႇ ။
လုင်းပႃႉၺၢၼ်ႇ ၵႅမ်ၶွမ်ႊမတီႊၸွႆႈထႅမ်ၵူၼ်းပၢႆႈၽေးသိုၵ်း တီႈၼမ်ႉတူႈ လၢတ်ႈဝႃႈ – “ၸႂ်ႈၶႃႈဢေႃႈ မိူဝ်ႈဝႃးၼႆႉ မၢၵ်ႇတူၵ်း သႂ်ႇ ၵူၼ်းဝၢၼ်ႈ လႆႈမၢတ်ႇၸဵပ်း 4 ၵေႃႉ။ ၼႂ်းၼၼ်ႉ ပႃးမႄႈပုမ်ယႂ်ႇ ၵေႃႉၼိုင်ႈ တိူဝ်ႉၺႃးၸၢၵ်ႇမၢၵ်ႇတီႈၾၢႆႇၶႂႃႁူဝ်မႃႇမၼ်း ၼၢင်းၶႃႈဢိူဝ်ႈ။ ယၢမ်းလဵဝ် ၵူၼ်းမၢတ်ႇၸဵပ်း တင်း 4 ၵေႃႉၼၼ်ႉတႄႉ လႆႈတေႃႉသူင်ႇယူတ်းယႃတူဝ်တီႈႁူင်းယႃ ၼမ်ႉတူႈ ဝႆႉယဝ်ႉ”- ဝႃႈၼႆ။
မၢၵ်ႇဢၼ်တူၵ်းတႅၵ်ႇသႂ်ႇၵူၼ်းမိူင်းၼၼ်ႉ ပဵၼ်မၢၵ်ႇၸုမ်းလႂ် ၽႂ်ယိုဝ်းသႂ်ႇဢၼ်ဝႃႈ ပႆႇလႆႈႁူႉ ၼႆယဝ်ႉ။
ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈဝႃႈ – “ၵူၼ်းဝၢၼ်ႈ တႃႇ 3 ၵေႃႉ တိုၵ်ႉယူႇၼႂ်းသိုင်ႇၾႆးလႄႈ မၢၵ်ႇမႃး တူၵ်းႁိမ်းသိုင်ႇၾႆးၸၢၵ်ႇမၢၵ်ႇၽူင်ႉသႂ်ႇလႄႈ မၢတ်ႇၸဵပ်းၶႃႈဢေႃႈ။ TNLA ၶဝ်ယိုဝ်းၶဝ်ႈၼႂ်းဝၢၼ်ႈ ၵူၼ်း RCSS ဢမ်ႇမီးၼႂ်း ဝၢၼ်ႈၶႃႈ။ ၶဝ်တင်ႈၸႂ်ယိုဝ်းသႂ်ႇၼႂ်းဝၢၼ်ႈၼႆၼၼ်ႉ ႁၼ်ၸႅင်ႈလႅင်းၶႃႈယဝ်ႉ”- ဝႃႈၼႆ။
ၼွၵ်ႈလိူဝ်ၼၼ်ႉ တီႈႁွင်ႈၵၢၼ် ပိုၼ်ၽၢဝ်ႇ TNLA ဢွၵ်ႇဝႆႉတႄႉ ယွၼ်ႉသိုၵ်း RCSS ပူၼ်ႉပႅၼ်ၶဝ်ႈၼႂ်းပိုၼ်ႉတီႈလႄႈ သွင် ၾၢႆႇၸင်ႇလႆႈပဵၼ်ပၢင်တိုၵ်းၵၼ် ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ လႆႈၶတ်းၸႂ်တွင်ႈထၢမ် ၽူႈၶၢၼ်ပၢၵ်ႇ TNLA လၢႆလၢႆၵမ်းၵေႃႈ ပႆႇႁပ်ႉၾူၼ်း။
ၵူၼ်းမိူင်း 4 ၵေႃႉ ဢၼ်ၺႃးၸၢၵ်ႇမၢၵ်ႇၸွမ်းၼႂ်းပၢင်တိုၵ်းၼၼ်ႉပဵၼ် ၸၢႆးဢွင်ႇလႃႉ (ႁွင်ႉ) ၸၢႆးလႅင်၊ ၼၢင်းမူၼ်း၊ ပႃႈၼၢင်းပီး လႄႈ ပႃႈၼၢင်းၼူႉ ။
ယၢမ်းလဵဝ် ၵူၼ်းဝၢၼ်ႈၼမ်ႉပၢႆႇ ဢွၼ်ၵၼ်ပၢႆႈၽေးသိုၵ်းမႃးသွၼ်ႈဝႆႉတီႈဝတ်ႉ/ၵျွင်းႁွင်ႇမၢၼ်ႇၸၢမ်ႇ။ တီႈၵျွင်းႁွင်ႇမၢၼ်ႈ ၸၢမ်ၼၼ်ႉ ပႃးၵူၼ်းပၢႆႈၽေးၵဝ်ႇ/ မႂ်ႇ ႁူမ်ႈၵၼ် တင်းမူတ်း တေမီးႁူဝ်ၵူၼ်းမွၵ်ႈ 250 ၵေႃႉၼႆႉ။ တီႈဝၢၼ်ႈပၢင်ၶႅမ်ၼၼ်ႉ တႄႉ ၶိုၼ်းဢွၼ်ၵၼ်ပွၵ်ႈမိူဝ်းႁိူၼ်းယေးၵၼ်ယဝ်ႉ ဝႃႈၼႆ။
