ၶွမ်ႊမသျိၼ်ႊၵမ်ၵၢၼ်လိူၵ်ႈတင်ႈ UEC တႄႇၸတ်းႁဵတ်းပၢင်တွတ်ႈၶႅပ်းၵၢင်ၸႂ်လူင်ႈၼႃႈပတ်းပိုၼ်ႉမိူင်းႁူမ်ႈတုမ်၊ ၼႂ်းမိူင်းတႆးၵေႃႈပႃး၊ ၵူၼ်းထဝ်ႈ ဢႃယု 60 ပီ ၶိုၼ်ႈၼိူဝ် လႄႈ ဢိင်ၼိူဝ်လွင်ႈတၢင်းသေလွင်ႈလွင်ႈ လူဝ်ႇတွတ်ႈ ၶႅပ်းၵၢင်ၸႂ်ၸိူဝ်းၼႆႉ တႄႇတွတ်ႈၶႅပ်းၵၢင်ၸႂ်လူင်ႈၼႃႈယဝ်ႉ ဝႃႈၼႆ။
မိူဝ်ႈၼႆႉ ဝၼ်းတီႈ 29/10/2020 ယူႇတီႈၶွမ်ႊမသျိၼ်ႊၵမ်ၵၢၼ်လိူၵ်ႈတင်ႈမိူင်းႁူမ်ႈတုမ် တေၸတ်းႁဵတ်းပၢင်တွတ်ႈၶႅပ်းၵၢင် ၸႂ် လူင်ႈၼႃႈ တွၼ်ႈတႃႇၵူၼ်းထဝ်ႈ ၵူၼ်းၸိူဝ်းၵႂႃႇယၢပ်ႇမႃးယၢပ်ႇ၊ ၵူၼ်းတူၵ်းၶွၵ်ႈ၊ ၵူၼ်းတၢင်ႇၸႄႈမိူင်းလႄႈတိူင်း ၸိူဝ်း မႃးႁႃႁဵတ်းၵၢၼ်မိူင်းတႆး၊ ၶႃႈႁၢပ်ႇၵၢၼ်လူင်ပွင်ၸိုင်ႈ မိူၼ်ၼင်ႇ ပလိၵ်ႈ/ ယေး၊ တပ်ႉသိုၵ်း၊ ၾၢႆႇယူႇလီ၊ ၾၢႆႇပၢႆးပၺ်ႇၺႃႇ ၸိူဝ်းၼႆႉ တႄႇတွတ်ႈၶႅပ်းၵၢင်ၸႂ်လူင်ႈၼႃႈၵႂႃႇယဝ်ႉဝႃႈၼႆ။
ၸၢႆးလႃႉထူၺ်း ၼေႃႇၽူႈတႅၼ်းသၽႃး ၸႄႈမိူင်းၶဵတ်ႇလိူၵ်ႈတင်ႈမၢႆ 1 ၸႄႈဝဵင်း လႃႈသဵဝ်ႈ လၢတ်ႈဝႃႈ – “တႄႇဢဝ် မိူဝ်ႈ ၼႆႉၵႂႃႇ ပၢင်တွတ်ႈၶႅပ်းၵၢင်ၸႂ် လူင်ႈၼႃႈတႄႉ တႄႇၸတ်းယဝ်ႉၶႃႈ။ တွၼ်ႈတႃႇၵူၼ်းၵႂႃႇမႃးယၢပ်ႇ ၵူၼ်းႁဵတ်းၵၢၼ်ၶုၼ် ၽူႈမီးပုၼ်ႈၽွၼ်း၊ ၵူၼ်းၶိုၼ်ႈႁူင်းယႃ၊ ၵူၼ်းပုမ်ယႂ်ႇ ၵူၼ်းတူၵ်းၶွၵ်ႈ၊ ယဝ်ႉၵေႃႈ ၵူၼ်းဢွၵ်ႇတႃႈပႆတၢင်း ဢမ်ႇတူဝ်ႈတၼ်း ၼႂ်းဝၼ်းတီႈ 8/11/2020 ၸိူဝ်းၼၼ်ႉၶႃႈ” – ဝႃႈၼႆ။
ပၢင်တွတ်ႈၶႅပ်းၵၢင်ၸႂ် လူင်ႈၼႃႈၼႆႉ တႄႇၸတ်းႁဵတ်း ၼႂ်းဝၼ်းတီႈ 29/10/2020 တေႃႇထိုင် ဝၼ်းတီႈ 5/11/2020 ။ ၸိူဝ်းဢၼ်ဢွၵ်ႇၸိုဝ်ႈဝႆႉ ၼႂ်းပွၵ်ႉၼႂ်းယွမ်ႇသမ်ႉ တွတ်ႈလူင်ႈၼႃႈလႆႈ ၼႂ်းဝၼ်းတီႈ 6 တင်း 7/11/2020 ၼႆႉ။
ပၢင်လိူၵ်ႈတင်ႈ ၵူႈလွင်ႈလွင်ႈ မိူင်းႁူမ်ႈတုမ်သမ်ႉ တေၸတ်းႁဵတ်းၼႂ်းဝၼ်းတီႈ 8/11/2020 တူၵ်းမႅၼ်ႈလိူၼ် 11 လွင်ႈ 8 ၶမ်ႈ။ ၵိုတ်းထႅင်ႈၶၢဝ်းယၢမ်း 10 ဝၼ်း။ ပၢင်လိူၵ်ႈတင်ႈ ၵူႈလွင်ႈလွင်ႈ မိူင်းႁူမ်ႈတုမ် ပီ 2020 ၼႆႉ ၼႂ်းမိူင်းတႆး မီးပႃႇတီႇၵၢၼ်မိူင်း 31 ပႃႇတီႇတေၶဝ်ႈၶႅင်ႇ ၼႆယဝ်ႉ။
