မိူဝ်ႈၼႆႉ ပဵၼ်လိူၼ်ၻီႊသႅမ်ႊပိူဝ်ႊ ဝၼ်းတီႈ 10 ၊ ပေႃးထႅင်ႈ 6 ဝၼ်းၼႆ တေပဵၼ်ပီမႂ်ႇတႆးၶႃႈယဝ်ႉ၊ ပေႃးထႅင်ႈ 21 ဝၼ်းၼႆၵေႃႈ တေပဵၼ်ပီမႂ်ႇလုမ်ႈၾႃႉၶႃႈယဝ်ႉ။ ပေႃးပဵၼ်မႃးယဝ်ႉၼႆၵေႃႈ ပီၼႆႉၼႆႉ မၼ်းဢမ်ႇမိူၼ်ၵူႈပီ၊ ၵူႈပီၼႆႉ မႃးထိုင်ပီမႂ်ႇၼႆၵေႃႈ ႁဝ်းၶႃႈၵေႃႈႁဵတ်းပွႆးယႂ်ႇပွႆးလူင်၊ ႁဵတ်းတၢင်းၵႃႈ တၢင်းၵျေႃႇတၢင်းမူၼ်ႈ တၢင်းသိူဝ်းၵူႈသမ်ႇၵူႈပိူင်။ ၵူၺ်းၵႃႈ ပီၼႆႉတႄႉ ႁဝ်းၶႃႈဢမ်ႇမိူၼ်ၵူႈပီယဝ်ႉ။

ဢိင်ၼိူဝ်ၵႃႇလ ႁႃႈလူင်ၶူဝ်ႊဝိတ်ႉ 19 ၼႆႉ မၼ်းၶဝ်ႈမႃးၼၼ်ႉလႄႈ ယႃႇဝႃႈႁဝ်းၶႃႈ တင်းလုမ်ႈၾႃႉၵေႃႈ ဢမ်ႇၸၢင်ႈႁဵတ်းပွႆႇယႂ်ႇပွႆးလူင်၊ ဢမ်ႇၸၢင်ႈၵႂႃႇၵျေႃႇၵႂႃႇမူၼ်ႈ မၼ်းပဵၼ်ဝႆႉၸိူင်ႉၼႆ။

ပေႃးဝႃႈ ႁဝ်းၶႃႈသမ်ႉဢမ်ႇမေႃယိူၼ်ႉၵၼ်ႈသေလႄႈ ဢဝ်ၵႂႃႇၵျေႃႇၵႂႃႇမူၼ်ႈၼႆၸိုင် ရေႃးၵႃႇႁႃႈလူင်ၼႆႉ ႁဝ်းတေဢမ်ႇၵုမ်းလႆႈၵူၺ်းဢမ်ႇၵႃး မၼ်းတေၽႄႈတိူၼ်းၵႂႃႇထႅင်ႈ တေလူႉသုမ်းၵႂႃႇထႅင်ႈတင်းၼမ်။

ယွၼ်ႉပိူဝ်ႈၼၼ်လႄႈ ၶႂ်ႈတိုၵ်းသူၼ်းၵူၼ်းၶိူဝ်းတႆးႁဝ်းၶႃႈ ၵူၼ်းမိူင်းတႆးႁဝ်းၶႃႈ ပီၼႆႉၼႆႉ ႁႂ်ႈလႆႈယိူၼ်ႉၵၼ်ႈဝႆႉသေလႄႈ ႁဵတ်းတၢင်းလူႇတၢင်းတၢၼ်းမိူၼ်ၵူႈပွၵ်ႈ ႁဵတ်းတီႈႁိူၼ်းၽႂ်ႁိူၼ်းမၼ်း၊ ၵူၺ်းၵႃႈ ႁႂ်ႈပေႃးၶိုၼ်ႈၵျွင်းလွင်းမွၵ်ႇသေ ႁဵတ်းပွႆးယႂ်ႇလၢမ်းလူင်တႄႉ မၼ်းတေဢမ်ႇပဵၼ်ၶႃႈယဝ်ႉ၊ ပေႃးပဵၼ်ၼႆၵေႃႈ မၼ်းတေတုမ်ႉတိူဝ်ႉၼိူဝ်ႁဝ်းၶႃႈၶိုၼ်း။

ယွၼ်ႉပိူဝ်ႈၼၼ်လႄႈ ဢမ်ႇၸႂ်ႈလႄႈဝႃႈ ႁဝ်းဢမ်ႇလႆႈၵႂႃႇႁဵတ်းတႃႇၼတီႈဝတ်ႉတီႈၵျွင်း ၵူၼ်းတင်းၼမ် ၵူၼ်းၼပ်ႉပဵၼ်ပၢၵ်ႇပဵၼ်ႁဵင်သေ တေဢမ်ႇလႆႈၵုသူလ်ႇၼႃးမုၼ်ဢမ်ႇၸႂ်ႈ၊ ႁဝ်းၶႃႈယူႇႁိူၼ်းသေ ႁဵတ်းၵၢၼ် တႃႇၼ သီႇလ ၽႃႇဝၼႃႇၼႆၵေႃႈ မၼ်းၵေႃႈယင်းလႆႈၵုသူလ်ႇယူႇၶႃႈ။

ၵွပ်ႈပိူဝ်ႈၸိူင်ႉၼၼ်လႄႈ ၵဵဝ်ႇၵပ်းလူၺ်ႈလွင်ႈၼႆႉ ယႃႇပေႁႂ်ႈလႆႈၸႂ်လဵၵ်ႉၶေႃးၶူမ်၊ ႁႂ်ႈမီးတၢင်းမေႃ သႂ်ႇၸႂ်သႂ်ႇၶေႃး ၸႂ်သိလ်ၸႂ်ထမ်းသေလႄႈ ၵေႃႇသၢင်ႈသီႇလ သမႃႇထိ ပၺ်ႇၺႃႇ ဢိၵ်ႇပႃးတႃႇၼ ႁဝ်းၶႃႈၵႂႃႇၼႆ ပုၼ်ႈတႃႇၸၢတ်ႈၼႃႈၸိူဝ်းၼႆႉ ႁဝ်းဢမ်ႇဝႃႈ၊ ပုၼ်ႈတႃႇၸၢတ်ႈၼႆႉ၊ ပုၼ်ႈတႃႇပီ 2021 ၼႆႉၵူၺ်း မၼ်းတေပဵၼ်ပီဢၼ်လီၵႂႃႇၼၼ်ႉၶႃႈယဝ်ႉ။

ၼွၵ်ႈသေၼၼ်ႉတႄႉ ၵဝ်ၶႃႈႁဝ်းၶႂ်ႈတိုၵ်းသူၼ်းတီႈ ၵူၼ်းၶိူဝ်းတႆးႁဝ်းၶႃႈ ၵူၼ်းမိူင်းတႆးႁဝ်းၶႃႈၼႆႉ ႁႂ်ႈလႆႈမီးလွင်ႈႁၵ်ႉၵၼ်ပႅင်းၵၼ်၊ ယႃႇပေႁႂ်ႈမီးလွင်ႈၸင်းၵၼ်ၼႄးၵၼ်သေၵမ်း။ ယႃႇပေမီးလွင်ႈ တိုၵ်းတေႃးၵၼ် ပိုတ်းယိုဝ်းၵၼ်သေၵမ်း၊ မီးသင်ၵေႃႈ ႁႂ်ႈႁဝ်းၶႃႈၸၢင်ႈလႆႈဢုပ်ႇဢူဝ်းၵၼ်သေၵမ်း။

ယႃႇပေလူင်လိုမ်း သြႃႇၸဝ်ႈႁဝ်းၶဝ်သွၼ်ဝႆႉမိူဝ်ႈဢွၼ်တၢင်း၊ ၶဝ်ၸဝ်ႈၵေႃႈဝႃႈ “ဢၼ်သူၸဝ်ႈ ပိုတ်းယိုဝ်းၵၼ်ၼႆႉတႄႉ သူၸဝ်ႈဝႃႈ ပဵၼ်လွင်ႈၵၢၼ်မိူင်းဢိူဝ်ႈ၊ ပဵၼ်လွင်ႈၵၢၼ်ၼႃႈလိၼ်ဢိူဝ်ႈ ၸဵမ်ၵႂႃႇၸိူဝ်းၼႆႉ ႁဝ်းၵေႃႈၶဝ်ႈၸႂ်ဝႃႈ သူၸဝ်ႈလူဝ်ႇလႆႈၵႄႈလိတ်ႈႁင်းၵူၺ်းယဝ်ႉ၊ ၵူၺ်းၵႃႈ သူၸဝ်ႈတေၵႄႈလိတ်ႈၸိူင်ႉႁိုဝ်သေဢမ်ႇဝႃႈ ယႃႇပေဢဝ်/ၸႂ်ႉၵွင်ႈၵၢင်ႇသေ ၵႄႈလိတ်ႈသေၵမ်း၊ ပေႃးသူၸဝ်ႈဢဝ်/ၸႂ်ႉၵွင်ႈၵၢင်ႇသေၵႄႈလိတ်ႈၼႆ ၵူၼ်းမိူင်းႁဝ်းၼႆႉတေတုၵ်ႉၶဢိူဝ်ႈ။ ပေႃးသူဢမ်ႇၸႂ်ႉ ၵွင်ႈၵၢင်ႇသေၵႄႈလိတ်ႈ၊ ပေႃးသူတေဢုပ်ႇဢူဝ်းၵၼ်သေၵႄႈလိတ်ႈၼႆ ၽႂ်ၵေႃႈတေဢမ်ႇလႆႈတုၵ်ႉၶဢိူဝ်ႈ။

ယွၼ်ႉပိူဝ်ႈၼၼ်လႄႈ ႁဝ်းၶႃႈၵေႃႈလႆႈၵတ်းယဵၼ်မႃးပီပၢႆယဝ်ႉ ဢၼ်ၵတ်းယဵၼ်မႃးပီပၢႆၼႆႉ ႁႂ်ႈႁဝ်းၶႃႈ လႆႈသိုပ်ႇၵမ်ၵုမ်းထိင်းၵႂႃႇသေၵမ်း။ ပေႃးၸိူင်ႉၼၼ်ၼႆ မၼ်းတေပဵၼ်ပီ 2021 ဢၼ်ၸိုၼ်ႈသႂ် ပၢင်ႇႁိူင်း ပုၼ်ႈတႃႇမိူင်းတႆးၵူၺ်းဢမ်ႇၵႃး ပုၼ်ႈတႃႇမိူင်းႁူမ်ႈတုမ်လႄႈသင်၊ ပုၼ်ႈတႃႇပွတ်းတွၼ်ႈဢေႊသျိူဝ်ႊ ဝၼ်းဢွၵ်ႇလႄႈသင် တေပဵၼ်ဢၼ်ၵမ်ႉဢၼ်ၸွႆႈဢၼ်ယၼ်ယႂ်ႇလူင်ၵႂႃႇ ၵဝ်ၶႃႈႁဝ်းႁၼ်ထိုင်ၼင်ႇၼႆ။

ယွၼ်ႉပိူဝ်ႈဝႃႈ တႃႇဝၢၼ်ႈမိူင်းတေၵတ်းယဵၼ်ၼႆႉ မၼ်းမီးတီႈပိူၼ်ႈၵူၺ်းဢမ်ႇၸႂ်ႈ မၼ်းမီးတီႈႁဝ်း၊ ပိူၼ်ႈၵႃႈၶႂ်ႈၵတ်းယဵၼ် ပေႃးဝႃႈတႆးႁဝ်းဢမ်ႇၵတ်းယဵၼ် ပေႃးဝႃႈၵူၼ်းမိူင်းတႆးႁဝ်းဢမ်ႇၵတ်းယဵၼ် ၸွင်ႇတေၵတ်းယဵၼ်လႆႈႁိုဝ်၊ ပိူၼ်ႈၵေႃႈလိူတ်ႇမႆႈၸွမ်းဢိူဝ်ႈ။ ပေႃးႁဝ်းၶႃႈ ၵူၼ်းမိူင်းတႆးႁဝ်းၼင်ႇၵၼ် ႁၵ်ႉၵၼ် ပႅင်းၵၼ် ၽွမ်ႉၵၼ် မီးသင်ၵေႃႈႁဝ်းဢဝ်သူပ်းၵႂၢမ်းသေၵႄႈလိတ်ႈၵၼ် ပေႃးပဵၼ်ၸိူင်ႉၼႆၸိုင် မိူင်းတႆးႁဝ်းၵေႃႈတေၵတ်းယဵၼ်သိူဝ်းသႃႇ၊ မိူင်းယူႇႁိမ်းႁွမ်းႁဝ်းၵေႃႈတေၵတ်းယဵၼ်သိူဝ်းသႃႇၵႂႃႇဢေႃႈ။

ယွၼ်ႉပိူဝ်ႈၼၼ်လႄႈ ႁႂ်ႈလႆႈတိုၵ်းသူၼ်းပၼ်ယႂ်ႇယႂ်ႇၼမ်ၼမ် ႁႂ်ႈၵူၼ်းၶိူဝ်းတႆးႁဝ်းၶႃႈ ႁၵ်ႉၵၼ် ၽွမ်ႉၵၼ်သေၵမ်း၊ ႁႂ်ႈၵူၼ်းမိူင်းတႆးႁဝ်းၶႃႈ ႁၵ်ႉၵၼ် ၽွမ်ႉၵၼ်သေၵမ်းတီႈၶႃႈ။