ယၢမ်းလဵဝ် ၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ၵူတ်ႇထတ်းထူပ်းႁၼ် ၵူၼ်းတိတ်းၸပ်းၸိူဝ်ႉမႅင်းတၢင်း ပဵၼ်ၶူဝ်ႊဝိတ်ႉ 19 တင်းမူတ်းမီးၵႂႃႇ 4 ၵေႃႉယဝ်ႉ ဝႃႈၼႆ။
မိူဝ်ႈၼႆႉ ဝၼ်းတီႈ 25/11/2020 ၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ၵူတ်ႇထတ်းထူပ်းႁၼ် ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ထႅင်ႈ 2 ၵေႃႉ ဝႃႈၼႆ။
ဢူးၶျၢၼ်းမျေႉၸေႃး ၽူႈၵွၼ်းၸႄႈဝဵင်းတႃႈၶီႈလဵၵ်း လၢတ်ႈဝႃႈ -“ၵူၼ်းႁဵတ်းတၢင်း ဢၼ်လုၵ်ႉတီႈပႃႇၵိူဝ်ႇမႃး 46 ၵေႃႉ ၼၼ်ႉ ၵူတ်ႇထတ်းႁၼ် တၢင်းပဵၼ် 2 ၵေႃႉ။ တႃႇၵေႃႉၼိုင်ႈတႄႉ ထူပ်းႁၼ် မိူဝ်ႈဝၼ်းတီႈ 22 ပူၼ်ႉမႃးၼၼ်ႉ။ မိူဝ်ႈၼႆႉ သမ်ႉ ထူပ်းႁၼ် ထႅင်ႈၵေႃႉၼိုင်ႈ”- ဝႃႈၼႆ။
မိူဝ်ႈၼႆႉ ယၢမ်းဝၢႆးဝၼ်းၼႆႉၵူၺ်း လႆႈဢဝ်ၶိူင်ႈၸၢၵ်ႈ RDT ၼၼ်ႉ ၵူတ်ႇထတ်းသေ သမ်ႉ ထူပ်းႁၼ်ထႅင်ႈၵေႃႉၼိုင်ႈ ပဵၼ်ၼၢင်း ယိင်း ယူႇပွၵ်ႉပုင်းထုၼ် ဝႃႈၼႆ။
ၵူၼ်းတိတ်းၸပ်းတၢင်းပဵၼ် 4 ၵေႃႉ ၼႂ်းၸႄႈဝဵင်းတႃႈၶီႈလဵၵ်းၼႆႉ ပဵၼ်ပလိၵ်ႈၵေႃႉ ၼိုင်ႈ၊ ၵူၼ်းႁဵတ်းတၢင်း 2 ၵေႃႉလႄႈ ၵူၼ်းပိုၼ်ႉတီႈတႃႈၶီႈလဵၵ်း 1 ၵေႃႉ ။
တႄႇဢဝ် ဝၼ်းတီႈ 30 လိူၼ်မၢတ်ႉၶျ် မႃးထိုင် ဝၼ်းတီႈ 24 လိူၼ်ၼူဝ်ႊဝႅမ်ႊၿိူဝ်ႊ ၼႆႉ ၵူၼ်းတိတ်းၸပ်းတၢင်းပဵၼ်ၶူဝ်ႊ ဝိတ်ႉ 19 ၼႂ်းမိူင်းတႆး မီးၵႂႃႇ 325 ၵေႃႉ။ ပွတ်း ဢွၵ်ႇ 12 ၵေႃႉ၊ ပွတ်းၸၢၼ်း 237 ၵေႃႉလႄႈ ပွတ်းႁွင်ႇ 76 ၵေႃႉ ၼႆယဝ်ႉ။
