ၵူၼ်းပၢႆႈၽေးသိုၵ်း ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ယဵပ်ႇၺႃးမၢၵ်ႇ ႁိမ်းဝၢၼ်ႈၼမ်ႉမင်းသေ ဢွၼ်ႇယိင်းၵေႃႉၼိုင်ႈ တၢႆထင်တီႈ ထဝ်ႈၸၢႆးၵေႃႉၼိုင်ႈ မၢတ်ႇၸဵပ်းတီႈၶႅၼ်  ။

 ဝၼ်းတီႈ 25/10/2025   ဝၼ်းသဝ် ဝၢႆးဝၼ်း 1 မူင်းပၢႆ ထဝ်ႈၸၢႆးၵေႃႉၼိုင်ႈလႄႈ ဢွၼ်ႇယိင်းၵေႃႉၼိုင်ႈ ၽွင်းၵႂႃႇဢဝ်ၶူဝ်းၶွင် တီႈထဵင်ၼႂ်းႁႆႈ ႁိမ်းဝၢၼ်ႈၼမ်ႉမင်းၼၼ်ႉ ၽႃႇၺႃးမၢၵ်ႇ ဢၼ်ႁၢင်ႈၵၢင်ဝႆႉႁိမ်းတၢင်းသေ လႆႈမၢတ်ႇၸဵပ်းလူႉတၢႆ ဝႃႈၼႆ။

ၵူၼ်းၼုမ်ႇၼႂ်းပိုၼ်ႉတီႈၵေႃႉၼိုင်ႈ လၢတ်ႈတီႈ ၽူႈတွႆႇႁွၵ်ႈဝႃႈ – ‘’ၶဝ်ဢၢင်ႈၵႂႃႇဢဝ်ၶူဝ်းၶွင် တီႈထဵင်ၼႂ်းႁႆႈ 11 လၵ်းသေ ယဵပ်ႇၺႃးဢေႃႈ။ မိူဝ်ႈထဝ်ႈၸၢႆး လူင်းၵႂႃႇတီႈထဵင်သေ ဢဝ်ၶူဝ်းဢဝ်ၶဝ်ႈယူႇၼၼ်ႉ လုၵ်ႈဢွၼ်ႇ ၵႂႃႇၽႃႇၺႃးမၢၵ်ႇ ႁိမ်းတၢင်း၊ ၵူၼ်းထဝ်ႈၼၼ်ႉ ဢၢၼ်းတေမႃးၸွႆႈလုၵ်ႈဢွၼ်ႇ မႃးၽႃႇၺႃးမၢၵ်ႇထႅင်ႈ။ မၢၵ်ႇတႅၵ်ႇသွင်လုၵ်ႈဢေႃႈ။ လုၵ်ႈဢွၼ်ႇ တိူဝ်ႉတီႈၵွၵ်းႁူဝ်သေ တၢႆၵမ်းလဵဝ်။ ၵူၼ်းထဝ်ႈၼၼ်ႉတႄႉ တိူဝ်ႉတီႈၶႅၼ်ၵူၺ်း’’ ဝႃႈၼႆ။

ဝၢၼ်ႈၼမ်ႉမင်းၼႆႉ မီးၼႂ်းၵႄႈ ဝဵင်းၵျွၵ်ႉမႄး တင်း ဝဵင်းမိူင်းငေႃႉ ယၢၼ်ၵႆဝဵင်းၵျွၵ်ႉမႄး မွၵ်ႈ 12 လၵ်း။ မိူဝ်ႈဝၼ်းတီႈ 18/10/2025 ပူၼ်ႉမႃးၼႆႉ ႁိူဝ်းမိၼ်သိုၵ်းမၢၼ်ႈပွႆႇမၢၵ်ႇသႂ်ႇ တီႈၵျွင်း/ဝတ်ႉ ဝၢၼ်ႈၼမ်ႉမင်း သင်ၶၸဝ်ႈ တူၼ်ၼိုင်ႈ မၢတ်ႇၸဵပ်းႁၢဝ်ႈႁႅင်း။

မိူဝ်ႈဝၼ်းတီႈ 8/10/2025 ၼၼ်ႉၵေႃႈ ႁိူဝ်းမိၼ်သိုၵ်းမၢၼ်ႈပွႆႇမၢၵ်ႇသႂ်ႇ ဝၢၼ်ႈၼမ်ႉမင်း တႅၵ်ႇတိူဝ်ႉၶူဝ် ဢၼ်မီးဢႃယု 100 ပီပၢႆၼၼ်ႉလူႉၵွႆ ႁဵတ်းႁႂ်ႈၵူၼ်းမိူင်းၵႂႃႇမႃးၵပ်းသိုပ်ႇသိုဝ်ႇသၢၼ်ၵၼ်ယၢပ်ႇၽိုတ်ႇ။

ဝၢႆးတပ်ႉသိုၵ်းမၢၼ်ႈ ယိုတ်းၵုမ်းလႆႈၶိုၼ်းဝဵင်းၵျွၵ်ႉမႄး သၢႆသိုၵ်းတဢၢင်း (TNLA) ၵမ်ႈၽွင်ႈ ထွႆဢွၵ်ႇၵႂႃႇၸွမ်းသဵၼ်ႈတၢင်း ၵျွၵ်ႉမႄး – မိူင်းငေႃႉ။ ယွၼ်ႉၼၼ် ၵူၼ်းမိူင်းၸိူဝ်းယူႇၸွမ်းသၢႆတၢင်းၼၼ်ႉ လႆႈဢွၼ်ၵၼ်ငိူင်ႉပၢႆႈဢွၵ်ႇႁိူၼ်းယေးသေ ၵႂႃႇယူႇသဝ်းဝႆႉ ၼႂ်းသူၼ်ၼႂ်းႁႆႈ၊ တေႃႇထိုင်ယၢမ်းလဵဝ် ပႆႇႁတ်းပွၵ်ႈမိူဝ်းယူႇႁိူၼ်းၶိုၼ်း။ 

မၢၵ်ႇမႅင်းၾင်လိၼ်ၼႆႉမၼ်းဢမ်ႇမီးဝႃႈ မူတ်းဢႃယု။ ၾင်ဝႆႉႁၢင်ႈဝႆႉႁိုင်ၵေႃႈႁိုဝ်ၵေႃႈယဝ်ႉ သင်မီးဢၼ်ၵႂႃႇယဵပ်ႇသႂ်ႇၵေႃႈတိုၼ်းတႅၵ်ႇလႆႈ။ သင်ဝႃႈဢမ်ႇမီးဢၼ်ၵႂႃႇယဵပ်ႇသႂ်ႇလႃးလႃးသေ ႁေႃလူမ်းႁေႃလႅတ်ႇႁေႃၾူၼ်ၵႂႃႇယဝ်ႉသေတႃႉၵေႃႈဢမ်ႇၸၢင်ႈဝၢင်းၸႂ်လႆႈ။ၸၢင်ႈတႅၵ်ႇသႂ်ႇၵူၼ်း၊ တူဝ်သတ်းတတ်းမႅင်း၊ ဢမ်ႇလူႉတၢႆၵေႃႈ တူဝ်ၶိင်းဢၢင်ႇၵႃႇလူႉသုမ်း။

ပေႃးတေလႆႈၵႂႃႇၼႂ်းသူၼ်ၼႂ်းႁႆႈ ၊ ၼႂ်းယုမ်းၸိူဝ်းၼႆႉၼႆၸိုင် ႁႂ်ႈၾၢင်ႉသတိၵိုၵ်းတူဝ်ဝႆႉတႃႇသေႇ။ ပေႃး ထၢင်ႇထိူမ်ဝႃႈ မီးမၢၵ်ႇမႅင်းၼႆၸိုင်ႇ ယႃႇပေၵႂႃႇၸမ် ၊ ၵႂႃႇတိူဝ်ႉ ၊ ၵႂႃႇယႃႉ ၊ ယႃႇဢဝ်မႆႉၶႄႇ ယႃႇၵႂႃႇတိူဝ်ႉ တွႆႇလႃးလႃး။ ပွႆႇတူဝ်သတ်း မိူၼ်ၼင်ႇ ( မႃ ၊ မႅဝ်း ) ၵႂႃႇၼူမ်ၵႂႃႇတူၺ်းၵေႃႈ ဢမ်ႇၵိုင်ႇလီႁဵတ်း။ တင်းၵူၼ်းတင်းသတ်း တေလႆႈၶတ်းၸႂ်ယဵပ်ႇၶိုၼ်းႁွႆးတိၼ်ၵဝ်ႇသေထွႆလင်သုတ်ႉဢွၵ်ႇႁၢင်ႇယၢၼ်မႃးၵႆၵႆ မွၵ်ႈ 1 ဝႃး ။

တႃႇတေပၼ်ၾၢင်ႉၵူၼ်းၸိူဝ်းတေလတ်းၽၢၼ်ႇၵႂႃႇမႃး ႁႂ်ႈပေႃးႁူႉဝႃႈ မီးၽေးမၢၵ်ႇမႅင်းၼၼ်ႉ ႁႂ်ႈႁဵတ်း မိၵ်ႈမၢႆဝႆႉသေဢၼ်ဢၼ်မိူၼ်ၼင်ႇ ပၵ်းလၵ်းႁဵတ်းၶႂၢႆႇၶႃပႄဝႆႉ။ ဢမ်ႇၼၼ် တႅမ်ႈလိၵ်ႈပၼ်ၾၢင်ႉ ဝႆႉသေ ၼႅတ်ႈၵႂႃႇသေႃႇၵႂႃႇလၢတ်ႈၵၢင်ႉၵႄႇလႄႈ ၽူႈမီးပုၼ်ႈၽွၼ်းၾၢႆႇႁူမ်ႇလူမ်ႈ၊ ၵူၼ်းၼႂ်းဝၢၼ်ႈ -ယႃႇႁႂ်ႈၸႂ်ႉသဵၼ်ႈတၢင်းဢၼ်မီးၽေးမၢၵ်ႇမႅင်းၼၼ်ႉ ။