Friday, March 29, 2024

တူဝ်ႈလူၵ်ႈ ၸပ်းတၢင်းပဵၼ်ၶူဝ်ႊဝိတ်ႉထိုင် 15 လၢၼ်ႉပၢႆ လူႉတၢႆ 6 သႅၼ်ပၢႆ

Must read

ယၢမ်းလဵဝ်ၼႆႉ တူဝ်ႈလူၵ်ႈ/လုမ်ႈၾႃႉ မီးၸၢဝ်းလူၵ်ႈ ၸပ်းတၢင်းပဵၼ်ၶူဝ်ႊဝိတ်ႉ 19 တင်းမူတ်းထိုင် 15 လၢၼ်ႉၵေႃႉပၢႆ၊ လူႉတၢႆၵႂႃႇယဝ်ႉ ႁူၵ်းသႅၼ်ပၢႆ။

Photo:by sanook.com ၸွမ်ၸိုင်ႈၻူဝ်ႊၼေႃႊ ထရမ်ႉ ၽူႈၼမ်းဢမေႊရိၵႃႊ တင်းၸုမ်းၸိူဝ်း သႂ်ႇၽႃႈတူမ်းပၢၵ်ႇ Mask

မိူဝ်ႈၼႆႉဝၼ်းတီႈ 22/07/2020 ၶၢဝ်းယၢမ်း 07:50 မူင်း မိူင်းထႆး (မွၵ်ႈယၢမ်း 07:20 မူင်း မိူင်းႁူမ်ႈတုမ်မျႅၼ်ႇမႃႇ) ၼၼ်ႉ ယူႇတီႈဝႅပ်ႊသၢႆႊ Worldometers ႁၢႆးငၢၼ်းလွင်ႈငဝ်းလၢႆး ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ဝႃႈ- ၵူတ်ႇထတ်းႁူပ်ႉႁၼ်ၵူၼ်းၸပ်းၸိူဝ်ႉမႅင်း တူဝ်ႈလူၵ်ႈယဝ်ႉ 215 ၸိုင်ႈမိူင်း၊ ၵူၼ်းၸပ်းတၢင်းပဵၼ်မီး 15,084,374 ၵေႃႉ၊ တိူဝ်းၼမ်ၶိုၼ်ႈ 238,524 ၵေႃႉ၊ လူႉတၢႆၵႂႃႇယဝ်ႉႁူမ်ႈ 618,746 ၵေႃႉ၊ လူႉတၢႆၽိူမ်ႉတိူဝ်းထႅင်ႈ 5,660 ၵေႃႉ၊ ယူတ်းယႃႁၢႆၶႅၼ်းယဝ်ႉ 9,103,974 ၵေႃႉ-ၼႆယဝ်ႉ။

- Subscription -

မိူင်း 10 ၸိုင်ႈမိူင်း ဢၼ်မီးၵူၼ်းၸပ်းၸိူဝ်ႉမႅင်းၼမ်သုတ်း ၼႂ်းလူၵ်ႈၼႆႉ 1.မိူင်းဢမေႊရိၵႃႊ။ 2.မိူင်းပရႃႊၸီႊ။ 3.မိူင်းဢိၼ်ႊၻီႊယိူဝ်ႊ။ 4.မိူင်းရတ်ႉသျိူဝ်ႊ။ 5.ဢပ်ႊၾရိၵႃႊတႂ်ႈ။ 6.မိူင်းပေႊရူႊ။ 7.မိူင်းမႅၵ်ႉသီႊၵူဝ်ႊ။ 8.မိူင်းၶျိလီႊ။ 9.မိူင်းသပဵၼ်ႊ။ 10.မိူင်းဢိင်ႇၵလၢၼ်ႇ။

Photo:by sanook.com လိၵ်ႈၶေႃႈသပ်းလႅင်း ၸွမ်ၸိုင်ႈၻူဝ်ႊၼေႃႊ ထရမ်ႉ ၼိူဝ်ထဝိတ်ႊတိူဝ်ႊ သုၼ်ႇတူဝ်မၼ်းၸဝ်ႈ

မိူဝ်ႈဝၼ်းတီႈ 20/07/2020 ပူၼ်ႉမႃးၼႆႉ ၸွမ်ၸိုင်ႈၻူဝ်ႊၼေႃႊ ထရမ်ႉ ၽူႈၼမ်းဢမေႊရိၵႃႊၵေႃႈ တၢင်ႇၶႅပ်းႁၢင်ႈမၼ်းၸဝ်ႈ ဢၼ်သႂ်ႇၽႃႈတူမ်းပၢၵ်ႇ ၼိူဝ်ထဝိတ်ႊတိူဝ်ႊ သုၼ်ႇတူဝ်မၼ်းၸဝ်ႈ။  တႅမ်ႈလိၵ်ႈသပ်းလႅင်းဝႃႈ- “ႁဝ်းႁူမ်ႈပဵၼ်ၼမ်ႉၼိုင်ႈၸႂ်လဵဝ်ၵၼ် ပိူဝ်ႈတႃႇဢဝ်ဢွင်ႇပေႉၼိူဝ် ၸိူဝ်ႉမႅင်းၶႄႇ ဢၼ်ဢဝ်တႃတူၺ်းဢမ်ႇႁၼ်၊ လၢႆၵေႃႉလၢတ်ႈဝႃႈ ၵၢၼ်သႂ်ႇၽႃႈတူမ်းပၢၵ်ႇ မိူဝ်ႈဢမ်ႇၸၢင်ႈယူႇႁၢင်ႇၵႆ တင်းပိူၼ်ႈတၢင်ႇၵေႃႉ ၼႂ်းတူင်ႇဝူင်းၵူၼ်းၼၼ်ႉ ပဵၼ်ၵၢၼ်ႁဵတ်းပိူဝ်ႈတႃႇ ၸိူဝ်ႉၸၢတ်ႈ။ ဢမ်ႇမီးၽႂ်ႁၵ်ႉၸၢတ်ႈလိူဝ်သေၵဝ်ၶႃႈ”- ဝႃႈၼႆ။

ယၢမ်းဝၢႆးဝၼ်းမိူဝ်ႈၼႆႉ (22/07/2020) တူဝ်ႈလူၵ်ႈ မီးၵူၼ်းၸပ်းၸိူဝ်ႉမႅင်း တၢင်းပဵၼ်ယဝ်ႉ 15,148,116 ၵေႃႉ၊ တိုၵ်ႉယူတ်းယႃတူဝ်ဝႆႉ 5,362,254 ၵေႃႉ၊ လူႉတၢႆယဝ်ႉ 620,032 ၵေႃႉ၊ ယူတ်းယႃႁၢႆၶႅၼ်းယဝ်ႉ 9,134,209 ၵေႃႉ။

ၼႂ်းၸိုင်ႈမိူင်းႁူမ်ႈတုမ်မျႅၼ်ႇမႃႇသမ်ႉ ၵူၼ်းၸပ်းၸိူဝ်ႉမႅင်းတၢင်းပဵၼ်မီး 341 ၵေႃႉ၊ တိုၵ်ႉယူတ်းယႃ တူဝ်ဝႆႉ 55 ၵေႃႉ၊ လူႉတၢႆယဝ်ႉ 6 ၵေႃႉ၊ ယူတ်းယႃႁၢႆၶႅၼ်းယဝ်ႉ 280 ၵေႃႉ-ၼႆယဝ်ႉ။

ဢိင်ၶေႃႈမုလ်းၶၢဝ်ႇထႆး www.sanook.com

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း