SSPP/SSA ၸတ်းႁဵတ်းပၢင်ၵႅဝ်ႈ ၶုၵ်းထူပ်းယုၵ်ႉယွင်ႈ ဝၼ်းၵိူတ်ႇပႃႇတီႇမႂ်ႇသုင်ၸိုင်ႈတႆး ၶွပ်ႈတဵမ် 49 ပီ တီႈငဝ်ႈငုၼ်းဝၢၼ်ႈႁႆး မီးၵူၼ်းသိုၵ်း၊ ၵူၼ်းမိူင်း ၶဝ်ႈႁူမ်ႈ ၼပ်ႉႁဵင်။

ဝၼ်းတီႈ 16/8/2020 ယၢမ်းၵၢင်ၼႂ် 07:00 မူင်း ထိုင် 08:40 မူင်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်း ၸိုင်းတႆး SSPP/SSA ၸတ်းႁဵတ်းပၢင်ၵႅဝ်ႈၶုၵ်းထူပ်းဝၼ်းၵိူတ်ႇ ၶွပ်ႈတဵမ် 49 ပီ တီႈငဝ်ႈငုၼ်းဝဵင်းမႂ်ႇ ဝၢၼ်ႈႁႆး ၸႄႈ ဝဵင်းၵေးသီး ၸိုင်ႈတႆးပွတ်းၸၢၼ်း မီးသင်ၶၸဝ်ႈ၊ ၽူႈယႂ်ႇၵူၼ်းလူင်လႄႈ ၵူၼ်းသိုၵ်း ၵူၼ်းမိူင်း ၶဝ်ႈႁူမ်ႈ 1500 ပၢႆ ၼႆယဝ်ႉ။

ၽူႈၼမ်းၼႃႈ SSPP ၸွမ်သိုၵ်းလူင် သိူဝ်ထႅၼ်ႈ မွၵ်ႇလၢတ်ႈၶေႃႈၵႂၢမ်းၼႂ်းပၢင်ၵႅဝ်ႈၼၼ်ႉဝႃႈ – “ ၼႂ်းတွၼ်ႈ လႂ်သေ ဢမ်ႇဝႃႈ ႁဝ်းဢဝ်ပႃႇတီႇဢွၼ်ႁူဝ်ၵႂႃႇၼႆၸိုင် ပႃႇတီႇႁဝ်းၵေႃႈတေမူၼ်းမႃး၊ တပ်ႉသိုၵ်းႁဝ်းၵေႃႈ တေမူၼ်းမႃး လၢႆးလုၵ်ႉၽိုၼ်ႉႁဝ်းၵေႃႈတေမူၼ်းမႃး ၵွပ်ႈၼၼ် ၵၢၼ်ပႃႇတီႇတပ်ႉသိုၵ်းႁဝ်းၼႆႉ လူဝ်ႇႁဵတ်း တႃႇသေႇ။ ပေႃးၸိူင်ႉၼၼ် ဢွင်ႇပွႆးဢၼ်ဝႃႈၼၼ်ႉ ႁဝ်းတေၸၢင်ႈလႆႈႁၼ်ယူႇ” – ဝႃႈၼႆ။

တီႈပၢင်ၵႅဝ်ႈ ဝၼ်းၵိူတ်ႇပႃႇတီႇမႂ်ႇသုင်ၸိုင်ႈတႆးၼၼ်ႉ လႆႈႁၼ်ၽူႈယႂ်ႇၵူၼ်းလူင် ၶဝ်ႈႁူမ်ႈလၢႆၸဝ်ႈ၊ ပႃးၸဵမ် ႁူဝ်ပဝ်ႈလူင် ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၸွမ်သိုၵ်းလူင် ပၢင်ၾႃႉၵေႃႈၶိုၼ်ႈႁွတ်ႈ ။

ၵူၼ်းၼုမ်ႇၼႂ်းဢိူင်ႇဝၢၼ်ႈဝႃႉ ၵေႃႉၼိုင်ႈလၢတ်ႈဝႃႈ – “ၸဝ်ႈႁူဝ်ပဝ်ႈလူင်ၵေႃႈၶိုၼ်ႈဢေႃႈ။ ဢမ်ႇႁၼ် လၢတ်ႈ ၵႂၢမ်းၶႃႈ၊ မီးၸဝ်ႈသိူဝ်ထႅၼ်ႈ ဢေႃႈ ႁၼ်မွၵ်ႇလၢတ်ႈၶေႃႈၵႂၢမ်း၊ ၸဝ်ႈႁၢၼ် ၽူင်းႁၢၼ် သမ်ႉ ဢၢၼ်ႇၽိုၼ်လိၵ်ႈ ပိုၼ်းပႃႇတီႇမႂ်ႇသုင်ၸိုင်ႈတႆး ၼၼ်ႉဢေႃႈ” – ဝႃႈၼႆ။

ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ၼႆႉ ၵေႃႇတင်ႈမႃး မိူဝ်ႈ 16/8/1971 မိူဝ်ႈလဵဝ် ၶွပ်ႈတဵမ် 49 ပီယဝ်ႉ။ ၵွပ်ႈပိူဝ်ႈယုမ်ႇယမ်ဝႃႈ တႃႇဢွၼ်ႁူဝ်တပ်ႉသိုၵ်းၼိုင်ႈဢၼ်ၼႆႉ တိုၼ်းလူဝ်ႇမီးပႃႇ တီႇဢွၼ်ႁူဝ် ၸင်ႇလႆႈၶွတ်ႇၽွတ်ႈမႃး ပႃႇတီႇမႂ်ႇသုင်ၸိုင်ႈတႆး ၼႆယဝ်ႉ။

ၸၢႆးၸၢမ်ႇမိူင်း ၽူႈတႅၼ်းၽွင်း သၽႃး ၸႄႈမိူင်း ၶဵတ်ႇလိူၵ်ႈတင်ႈမၢႆ 1 ၸႄႈဝဵင်းၵေးသီးဝႃႈ – “ ပၢင်ၵႅဝ်ႈ ၼႆႉ ၶႃႈ ႁဝ်းတႄႉ ဢမ်ႇလႆႈၵႂႃႇၶဝ်ႈႁူမ်ႈၶႃႈ။ လႆႈငိၼ်းဝႃႈ ဢမ်ႇပေႃးႁဵတ်းယႂ်ႇ၊ ၸတ်းႁဵတ်းၵႂႃႇပွတ်းၼႂ် ၵူၺ်း ၼႆၶႃႈဢေႃႈ” – ဝႃႈၼႆ။

ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ၼႆႉ တႄႇၵိုတ်းသိုၵ်း မိူဝ်ႈပီ 1989 ၊ ၾၢႆႇလူင်ပွင်ၸိုင်ႈသိုၵ်း မၢၼ်ႈ တမ်းပၼ်ၼႃႈလိၼ်ၶိုၵ်ႉတွၼ်းမၢႆ 3 ၊ ထိုင်မႃး ပီ 2009 ၾၢႆႇလူင်ပွင်ၸိုင်ႈသိုၵ်းမၢၼ်ႈ မိပ်ႇဢီး ၸႂ်ႉႁႂ်ႈႁဵတ်းတပ်ႉ ပျီႇတူႉၸိတ်ႉ၊ ငဝ်ႈငုၼ်းသႅင်ၵႅဝ်ႉ ၊ တပ်ႉၸုမ်း 3 မိူင်းၶိူဝ်း၊ တပ်ႉၸုမ်း 7 ၵႃလီႉ ၽွမ်ႉႁဵတ်းပျီႇတူႉၸိတ်ႉ ၵႂႃႇသေတႃႉ တပ်ႉၸုမ်း 1 ဢၼ် ၸဝ်ႈပၢင်ႇၾႃႉဢွၼ်ႁူဝ် ဢမ်ႇယွမ်းၽွမ်ႉၸွမ်း၊ ၼႂ်းပီ 2010 လိူၼ်ဢေႊပရိူဝ်ႊ 25 ဝၼ်း ၸင်ႇယုၵ်ႉဢဝ် ဝၢၼ်ႈႁႆးပဵၼ်ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး၊ တူဝ် ၸဝ်ႈပၢင်ႇၾႃႉၵေႃႈ ထုၵ်ႇယုၵ်ႉပဵၼ်ႁူဝ်ပဝ်ႈ သေပိုတ်ႇပိုၼ်းၼႃႈလိၵ်ႈမႂ်ႇ မႃးတေႃႇထိုင်ဝၼ်းမိူဝ်ႈၼႆႉ မီးမႃး 10 ပီ။

ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး (SSPP/SSA) ၼႆႉ ပဵၼ်ၸုမ်းဢၼ်လူင်းလၢႆးဢဝ်ငမ်းယဵၼ် ၸၼ်ႉမိူင်းႁူမ်ႈတုမ်ဝႆႉ၊ ၵူၺ်းၵႃႈ ပႆႇလႆႈလူင်းလၢႆးမိုဝ်း ၵိုတ်းတိုၵ်းတူဝ်ႈမိူင်း NCA ။ ဢိင်ၼိူဝ်ၸုမ်းဢူၺ်း လီပွတ်းႁွင်ႇ FPNCC ဢမ်ႇၶဝ်ႈႁူမ်ႈသေ ပၢင်ၵုမ်လူင်ပၢင်လူင် ႁူဝ်ပၢၵ်ႇပီ 21 ပွၵ်ႈၵမ်းထူၼ်ႈ 4 ဢၼ် လူင်ပွင်ၸိုင်ႈ ၸတ်းႁဵတ်း 19-21/08/2020 ၼႂ်းသွင်သၢမ်ဝၼ်းတၢင်းၼႃႈၼႆႉ ယူႇတီႈ SSPP/SSA ၵေႃႈ တေဢမ်ႇ ၶဝ်ႈႁူမ်ႈၸွမ်း။