သဵၼ်ႈတၢင်းၵႃး ၵဵင်းတုင် – မိူင်းၶၢၵ်ႇ – မိူင်းယၢင်း ဢၼ်ပိၵ်ႉၵႂႃႇယွၼ်ႉတၢင်းပဵၼ်ၶူဝ်ႊဝိတ်ႉ မိူဝ်ႈႁူဝ်လိူၼ်သႅပ်ႊထိမ်ႊ ပိူဝ်ႊၼႆႉၼၼ်ႉ ယၢမ်းလဵဝ်ၶိုၼ်းပိုတ်ႇ ပၼ်ၵူၼ်းမိူင်းၵႂႃႇမႃးယဝ်ႉသေတႃႉ တိုၵ်ႉလႆႈမႆႈၸႂ် ၵူဝ်တၢင်းပဵၼ်ၶူဝ်ႊဝိတ်ႉ ၽႄႈလၢမ်း။

ဝၼ်းတီႈ 24/9/2020 ၵူၼ်းမိူင်းရၶႅင်ႇ ဢၼ်မႃးႁႃႁဵတ်းၵၢၼ် ၼႂ်းၼႃႈလိၼ် ၶိုၵ်ႉတွၼ်းမၢႆ 4 မိူင်းလႃး ႁူပ်ႉႁၼ်ၺႃး တၢင်းပဵၼ်ၶူဝ်ႊဝိတ်ႉ 19 သေ ၶိုၼ်ႈႁူင်းယႃဝႆႉယူႇတီႈ ၵဵင်းတုင်ၼၼ်ႉ မိူဝ်ႉၼႆႉ လႆႈလူင်းႁူင်းယႃၵႂႃႇတင်း 3 ၵေႃႉ။ လွင်ႈမႆႈၸႂ်ၼိူဝ် တၢင်းပဵၼ်ၶူဝ်ႊဝိတ်ႉလူတ်းယွမ်းၽွင်ႈလႄႈ ၼႂ်းဝူင်ႈၼႆႉ သဵၼ်ႈတၢင်းၵႃး ၵဵင်းတုင် – မိူင်းၶၢၵ်ႇ – မိူင်းယၢင်း ပိုတ်ႇပၼ် ၵူၼ်မိူင်း ၵႂႃႇမႃး သေတႃႉ ၵႃးတၢင်ႇၵူၼ်း (လႅင်းၵႃး) /တၢင်ႇၵုၼ်ႇ ၸိူဝ်းၼႆႉတႄႉ ပႆႇပၼ်ၵႂႃႇမႃး။

လုင်းၸၢႆးလဝ်း ႁူဝ်ပဝ်ႈ ၵေႃလိၵ်ႈလၢႆးလႄႈ ၾိင်ႈငႄႈတႆး မိူင်းယၢင်း ဝႃႈ – “ဝူင်ႈၼႆႉ သဵၼ်ႈတၢင်း ၵဵင်းတုင် – မိူင်းယၢင်း ပိုတ်ႇပၼ်ၵူၼ်းၵႂႃႇမႃးယဝ်ႉၶႃႈ။ ၵူၺ်းၵႃႈ တေလႆႈဢဝ်ဝႂ်ႁပ်ႉႁွင်း ပၢႆးယူႇလီၵႂႃႇၸွမ်း။ ၵူၺ်းၵႃႈ မိူၼ်ၼင်ႇ လႅင်းၵႃး – ၵႃးတၢင်ႇၵုၼ်ႇ ၸိူဝ်းၼႆႉ ပႆႇၵႂႃႇမႃးလႆႈ။ ဢၼ်ၵႂႃႇမႃးလႆႈၵေႃႈ ပဵၼ်ရူတ်ႉၵႃး သုၼ်ႇတူဝ်ၵူၺ်း”-  ဝႃႈၼႆ။

ဢၼ်လုၵ်ႉမိူင်းယၢင်း၊ မိူင်းၶၢၵ်ႇ ၵႂႃႇၸူး ၼႃႈလိၼ် UWSA ဝႃႉ ၵုမ်းၵမ်  မိူင်းပွၵ်ႉ၊ မိူင်းၽႅၼ်၊ ႁူဝ်တဝ်း ၸိူဝ်းၼႆႉတႄႉပႆႇလႆႈ။ ၸိူင်ႉၼၼ်ၼင်ႇၵဝ်ႇ သဵၼ်ႈတၢင်း ဢၼ်လုၵ်ႉမိူင်းယၢင်း မုင်ႈၸူး သိူဝ်လိုဝ်း – မိူင်းလႃး ၵေႃႈ ၸဝ်ႈၼႃႈတီႈ တၢင်းမိူင်းလႃး ပႆႇပၼ်ၵႂႃႇမႃး။

ၸၢႆးပၢင်ႇ ၸဝ်ႈၵႃး ဢၼ်လႅၼ်ႈတၢင်း ၵဵင်းတုင် – မိူင်းယၢင်း လၢတ်ႈဝႃႈ – “ၵဵင်းတုင် – မိူင်းယၢင်းတႄႉ ပိုတ်ႇယဝ်ႉသေတႃႉ လႅင်းၵႃးတႄႉ ပႆႇၸၢင်ႈၵႂႃႇ တိုၵ်ႉပိၵ်ႉဝႆႉ ၸူဝ်ႈၶၢဝ်း ပႆႇ ၸၢင်ႈၵႂႃႇမႃးလႆႈ။ ၵဵင်းတုင် – တႃႈၶီႈလဵၵ်းတႄႉ ၵႂႃႇမႃးလႆႈယူႇ” – ဝႃႈၼႆ။

မိူဝ်ႈဝၼ်းတီႈ 5/9/2020 ၼၼ်ႉ ႁွင်ႈၵၢၼ်လူင်ၾၢႆႇပၢႆးယူႇလီ ပိုၼ်ၽၢဝ်ႇဝႃႈ ၵူၼ်းမိူင်းရၶႅင်ႇ ဢၼ်မႃးႁႃႁဵတ်းၵၢၼ် တၢင်း သိူဝ်လိုဝ်း မိူင်းယၢင်း တိတ်းၸပ်းတၢင်းပဵၼ်ၶူဝ်ႊဝိတ်ႉ 3 ၵေႃႉၼႆလႄႈ ၼႂ်းတူဝ်ဝဵင်းမိူင်းယၢင်း ယင်ႉႁပ်းၵႂႃႇမႃး တူင်ႉၼိုင် ၵႃႉၶၢႆ သဵင်ႈသဵင်ႈၼၼ်ႉ ပိုတ်ႇၶိုၼ်းၼႂ်းဝူင်ႈၼႆႉ။

ၸၢႆးသၢမ် ၵူၼ်းမိူင်းယၢင်း လၢတ်ႈဝႃႈ – “ၵၢတ်ႇသႃး၊ ႁၢၼ်ႉတၢင်းၶၢႆ တီႈမႄးရူတ်ႉၵႃး ၸိူဝ်းၼႆႉ ဝူင်ႈၼႆႉပိုတ်ႇၶိုၼ်းယဝ်ႉ။ ၵူၼ်းမိူင်းတႄႉ ႁူပ်ႉလွင်ႈယၢပ်ႇၽိုတ်ႇ လွင်ႈၵႃႉၶၢႆၵၼ်ယူႇ၊ ပိုတ်ႇၶိုၼ်းသေတႃႉပႆႇပဵၼ်ၵၢၼ်။ ယၢပ်ႇၽိုတ်ႇယူႇၵေႃႈ ဢမ်ႇၸၢင်ႈႁဵတ်းႁိုဝ်ၶႃႈၼေႃႈ” – ဝႃႈၼႆ။

တၢင်းပဵၼ်ၶူဝ်းဝိတ်ႉ ၽႄႈၶိုၼ်းႁွပ်ႈသွင် ၼႆႉ တႄႇမႃးတၢင်းမိူင်းရၶႅင်ႇ၊ ၵူၼ်းမိူင်းရၶႅင်ႇသမ်ႉ မႃးၵိၼ်ၸၢင်ႈ ႁဵတ်းၵၢၼ် သူၼ် ၼႂ်းၼႃႈလိၼ်ၽွင်းငမ်း ၸုမ်းမိူင်းလႃး ၼပ်ႉႁူဝ်ႁဵင်၊ ၵမ်ႈၽွင်ႈလတ်းမိူင်းလႃးသေ ၵႂႃႇႁဵတ်းၵၢၼ် တၢင်းၼႃႈလိၼ် ၽွင်းငမ်းတူဝ်ၵဝ်ႇ သိပ်းသွင်ၽၼ်းၼႃး ၵေႃႈမီး။ ၵူၼ်းဢၼ်ၸပ်းတၢင်းပဵၼ် 3 ၵေႃႉ ဢၼ်ႁူပ်ႉႁၼ် တီႈမိူင်းသိူဝ်လိုဝ်း ၼၼ်ႉၵေႃႈ ပဵၼ်ၵူၼ်းၸိူဝ်းၼႂ်းၶဝ်ၼႆႉ။ ယွၼ်ႉၼၼ် ၶူဝ်ႊဝိတ်ႉ ဢၼ်ၽႄႈ မိူင်းတႆး ပွတ်းဢွၵ်ႇၶူင်း 3 ၵေႃႉ ၼၼ်ႉၵေႃႈ ပဵၼ်ၵူၼ်း မိူင်းရၶႅင်ႇသဵင်ႈသဵင်ႈ လႄႈ ၵူၼ်းမိူင်းယၢင်း ၸင်ႇဢွၼ်ၵၼ်ၵူဝ်ဝႃႈၼႆ။

ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 ၼႂ်းမိူင်းႁူမ်ႈတုမ် ပုင်ႈၶိုၼ်ႈမႃးၵူႈဝၼ်း ယၢမ်းလဵဝ် ၵူၼ်းတိတ်းၸပ်းတၢင်းပဵၼ် မီးၵႂႃႇ 7,827 ၵေႃႉ၊ ယူတ်းယႃ 5,609 ၵေႃႉ၊ ယႃၶႅၼ်း 2,085 ၵေႃႉလႄႈ လူႉတၢႆ 133 ၵေႃႉ ႁွင်ႈၵၢၼ်ပၢႆးယူႇလီမိူင်းႁူမ်ႈတုမ် မိူင်းႁူမ်ႈတုမ် ပိုၼ်ၽၢဝ်ႇဢွၵ်ႇဝႆႉၼင်ႇၼႆ။