မိူဝ်ႈၼႆႉ ဝၼ်းတီႈ 7/12/2020 ယၢမ်းၵၢင်ၼႂ်မွၵ်ႈ 7:55 မူင်းၶိုင်ႈ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉၸိုင်ႈတႆး RCSS/SSA တင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် တီႈၶူဝ်ပၢင်တွင်း ဢိူင်ႇဝၢၼ်ႈၸၢမ် ၸႄႈဝဵင်းၼမ်ႉတူႈ ၸႄႈတွၼ်ႈ ၵျွၵ်ႉမႄး ၸိုင်ႈတႆးပွတ်းႁွင်ႇ ။
ၵူၼ်းပိုၼ်ႉတီႈ ၼမ်ႉတူႈ လၢတ်ႈဝႃႈ – “မိူဝ်ႈၼႆႉ ၶဝ်ပဵၼ်ပၢင်တိုၵ်းၵၼ် မွၵ်ႈၶိုင်ႈၸူဝ်ႈမူင်းၼႆႉ ပၢင်တိုၵ်းၼၼ်ႉ တေယၢၼ် ၵႆဝၢၼ်ႈဝႆႉၶႃႈဢေႃႈ။ ပဵၼ်သိုၵ်း RCSS တင်း ၸုမ်းဢူၺ်းလီၶႃႈဢေႃႈ” – ဝႃႈၼႆ။
ယၢမ်းလဵဝ် သိုၵ်းတင်းသွင်ၾၢႆႇ တိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉယူႇ ပႆႇထွႆထွၼ်ပၼ် ယူႇယူႇသေ ယိုဝ်းၵၼ် ပဵၼ်မိူဝ်ႈ ပဵၼ်ၵမ်း ႁဵတ်းၼႆဝႆႉယူႇ ဝႃႈၼႆ။
ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈဝႃႈ – “သိုၵ်း TNLA မႃးလေႃႇတိုၵ်းႁဝ်းၶႃႈ တီႈၶူဝ်ပၢင်တွင်း ဢိူင်ႇမၢၼ်ႈ ၸၢမ် မိူင်းမူႉ ၼမ်ႉတူႈၶႃႈ။ တေႃႈလဵဝ် တိုၵ်ႉၶဵင်ႈၶႅင်ၵၼ်ယူႇၶႃႈ။ ယွၼ်ႉသင်လႄႈ ပဵၼ်ပၢင်တိုၵ်းၵၼ်ဢၼ်ဝႃႈ ၼၼ်ႉ ပႆႇ လႆႈထတ်းႁူႉၶႃႈ ယွၼ်ႉတိုၵ်ႉၶဵင်ႈၶႅင်ၵၼ်ယူႇလႄႈ ပၢင်တိုၵ်းတႄႉ ဢမ်ႇပဵၼ်ႁၢဝ်ႈႁႅင်းၶႃႈ”- ဝႃႈၼႆ။
ဢိင်ၼိူဝ်လွင်ႈပဵၼ်ပၢင်တိုၵ်းၵၼ်ၼႆႉသေ လွင်ႈလူႉသုမ်းမၢတ်ႇၸဵပ်းလူႉတၢႆတင်းသွင်ၾၢႆႇတႄႉ ပႆႇလႆႈႁူႉ ၼႆယဝ်ႉ။
ၼႂ်းႁွင်ႈၵၢၼ်ပိုၼ်ၽၢဝ်ႇ ၶွင် TNLA ဢွၵ်ႇဝႆႉတႄႉ – “သိုၵ်း RCSS ထူဝ်းသိုၵ်းၶဝ်ႈမႃးၼႂ်းပိုၼ်ႉတီႈသေ သွင် ၾၢႆႇလႆႈပဵၼ်ပၢင်တိုၵ်းၵၼ်။ မိူဝ်ႈပီ 2018 ၼၼ်ႉၵေႃႈ ဢွင်ႈတီႈၼႆႉၵူၺ်းၼင်ႇၵဝ်ႇ သွင်ၾၢႆႇလႆႈပဵၼ်ပၢင်တိုၵ်းၵၼ် ႁၢဝ်ႈ ႁႅင်း” – ဝႃႈၼႆ။
မိူဝ်ႈဝၼ်းတီႈ 5/12/2020 ယၢမ်းၵၢင်ၼႂ် 7 မူင်းၶိုင်ႈၼၼ်ႉၵေႃႈ RCSS တင်း SSPP ပဵၼ်ပၢင်တိုၵ်းၵၼ် ႁိုင် 5 မိၼိတ်ႉ ဢၼ်မီးတၢင်းၾၢႆႇဢွၵ်ႇ ဝၢၼ်ႈၼမ်ႉၵႅင်း ဢိူင်ႇတႃႈတေႈ ၸႄႈဝဵင်းသီႇပေႃႉ ဝႃႈၼႆ။
