သိုၵ်း RCSS တင်း TNLA ၽႃႇၺႃးၵၼ်လႄႈ လႆႈပိုတ်းယိုဝ်းၵၼ် ၼႂ်းၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇ။
ဝၼ်းတီႈ 25/10/2020 ယၢမ်းၵၢင်ဝၼ်း 11:20 မူင်း သိုၵ်း RCSS တင်း TNLA ၽႃႇ ၺႃးၵၼ်သေ လႆႈပဵၼ်ပၢင်တိုၵ်းၵၼ် ႁိုင်မွၵ်ႈ 10 မိၼိတ်ႉ တီႈႁိမ်းဝၢၼ်ႈၼႃးၵုၼ် ဢိူင်ႇၼႃး သၢႆး ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ။
ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈဝႃႈ – “ယွၼ်ႉသိုၵ်း TNLA ၶဝ်မႃးၽႃႇၺႃးယၢမ်းမူၵ်းႁဝ်းၶႃႈလႄႈ လႆႈယိုဝ်းၵၼ်ၶႃႈ။ ၾၢႆႇ TNLA ၶဝ်လႆႈတိူဝ်ႉမၢတ်ႇသေ ထွႆၵႂႃႇၶိုၼ်းၶႃႈယဝ်ႉ။ သွင်ၾၢႆႇလႆႈယိုဝ်းၵၼ် ႁိုင် 10 မိၼိတ်ႉၼႆႉ” – ဝႃႈၼႆ။
ဢိင်ၼိူဝ်လွင်ႈၼႆႉ တၢင်းၾၢႆႇႁွင်ႈၵၢၼ်ပိုၼ်ၽၢဝ်ႇ TNLA လၢတ်ႈဝႆႉဝႃႈ ယွၼ်ႉသိုၵ်း RCSS ထႅမ်ႁႅင်းသိုၵ်းသေ ပူၼ်ႉၶဝ်ႈ မႃးၼႂ်းပိုၼ်ႉတီႈလႄႈ လႆႈပဵၼ်ပၢင်တိုၵ်းၵၼ် ဝႃႈၼႆ။
ၵူၼ်းပိုၼ်ႉတီႈ ၼႂ်းဢိူင်ႇၼႃးသၢႆး လၢတ်ႈဝႃႈ – “သိုၵ်းလွႆ တူင်ႉၼိုင်ၵႂႃႇမႃးသေ ၽႃႇၺႃးသိုၵ်းတႆးၶႃႈဢေႃႈ သွင်ၾၢႆႇလႆႈ ပဵၼ်ပၢင်တိုၵ်းၵၼ် တၢင်းဝၢၼ်ႈၵွင်းထွၼ်ႇ – ဝၢၼ်ႈၼႃးၵုၼ် ၸိူဝ်းၼႆႉၶႃႈဢေႃႈ၊ ပၢင်တိုၵ်းတႄႉ ပဵၼ်ၵမ်ႉၼိုင်ႈၵူၺ်း သိုၵ်း လွႆထွႆၶိုၼ်းသေ ပၢင်တိုၵ်းၸင်ႇယဵၼ်လူင်းၶႃႈဢေႃႈ” – ဝႃႈၼႆ။
မိူဝ်ႈႁူဝ်ပီ 2020 လိူၼ်ၾႅပ်ႊၿိဝ်ႊရီႊ ဝၼ်းတီႈ 28 ၼႆႉၵေႃႈ သိုၵ်း RCSS တင်း သိုၵ်း TNLA လႆႈပဵၼ်ပၢင်တိုၵ်းၵၼ် ပွၵ်ႈၼိုင်ႈ တီႈၸႄႈဝဵင်းမိူင်းလူင် ၸိုင်ႈတႆး ပွတ်းႁွင်ႇ ၾၢႆႇပွင်ႇၶၢဝ်ႇ တပ်ႉသိုၵ်းတဢၢင်း ပိုၼ်ၽၢဝ်ႇဝႆႉၼင်ႇၼႆ။
