ပၢင်ၵုမ်လူင် ပၢင်လူင် ပီႁူဝ်ပၢၵ်ႇ 21 ၵမ်းထူၼ်ႈ 4 ဢၼ်ၸတ်းႁဵတ်းတီႈၼေႇပျီႇတေႃႇ  ပိုတ်ႇပၢင် မိူဝ်ႈဝၼ်းတီႈ 19/8/2020 ၼၼ်ႉ ယူႇတီႈ တေႃႇဢွင်ႇသၢၼ်းသူႉၵျီႇ တီႈၵိူဝ်းၵုမ်မိူင်းႁူမ်ႈတုမ်၊ ၸွမ်ၸိၵ်းသိုၵ်းမိၼ်းဢွင်ႇလႅင်ႇ တပ်ႉ သိုၵ်းလူင်ပွင်ၸိုင်ႈမၢၼ်ႈ ၊ ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈ PPST ၸူဝ်ႈၶၢဝ်းလႄႈ ၸၢႆးၺုၼ်ႉလုၼ်ႇ(ႁွင်ႉ) ၸၢႆးၼုတ်း ၵႅမ်ႁူဝ်ပဝ်ႈ 1 SNLD ၸိူဝ်း ၼႆႉ မွၵ်ႇလၢတ်ႈၶေႃႈၵႂၢမ်းပိုတ်ႇပၢင်ၵႂႃႇ။

ၼႂ်းၶဝ်ၸဝ်ႈ 4 ၵေႃႉ ဢၼ်လႆႈမွၵ်ႇလၢတ်ႈ ၶေႃႈၵႂၢမ်းၵႂႃႇၼၼ်ႉ ယူႇတီႈၵူၼ်းတူင်ႉၼိုင်တူင်ႇဝူင်း ၵၢၼ်မိူင်း၊ ၵၢၼ်သိုၵ်း ၶဝ် ၸဝ်ႈ ႁၼ်ထိုင်ၸိူင်ႉႁိုဝ်ၼၼ်ႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ဝႆႉ ၽူႈတူင်ႉၼိုင်ၼႂ်းတူင်ႇဝူင်း ၵၢၼ်သိုၵ်း တၢင်းၸိုင်ႈတႆးပွတ်းႁွင်ႇ ၵေႃႉၼိုင်ႈလႄႈ ၽူႈတူင်ႉၼိုင်ၼႂ်းတူင်ႇဝူင်းၵၢၼ်မိူင်း ပႃႇတီႇ သိူဝ်ၽိူၵ်ႇ ၵေႃႉၼိုင်ႈ။

ၼမ်ႉၸႂ်ပၢင်လူင်ၼႆႉၽိူဝ်ႇလၢတ်ႈ တႃႉႁဵတ်း ၊ ဢမ်ႇၵျႃႉလိူဝ်မူႇပိူင်ပၢင်လူင်ၵေႃႈ ဢမ်ႇထုၵ်ႇလီယွမ်းလိူဝ်

ပေႃးယူႇတီႈႁဝ်းၶႃႈတႄႉ ၵဵဝ်ႇၵပ်းလူၺ်ႈ(ပြည်နယ်အခြေခံဉပဒေ) ၸိူဝ်းၼႆႉၵေႃႈ ၶဝ်လၢတ်ႈပႃးဝႃႈ လႆႈၸႂ်ၵၼ်ၸိူင်ႉႁိုဝ်၊ ၸိူင်ႉႁႃၼႆ။ လိူဝ်သေၼၼ်ႉ လွင်ႈသုၼ်ႇလႆႈၸတ်းသၢင်ႈႁၢင်ႈပွင်တူဝ်ၵဝ်ႇ(ကိုယ်ပိုင်ပြဌာန်းခွင့်) လႄႈ လွင်ႈၽၢတ်ႇဢွၵ်ႇ (ခွဲ ထွက်ရေး) ၸဵမ်ၵႂႃႇၸိူဝ်းၼႆႉ ၶဝ်ဝႃႈ ၶဝ်ၶၢမ်ႈပူၼ်ႉလႆႈယဝ်ႉၼႆ ႁဵတ်းႁိုဝ်လႄႈ ၶၢမ်ႈပူၼ်ႉၵႂႃႇ၊ လွင်ႈၼၼ်ႉ ႁဝ်းၶႃႈ ဢမ်ႇၸႅင်ႈလႅင်း။

ႁဵတ်းႁိုဝ်လႄႈလႆႈၸႂ်ၵၼ်ၵႂႃႇ ၶၢမ်ႈပူၼ်ႉၵႂႃႇ ၸိူဝ်းၼႆႉတႄႉ မၼ်းၵဵဝ်ႇၶွင်ႈၼႂ်းၸုမ်း PPST ဢၼ်မီး 10 ၸုမ်းၼၼ်ႉ၊ လွင်ႈၼၼ်ႉႁဝ်းၶႃႈၵေႃႈ တိုၵ်ႉဢၢမ်းယူႇ။ ႁဝ်းဢၢမ်းၼႆႉ ၵွပ်ႈပိူဝ်ႈ ႁဝ်းဢမ်ႇလႆႈ ႁၼ်ႁူဝ်ယွႆႈ (အသေးစိတ်) မၼ်း။

ၵွပ်ႈပိူဝ်ႈၼႆလႄႈ ႁဝ်းဝႃႈ တီႈဢၼ်ၶဝ်ၸဝ်ႈႁဵတ်းယူႇၸိူဝ်းၼႆႉတႄႉ မၼ်းပဵၼ်လၢႆးႁဵတ်း လၢႆးသၢင်ႈၵၢၼ်ပၢႆးမိူင်း။ ပွင်ႇဝႃႈ ဢဝ်ၵၢၼ်မိူင်းသေ တိုၵ်ႉၵႄႈလိတ်ႈၵၼ်ယူႇ၊ ဢၼ်ဝႃႈလႆႈၼၼ်ႉ ၶႅၼ်းသေပိုတ်းယိုဝ်းတိုၵ်းတေႃးၵၼ် ၼၼ်ႉၼႃႇ။ လွင်ႈၼႆႉမၼ်းပဵၼ် တႃႇတေသိုပ်ႇဢႃႇယု ၵၢၼ်ဢုပ်ႇဢူဝ်း ၼိူဝ်ၽိူၼ်၊ ၵဵဝ်ႇလူၺ်ႈၵၢၼ်ပၢႆးမိူင်း တႃႇတေသိုပ်ႇၵႂႃႇ လူင် ပွင်ၸိုင်ႈဢၼ်တေမႃးၼၼ်ႉ ပွင်ႇဝႃႈ ပၵ်းသင်ႉဝၢၼ်ႇၸိူဝ်ႉၽၼ်းမၼ်းဝႆႉတႃႇပီ 2021 ၵႂႃႇ ႁဝ်းႁၼ်ထိုင်ၸိူင်ႉၼၼ် လွင်ႈ ၼႆႉတႄႉ ႁဝ်းၶႃႈႁၼ်လီယူႇ။

ၵူၺ်းၵႃႈ လၢႆးႁဵတ်းလၢႆးသၢင်ႈ တၢင်းႁၼ်ထိုင်ၽႂ်မၼ်းတႄႉ မၼ်းဢမ်ႇမိူၼ်ၵၼ်၊ ပေႃးမိူၼ်ၵၼ်ၵေႃႈ မၼ်းတေႁဵတ်းႁိုဝ် လုၵ်ႉၽိုၼ်ႉၵၼ်မႃးၶၢဝ်းတၢင်း ႁႃႈႁူၵ်းၸဵတ်းသိပ်းပီမိူင်းလႃႇ။ ဢၼ်ၼႆႉတႄႉ ၽႂ်ၽိတ်းၽႂ်ထုၵ်ႇဢၼ်ဝႃႈၼၼ်ႉ ႁဝ်းၶႃႈ ဢမ်ႇပေႃး ၶႂ်ႈလၢတ်ႈ။ ႁဝ်းဝႃႈ လွင်ႈဢၼ်ဢဝ်ၵၢၼ်ပၢႆးမိူင်းသေ ဢုပ်ႇဢူဝ်းငူပ်ႉငီႉ ႁူပ်ႉထူပ်းတေႃႇၼႃႈၵၼ် တင်းလႆႈသေ ဢမ်ႇလႆႈသေ မၼ်းၶႅၼ်းသေဝႃႈ 2021 ၵႂႃႇၾၢႆႇပုၼ်ႉ။ ယၢမ်းလဵဝ်ၼႆႉ ဢမ်ႇလႆႈဝၢၼ်ႇၸိူဝ်ႉၽၼ်းမၼ်းဝႆႉ ပုၼ်ႈတႃႇပီ 2021 ၵႂႃႇၼၼ်ႉ ၸၢင်ႈတေပဵၼ်သိုၵ်းၼႂ်းမိူင်းၵႂၢင်ႈယႂ်ႇလိူဝ်ၼႆႉႁႃႉ ႁဝ်းၸၢင်ႈဝႃႈလႆႈ။

ပေႃးဝႃႈ ႁဵတ်းလႆႈၸိူင်ႉၼႆယဝ်ႉ မၼ်းပွင်ႇဝႃႈဝၢၼ်ႇၸိူဝ်ႉၽၼ်းမၼ်းဝႆႉ ၵၢၼ်ဢုပ်ႇဢူဝ်းၵဵဝ်ႇလူၺ်ႈၵၢၼ်ပၢႆးမိူင်း တႃႇၵႄႈလိတ်ႈပၼ်ႁႃၵၢၼ်မိူင်းမိူဝ်းၼႃႈၼႆ ႁဝ်းဝႃႈမၼ်းလီပိူင်ၼိုင်ႈ၊ လွင်ႈၼႆႉတႄႉ ႁဝ်းႁၼ်လီယူႇ ထုၵ်ႇလီႁဵတ်းယူႇ။

ၵၢၼ်မိူင်းမိူဝ်ႈလဵဝ်ၼႆႉ ၵွပ်ႈပိူဝ်ႈပႃႇတီႇပၢႆးမိူင်းႁဝ်းၶႃႈၵေႃႈမီး တပ်ႉသိုၵ်းႁဝ်းၶႃႈၵေႃႈမီး 2 တပ်ႉသိုၵ်း၊ ၶေႃႈယိူင်းဢၢၼ်း ႁဝ်းၶႃႈတႄႉ မၼ်းမိူၼ်ၵၼ်ယူႇ၊ ၵူၺ်းၵႃႈ ႁဝ်းပိူင်ႈၵၼ် လွင်ႈမႁႃႇပိဝ်ႁႃႇလႄႈ ၼီးပိဝ်ႇႁႃႇ၊ ပေႃးဢဝ်မႁႃႇပိဝ်ႇႁႃႇဝႃႈတႄႉ ၶဵင်ႈၵၼ်ၼၼ်ႉၼႃႇ။ ပေႃးဢဝ်ၼီးပိဝ်ႇႁႃႇဝႃႈတႄႉ မေႃလဵၼ်ႈဢူၼ်ႈဢူၼ်ႈဢွၼ်ႇဢွၼ်ႇၵႂႃႇလႆႈ။ ပေႃးဝႃႈလၢႆးမႁႃႇပိဝ်ႇႁႃႇ မိူၼ်ၸိူင်ႉၼင်ႇႁဝ်းၼႆႉ မၼ်းမေႃၵႂႃႇတိူၵ်ႈတၼ်သေ ဢမ်ႇၸၢင်ႈဢုပ်ႇၵၼ်လႆႈ။

ၵၢၼ်သိုၵ်းၵၢၼ်မိူင်း ဢၼ်ဢွၼ်ၵၼ်ႁဵတ်းမႃးတင်းမူတ်းတင်းသဵင်ႈၼႆႉ တၢင်းႁၼ်ထိုင်ႁဝ်းတႄႉ ႁဝ်းဢမ်ႇႁဵတ်းႁႂ်ႈမၼ်း ၶႅမ်ႉၵျႃႉလိူဝ်လိၵ်ႈႁူမ်ႈမၢႆပၢင်လူင် မူႇပၢင်လူင် ၼမ်ႉၸႂ်ပၢင်လူင်။ ၼမ်ႉၸႂ်ပၢင်လူင် လၢတ်ႈယူႇလၢႆလၢႆၵေႃႈ မၢင်ၸိူဝ်းဢမ်ႇ ႁဵတ်းလူး။ မိူဝ်ႈလဵဝ်ၼႆႉ ဢဝ်ႁဵတ်းၼမ်ႉၸႂ်မၼ်းၵူၺ်းၼႃႇ မူႇပၢင်လူင်ၼႆႉ မၼ်းဢမ်ႇၸွမ်းလူး။ ၵွပ်ႈပိူဝ်ႈၼႆလႄႈ ႁဝ်းဝႃႈ ႁဝ်းဢမ်ႇႁဵတ်းလႆႈႁႂ်ႈမၼ်းၵျႃႉလိူဝ်ၼၼ်ႉၵေႃႈ ႁဝ်းဢမ်ႇႁဵတ်းႁႂ်ႈမၼ်းယွမ်းလိူဝ်ၼၼ်ႉတႄႉ လီၵႂႃႈ ႁဝ်းႁၼ်ၶဝ်ၸဝ်ႈ ႁဵတ်းယူႇၸိူင်ႉၼၼ်ႉၵေႃႈ ဢဝ်ၵုင်ႇဢဝ်မုၼ်ယူႇ။

လွင်ႈငမ်းယဵၼ်ဢၼ်တႄႇပၢၼ်ဢူးတဵင်းၸဵင်ႇ ယိုၼ်းယၢဝ်းမႃးၼႆႉ လႆႈဝႃႈ ၵျႃႉၼႃႇ

တီႈပၢင်ၵုမ်လူင် 21 ၵမ်းထူၼ်ႈ 4 ၼၼ်ႉ ၸွမ်သိုၵ်းမိၼ်းဢွင်ႇလႅင်ႇ မွၵ်ႈလၢတ်ႈၶေႃႈၵႂၢမ်းၼၼ်ႉ မၼ်းဢမ်ႇပေႃးဢူၼ်ႈ ဢွၼ်ႇ ႁဝ်းတႄႉႁၼ်ထိုင်ၸိူင်ႉၼၼ်။

တၢင်းၾၢႆႇႁူဝ်သိူဝ်လၢတ်ႈၼၼ်ႉ ယူႇတီႈလုင်းႁဝ်းတႄႉ ဢမ်ႇပေႃးလႆႈၸႂ်၊ ဢမ်ႇပေႃးလႆႈၸႂ်ၸိူင်ႉႁိုဝ်ၼႆ ၼမ်ႉၸႂ်ႁၵ်ႉမိူင်း ႁူမ်ႈတုမ်ၼႆႉ ပဵၼ်ထီႉၼိုင်ႈ၊ ၼမ်ႉၸႂ်ႁၵ်ႉၸိူဝ်ႉၶိူဝ်းဢၼ်ဝႃႈ လူဝ်ႇဝႆႉထီႉသွင် ဢၼ်ဝႃႈၼၼ်ႉ မိူၼ်ဝႃႈ ႁဝ်းၶႃႈယွမ်းပၼ် ပိူၼ်ႈၵႂႃႇ၊ ပေႃးဝႃႈဢမ်ႇမီးၸႂ်ႁၵ်ႉၸိူဝ်ႉႁၵ်ႉၸၢတ်ႈၼႆ ၼမ်ႉၸႂ်ႁၵ်ႉမိူင်းႁူမ်ႈတုမ်ဢၼ်ဝႃႈၼၼ်ႉ မၼ်းဢမ်ႇမီး ဢမ်ႇၸႂ်ႈ ႁႃႉ။

လူဝ်ႇဝႆႉၼမ်ႉၸႂ်မိူင်းႁူမ်ႈတုမ်ထီႉၼိုင်ႈဢၼ်ဝႃႈၼၼ်ႉ သုၼ်ႇလႆႈသုၼ်ႇပဵၼ်ၸိူဝ်ႉၸၢတ်ႈဝၢၼ်ႈမိူင်းႁဝ်းတေယွမ်းၵႂႃႇၼႆ မၼ်းၵိုင်ႇလီပဵၼ်ယူႇႁႃႉ ဢၼ်ၼႆႉပဵၼ်ၵႂၢမ်းထၢမ်ဝႆႉၶေႃႈၼိုင်ႈ။

ဢမ်ႇလူဝ်ႇဝႃႈယဝ်ႉ ၸႂ်ႁၵ်ႉၸိူဝ်ႉၸၢတ်ႈလူဝ်ႇဝႆႉထီႉသွင်၊ ၸႂ်ႁၵ်ႉမိူင်းႁူမ်ႈတုမ်လူဝ်ႇဝႆႉထီႉၼိုင်ႈၼႆၼၼ်ႉ ဢၼ်ၼႆႉ ႁၢင်ႈ ၾၢင်မၼ်းဢမ်ႇပေႃးၶႅမ်ႉ။ ဢမ်ႇပေႃးၶႅမ်ႉၸိူင်ႉႁိုဝ်ၼႆ ၸႂ်ႁၵ်ႉၸိူဝ်ႉၸၢတ်ႈၼႆႉ ႁႂ်ႈဝႆႉယွမ်းၼႆ မၼ်းဢမ်ႇယွမ်းလႆႈလူး။ တေႃႈၼင်ႇမၢၼ်ႈၶဝ်ၼႆႉ ၶဝ်ယင်းႁၵ်ႉၸိူဝ်ႉၸၢတ်ႈၶဝ်ဢမ်ႇယွမ်းသေဢိတ်း ႁဝ်းသမ်ႉတေမႃးယွမ်းႁဵတ်းသင်။

ပေႃးဝႃႈ လူဝ်ႇႁၵ်ႉသိုင်ႇတိူင်းမိူင်းႁူမ်ႈတုမ်ၼႆၵေႃႈ လူဝ်ႇလႆႈသွၼ်လိၵ်ႈမၢၼ်ႈၵူၺ်းယဝ်ႉ၊ လိၵ်ႈတႆးႁဝ်းလူး ဢမ်ႇလႆႈသွၼ် ယဝ်ႉႁႃႉ။ ႁဝ်းႁၵ်ႉၸိူဝ်ႉၸၢတ်ႈ/ ၸိူဝ်ႉၶိူဝ်းႁဝ်း လိၵ်ႈတႆး၊ ၾိင်ႈငႄႈတႆး ႁဝ်းလူဝ်ႇႁဵတ်းၼႄ။ ၵႃႈပဵၼ်ဝႃႈ လူဝ်ႇဝႆႉၸႂ်ႁၵ်ႉ မိူင်းႁူမ်ႈတုမ်ၼႆ ႁဝ်းၵူၺ်းလူဝ်ႇၵႃႈၵႂႃႇၸွမ်းမၢၼ်ႈၶဝ်တိၵ်းတိၵ်းၵူၺ်းယဝ်ႉႁႃႉ။ တၢင်းၵႃႈတႆးႁဝ်းလူး ဢမ်ႇၵႃႈယဝ်ႉႁႃႉ၊ လွင်ႈၼႆႉတႄႉ လုင်းႁဝ်းဢမ်ႇလႆႈၸႂ်။

တေႃႇဢွင်ႇသၢၼ်းသူႉၵျီႇ မၼ်းလၢတ်ႈဝႃႈ တေၵႂႃႇမိူင်းၾႅတ်ႊၻရႄႊ ၵဝ်ၵေႃႈလူဝ်ႇယွမ်းဢိတ်းၼိုင်ႈ၊ မႂ်းၵေႃႈလူဝ်ႇယွမ်း ဢိတ်းၼိုင်ႈ ၵူၼ်းဢုပ်ႇဢူဝ်းၼိူဝ်ၽိူၼ်ၶဝ်ဝႃႈတႄႉ မၼ်းလူဝ်ႇႁဵတ်းၼႆၵူၺ်း၊ ဢၼ်ၼႆႉတႄႉ လၢတ်ႈၵႂႃႇထုၵ်ႇမႅၼ်ႈယူႇ ၵူၺ်းၵႃႈ မၼ်းၼၢင်း လၢတ်ႈဢူၼ်ႈဢွၼ်ႇသေမိူဝ်ႈဢွၼ်တၢင်းမႃးဢိတ်းၼိုင်ႈ။

ၵူၺ်းၵႃႈ ၸဝ်ႈယွတ်ႈသိုၵ်းတေလၢတ်ႈၵႂၢမ်းတႆးၼႆသမ်ႉ ဢမ်ႇပၼ်လၢတ်ႈၼႆ မၼ်းဢမ်ႇထုၵ်ႇလီပဵၼ်၊ မိူၼ်ဝႃႈ တဵၵ်းတဵင် ၵၼ်ၵူၺ်း ၼႆႉမၼ်းဢမ်ႇၵိုင်လီပဵၼ်။ ပိူင်တႅၵ်ႈမၼ်း တီႈမိူင်းသဝိတ်ႊသိူဝ်ႊလႅၼ်ႇၼၼ်ႉ ၶဝ်မီးၵူၼ်း 4 မဵဝ်း။ ၵျႃႊမၢၼ်ႊ မီး 75 %၊ ၾရင်ႇသဵတ်ႈမီး 20%၊ ဢီႊတလီႊမီး 4 %၊ လႅတ်ႇတိၼ်ႇသမ်ႉ 1% ဢမ်ႇမီး ၶဝ်ဢဝ်ၵႂၢမ်းတင်း 4 ၸၢဝ်းၶိူဝ်းၼႆႉ ပဵၼ်ၵႂၢမ်းၸႂ်ႉ ၼႂ်းလုမ်းမူတ်းၶႃႈ ။

ၵႂၢမ်းတႆးႁဝ်း ဢမ်ႇလႆႈလၢတ်ႈဢၼ်ဝႃႈၼႆႉ လူင်ပွင်ၸိုင်ႈၸႂ်ၵႅပ်ႈၼႃႇ။ လွင်ႈဢမ်ႇပၼ်လၢတ်ႈၵႂၢမ်းတႆးၼႆႉ ၽႂ်သမ်ႉလၢတ်ႈၼႄတႄႉ ႁဝ်းဢမ်ႇႁူႉ။ ၵူၺ်းၵႃႈ လွင်ႈဢမ်ႇပၼ်လၢတ်ႈၼႆႉ မၼ်းၸႂ်ၵႅပ်ႈႁၼ်ၵႅပ်ႈ၊ ပၼ်မၼ်း ၸဝ်ႈလၢတ်ႈၵႂႃႇလႄႈ မၼ်းၸဝ်ႈလၢတ်ႈၾၢႆႇတႆး၊ ၼႄလိၵ်ႈမၢၼ်ႈၵႂႃႇၵေႃႈလႆႈလူး ၽႂ်ၵေႃႈလူလႆႈၵူႈၵေႃႉယူႇၼႃႇ လိၵ်ႈ မၢၼ်ႈ၊ လွင်ႈၼႆႉ မၼ်းဢမ်ႇၵိုင်ႇလီပဵၼ်။

မိူဝ်ႈပူၼ်ႉမႃး 2011 လိူၼ်ဢေႃႊၵတ်ႉသ် 18 ဝၼ်းၼၼ်ႉ ဢူးတဵင်းၸဵင်ႇႁွင်ႉလွင်ႈငမ်းယဵၼ်ယဝ်ႉ၊ ဢၼ်ၼႆႉ ပေႃး ဢမ်ႇမီးတၢင်းႁတ်းႁၢၼ်တႄႉတႄႉဢမ်ႇပဵၼ်မႃး။ ပၢၼ်ဢူးၼေႇဝိၼ်းၵေႃႈ ဢမ်ႇပဵၼ်မႃးၸိူင်ႉၼႆ။ ဢူးတၢၼ်းသူၺ်ႇၵေႃႈ ဢမ်ႇပဵၼ်။ ပၢၼ်ဢူးတဵင်းၸဵင်ႇၼႆႉ ၸင်ႇပဵၼ်မႃး ပေႃးသွၼ်ႇတူၺ်း လွင်ႈငမ်းယဵၼ်ယိုၼ်းယၢဝ်းမႃးၼႆႉ  လႆႈဝႃႈၵျႃႉၼႃႇ။

မိူဝ်ႈပၢၼ်ဢူးၶိၼ်ႇၺုၼ်ႉၶဝ်ၼၼ်ႉ ဢဝ်ၶိူင်ႈၵွင်ႈလၢၵ်ႈၼၢၵ်ႈလႅၵ်ႈပဵၼ်ငမ်းယဵၼ် မၼ်းဢမ်ႇလႆႈလၢတ်ႈ ဢုပ်ႇဢူဝ်းပၢႆး မိူင်း၊ ဢဝ်ၵိုတ်းယိုဝ်းၵၼ်ၵူၺ်း ဢၼ်ၼၼ်ႉမၼ်းၸၼ်ႉတႅမ်ႇဢိူဝ်ႈ မၼ်းဢမ်ႇဢုပ်ႇဢူဝ်းလွင်ႈပၢႆးမိူင်း။ ဢၼ်ၼႆႉ ပေႃး ဝႃႈဝႆႉၸႂ်သိုဝ်ႈသိုဝ်ႈယူဝ်းယူဝ်း  ဢုပ်ႇဢူဝ်းၵၼ်ၼႆ မၼ်းတေပဵၼ်ၵႂႃႇၾႅတ်ႊၻရႄႊ။ ၸၢဝ်းၶိူဝ်းဢွၼ်ႇ ၸိူဝ်းၼႆႉၵေႃႈ မၼ်းတေပဵၼ်ၵႂႃႇၾႅတ်ႊၻရႄႊၵူၺ်းၼႃႇ ဢမ်ႇၸႂ်ႈႁႃႉ။

မိူင်းႁဝ်းၼႆႉ တေမီးပိူင်ငဝ်ႈပိုင်းမိူင်း(အခြေခံဉပဒေ) ႁင်းၵူၺ်း၊ ပေႃးဝႃႈႁဝ်းလႆႈၶိုင်ပွင်ႁင်းၵူၺ်းၼႆ တေပဵၼ် ဢၼ်ၶႅမ်ႉလႅပ်ႈၵႂႃႇ မိူင်းႁဝ်းတေၵတ်းယဵၼ်ၵႂႃႇ၊ သိုၵ်းသိူဝ်တေဢမ်ႇမီးယဝ်ႉ ပေႃးပဵၼ်ၾႅတ်ႊၻရႄႊ ဢၼ်ၸႅတ်ႈၸၢင်ႇၵႂႃႇ။

လွင်ႈဢၼ်ဝႃႈ လွင်ႈဢမ်ႇၽၢတ်ႇဢွၵ်ႇၼႆၼၼ်ႉ ၶဝ်ဢမ်ႇသႂ်ႇယဝ်ႉ ဢၼ်ၼႆႉၵေႃႈလႆႈဝႃႈ ဢူၼ်ႈဢွၼ်ႇမႃးယဝ်ႉ၊ ၶႅမ်ႉလႅပ်ႈယဝ်ႉ။ လွင်ႈတေ ဢမ်ႇလႆႈၽၢတ်ႇဢွၵ်ႇဢၼ်ဝႃႈၼၼ်ႉ ၶဝ်ဢမ်ႇၵမ်ဝႆႉယဝ်ႉ။ တီႈၼၼ်ႈတၢင်တႅၼ်းဝႃႈ ႁူမ်ႈႁွမ်းၵၼ် ႁဵတ်းသၢင်ႈၵႂႃႇ ၵတ်းၵတ်းယဵၼ်ယဵၼ် တီႈပွင်ႇမၼ်းတႄႉ ၶႂ်ႈဝႃႈၼင်ႇၼၼ်။

ဢၼ်ၸဝ်ႈယွတ်ႈသိုၵ်းမႃးၶိုၼ်ႈပၢင်ၵုမ်လူင်ၼႆႉတႄႉ တေလႆႈဝႃႈဢွင်ႇၵႂႃႇထႅင်ႈၶၵ်ႉၼိုင်ႈ/သၢင်ႉၼိုင်ႈယဝ်ႉ ဢၼ်ၼႆႉမၼ်း ပဵၼ် ႁၢင်ႈၾၢင်တႆး ႁဝ်းၶိုၼ်ႈမႃးယဝ်ႉ။