ငဝ်ႈငုၼ်းတီႇမူဝ်ႇၶရေႇသီႇၸိူဝ်ႉၶိူဝ်းတႆး (ႁိုဝ်) ပႃႇတီႇႁူဝ်သိူဝ် SNLD  ၸႄႈဝဵင်းတၢင်ႉယၢၼ်း ႁၢင်ႈႁႅၼ်းတႃႇယိုၼ်ႈလိၵ်ႈထိုင်ၶွမ်ႊမသျိၼ်ႊပၢင်လိူၵ်ႈတင်ႈမိူင်းႁူမ်ႈတုမ်တႃႇႁႂ်ႈၵူၼ်းမိူင်းတၢင်ႉယၢၼ်းတေလႆႈတွတ်ႈၶႅပ်းၵၢင်ၸႂ် ပၢင်လိူၵ်ႈတင်ႈ 2020။

 ဢိင်ၼိူဝ်ၶွမ်ႊမသျိၼ်ႊပၢင်လိူၵ်ႈတင်ႈ မိူင်းႁူမ်ႈတုမ်ပိုၼ်ၽၢဝ်ႇ ပိုၼ်ႉတီႈဢၼ်တေဢမ်ႇၸတ်းပၢင်လိူၵ်ႈတင်ႈ မိူဝ်ႈဝၼ်းတီႈ 16/10/2020 ၼၼ်ႉ ၸႄႈဝဵင်းတၢင်ႉယၢၼ်းၵေႃႈၶဝ်ႈပႃး  11 ဢိူင်ႇ။  ၼင်ႇႁိုဝ်ၵူၼ်းမိူင်းတၢင်ႉယၢၼ်း တေဢမ်ႇသုမ်းသုၼ်ႇလႆႈၵူၼ်းမိူင်းၼၼ်ႉ ယူႇတီႈၸုမ်းပွင်ၵၢၼ် ၸႄႈဝဵင်းတၢင်ႉယၢၼ်း တေတႅမ်ႈလိၵ်ႈယိုၼ်ႈယွၼ်းတၢင်ႇထိုင် ၶွမ်ႊမသျိၼ်ႊ မိူင်းႁူမ်ႈတုမ် ဝႃႈၼႆ။

ၸၢႆးပႃႉ ၵႅမ်ႁူဝ်ပဝ်ႈ ပႃႇတီႇႁူဝ်သိူဝ် ၸႄႈဝဵင်းတၢင်ႉယၢၼ်း လၢတ်ႈဝႃႈ – “တႃႇ ၵူၼ်းမိူင်းႁဝ်းၶႃႈ ပေႃးတေမီးသုၼ်ႇလႆႈတွတ်ႈၶႅပ်းၵၢင်ၸႂ်တင်းမူတ်းၼၼ်ႉ ယၢမ်းလဵဝ် ႁဝ်းၶႃႈ တိုၵ်ႉႁၢင်ႈႁႅၼ်း  တႃႇ တႅမ်ႈလိၵ်ႈသူင်ႇၸူးၶွမ်ႊမသျိၼ်ႊပၢင်လိူၵ်ႈတင်ႈမိူင်းႁူမ်ႈတုမ်ယူႇ။     တေသူင်ႇဝၼ်းလႂ်ၼၼ်ႉတႄႉ ႁဝ်းၶႃႈ ပႆႇၸၢင်ႈ ဝႃႈ ။ တိုၵ်ႉပႂ်ႉထွမ်ႇငဝ်ႈငုၼ်း ပၼ်တၢင်းၶႆႈၸႂ် ၸိၸမ်ၼေမႃးယူႇဢေႃႈ။ ” – ဝႃႈ ၼႆ။

 11 ဢိူင်ႇ ၸႄႈဝဵင်းတၢင်ႉယၢၼ်းဢၼ်ထုၵ်ႇ UEC ပိုၼ်ၽၢဝ်ႇယုၵ်ႉလိူၵ်ႈ(ဢမ်ႇ)ၸတ်းပၢင်လိူၵ်ႈတင်ႈၼၼ်ႉပဵၼ် ဢိူင်ႇလွႆပႅတ်ႇ၊ ႁူဝ်တႃႈ၊ ၼမ်ႉလပ်ႉ၊ ၵွင်းလၢင်း၊ ပၢင်ႇၽိုဝ်၊ ၼႃးဝၢႆ၊ မၢၼ်ႈၵွင်း၊ ၼမ်ႉၸႅင်၊ မၢၼ်ႈလွႆ၊ ၶမ်းပူင်းလႄႈ ၼမ်ႉဢုၼ်ႇ ၸိူဝ်းၼႆႉ။

ၸၢႆးၶမ်းမျၢတ်ႈ ၼေႃႇၽူႈတႅၼ်းသၽႃး ၸႄႈမိူင်း ၶဵတ်ႇလိူၵ်ႈတင်ႈမၢႆ 2  ပႃႇတီႇႁူဝ်သိူဝ် ၸႄႈဝဵင်းတၢင်ႉယၢၼ်း လၢတ်ႈဝႃႈ – “ ၵူၼ်းမိူင်း ႁဝ်းၶႃႈၼႆႉ လူဝ်ႇလႆႈမီးသုၼ်ႇတွတ်ႈၶႅပ်းၵၢင်ၸႂ်ၵူႈၵေႃႉ ၶႃႈဢေႃႈ။ တၢင်းႁဝ်းၼႆႉ သဵင်ၵွင်ႈၵေႃႈဢမ်ႇတႅၵ်ႇလူး။ ၶဝ် ဢိင်ဢဝ်လွင်ႈႁူမ်ႇလူမ်ႈသေ ဢမ်ႇပၼ်ၶႂၢင်ႉၸတ်းၵူၺ်းၶႃႈ။ မၢင်တီႈ မၢင်တၢင်းၼႆႉ သဵင်ၵွင်ႈတိုၵ်ႉတႅၵ်ႇယူႇ ယင်း ပၼ် ၸတ်းႁဵတ်းယူႇလူး။ ဢၼ်ၶဝ်ႁဵတ်းၼႆႉ မၼ်းဢမ်ႇမီးလွင်ႈၽဵင်ႇပဵင်းၶႃႈ” – ဝႃႈၼႆ။

  ဢိူင်ႇလွႆပႅတ်ႇဢၼ်ပႃးၼႂ်းသဵၼ်ႈမၢႆႈယုၵ်ႉလိူၵ်ႈၸတ်းပၢင်လိူၵ်ႈတင်ႈၼၼ်ႉ ယူႇၼႂ်းၼႃႈတီႈ ပျီႇ တူႉၸိတ်ႉမၢၼ်ႈပၢင်ႇၵုမ်းၵမ်၊ ဢိူင်ႇႁူဝ်တႃႈသမ်ႉ ပဵၼ်ပျီႇတူႉၸိတ်ႉမိူင်းႁႃႉ ၵုမ်းၵမ်။ လိူဝ်ၼၼ်ႉ တႃႇ 8 ဢိူင်ႇ ဢၼ်မီးၾၢႆႇ ၸၢၼ်းတၢင်ႉယၢၼ်းသမ်ႉ ယူႇၼႂ်းၼႃႈတီႈ SSPP ၵုမ်းၵမ် ၼႆယဝ်ႉ။

ၼႂ်းၼႃႈတီႈ  SSPP ၵုမ်းၵမ်ဝႆႉၼၼ်ႉ ယူႇတီႈ SSPP ပၼ်တင်ႈပုင်းတွတ်ႈၶႅပ်းၵၢင်ၸႂ်လႄႈ ပၼ်သုၼ်ႇၵူၼ်းမိူင်းလႆႈ တွတ်ႈ ၶႅပ်းၵၢင်ၸႂ်လႆႈလွတ်ႈလႅဝ်း ၼႆ ၸဝ်ႈသိုၵ်း ၸၢႆးသူႉ ၽူႈၶၢၼ်ပၢၵ်ႇ SSPP ယၢမ်ႈလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈ မိူဝ်ႈႁူဝ်လိူၼ်ဢေႃႊ ၵတ်ႊသ် ပူၼ်ႉမႃး ၼၼ်ႉယူႇ။

မိူဝ်ႈပၢင်လိူၵ်ႈတင်ႈ ပီ 2015 ၼၼ်ႉၵေႃႈ ၼႂ်း 8 ဢိူင်ႇ ဢၼ် SSPP ၵုမ်းၵမ် ၼၼ်ႉ UEC ၼႄၼႃႈတိူဝ်ႈဝႃႈ  ဢမ်ႇမီးလွင်ႈႁူမ်ႇလူမ်ႈၼႆသေ ဢမ်ႇလႆႈၸတ်းပၢင်လိူၵ်ႈတင်ႈ   ။   ထိုင်မႃး ပီ 2017 ၸင်ႇလႆႈၸတ်းႁဵတ်းၽွမ်ႉၵၼ်တင်း ပၢင်လိူၵ်ႈတင်ႈသွမ်ႈ။

 UEC မိူင်းႁူမ်ႈတုမ် ပိုၼ်ၽၢဝ်ႇ ၼႃႈတီႈဢမ်ႇၸတ်းပၢင်လိူၵ်ႈတင်ႈ 2020 ဢွၵ်ႇမႃးၼႆႉ မိူင်းတႆး ပႃးဝႆႉ ၵမ်ႈပႃႈၼမ်၊ လွင်ႈၼႆႉ ၼွၵ်ႈလိူဝ်ပႃႇတီႇၵၢၼ်မိူင်းယဝ်ႉ လၢႆၾၢႆႇလၢႆၸုမ်းၵေႃႈ ႁၼ်ထိုင်ဝႃႈ ဢမ်ႇမီးလွင်ႈၽဵင်ႇပဵင်းၼႆသေ တႅမ်ႈလိၵ်ႈတၢင်ႇထိုင် ၶွမ်ႊမသျိၼ်ႊပၢင်လိူၵ်ႈတင်ႈ မိူင်းတႆးလႄႈ ငဝ်ႈငုၼ်း  ။

ဢူးထိၼ်ႇၵျေႃႇ ႁူဝ်ပဝ်ႈၶွမ်ႊမသျိၼ်ႊၵၢၼ်လိူၵ်ႈတင်ႈၸႄႈမိူင်းတႆး လၢတ်ႈတီႈၽူႈတွႆႇႁွၵ်ႈဝႃႈ – “တွၼ်ႈတႃႇ ၸႄႈဝဵင်းမိူင်းၵိုင် တင်းဝဵင်း၊ ပွၵ်ႉတေႃႇယွတ်ႈ ဝဵင်းမူႇၸေႊလႄႈ ဢိူင်ႇမႄႈႁၢၼ်ႇ ၸႄႈဝဵင်းလႃႈသဵဝ်ႈ ၸိူဝ်းၼႆႉတေလႆႈၸတ်းပၢင်လိူၵ်ႈတင်ႈၼၼ်ႉတႄႉ မီးငၢဝ်းလၢႆးလီမႃးယူႇ။ ၼင်ႇႁိုဝ် ၵူၼ်းမိူင်းပေႃးတေလႆႈလိူၵ်ႈတင်ႈၼၼ်ႉ ယူႇတီႈၶွမ်ႊမသျိၼ်ႊႁဝ်းၶႃႈသေ တိုၵ်းၶတ်းၸႂ် ၵူတ်ႇထတ်းပၼ်ဝႆးဝႆး  ယဝ်ႉၵေႃႈ တေတၢင်ႇယိုၼ်ႈထိုင်တီႈ ၶွမ်ႊမသျိၼ်ႊမိူင်းႁူမ်ႈတုမ်ဝႆးဝႆး” – ဝႃႈၼႆ။

ၼႂ်းၸႄႈမိူင်းတႆး ၵူၼ်းမိူင်းဢၼ်ႁၢမ်းသုၼ်ႇတွတ်ႈၶႅပ်းၵၢင်ၸႂ်ၼႆႉသမ်ႉ မိူၼ်ၼင်ႇ မိူင်းလႃး တင်းဝဵင်း၊ ပၢင်သၢင်း (ပၢင် ၶမ်း)၊ ၼႃးၽၢၼ်း၊ မိူင်းမႂ်ႇ၊ ပၢင်ဝၢႆ ၊ ႁူဝ်ပၢင်ႇ ၸိူဝ်းၼႆႉတင်းဝဵင်း၊  မိူင်းၵိုင်ၵေႃႈပတ်းပိုၼ်ႉ တင်းဝဵင်း။ လိူဝ်ၼၼ်ႉၸႄႈဝဵင်းၵျွၵ်ႉမႄး 12 ဢိူင်ႇ၊ ၼွင်ၶဵဝ် 1 ဢိူင်ႇ၊ ၼမ်ႉသၼ်ႇ 3 ဢိူင်ႇ၊ မၢၼ်ႈတူင်ႈ 2 ဢိူင်ႇ၊ မိူင်းၶၢၵ်ႇ 4 ဢိူင်ႇ၊ မိူင်းယၢင်း 2 ပွၵ်ႉလႄႈ 13 ဢိူင်ႇ၊ မိူင်းၽျၢၵ်ႈ 1 ဢိူင်ႇ၊ မိူင်းယွင်း 8 ဢိူင်ႇ၊ ၵူတ်ႉၶၢႆ 4 ဢိူင်ႇ၊ မၢၵ်ႇမၢင် 17 ဢိူင်ႇ၊ မိူင်းတူၼ် 3 ဢိူင်ႇ၊ တၢင်ႉယၢၼ်း 11 ဢိူင်ႇ၊ လႃႈ သဵဝ်ႈ 6 ဢိူင်ႇ၊ ၵုၼ်လူင် 1 ဢိူင်ႇ၊ ၵုင်းၵႅင်း 1 ဢိူင်ႇ၊ မူႇၸေႊ 1 ပွၵ်ႉလႄႈ 9 ဢိူင်ႇၸဵမ် ၸိူဝ်းၼႆႉ။ 

ၵဵဝ်ႇလူၺ်ႈလွင်ႈၼႆႉ ဝၼ်းတီႈ 19/10/2020 ဝၼ်းမိူဝ်ႈၼႆႉ  ယူႇတီႈ UNA ၸုမ်းဢူၺ်းလီၽွမ်ႉႁူမ်ႈၸိူဝ်ႉၸၢတ်ႈ ဢၼ်မီးပႃႇတီႇၵၢၼ်မိူင်း ဢွင်ႇပေႉပၢင်လိူၵ်ႈတင်ႈ 1990 ႁူမ်ႈၵၼ်ၶွတ်ႇၽွတ်ႈဝႆႉၼၼ်ႉၵေႃႈ ဢွၵ်ႇလိၵ်ႈပိုၼ်ၽၢဝ်ႇၽိုၼ်ၼိုင်ႈ ။ သူၼ်းဢီးတုၵ်းယွၼ်းထိုင်ႁႂ်ႈ ၶွမ်ႊမသျိၼ်ႊပၢင်လိူၵ်ႈတင်ႈမိူင်းႁူမ်ႈတုမ် ၶိုၼ်းထတ်းသၢင်ပၼ် ၶေႃႈပိုၼ်ၽၢဝ်ႇ တီႈလိၼ်ႁၢမ်ႈၸတ်းပၢင်လိူၵ်ႈတင်ႈၼၼ်ႉ ႁႂ်ႈၶိုတ်းတၼ်းၶၢဝ်းယၢမ်း  ၊ ဝႆးဝႆး ဝႃႈၼႆ။