မိူဝ်ႈၼႆႉဝၼ်းတီႈ 8/11/2025 ယၢမ်းၵၢင်ၼႂ်ၸဝ်ႉ မီးၵူၼ်းလၵ်ႉၶဝ်ႈႁိူၼ်းၼၢင်းယိင်းဢၼ်ယူႇဝႆႉၵေႃႉလဵဝ်တီႈဝဵင်းၵျွၵ်ႉမႄး ႁဵတ်းႁၢႆႉၶႃႈတၢႆထင်တီႈဝႆႉသေဢဝ်ၶူဝ်းၶွင်ငိုၼ်းၶမ်းၸဝ်ႈ ႁိူၼ်းၵႂႃႇ ။

ၵေႃႉၺႃးၶႃႈတၢႆၵႂႃႇၼၼ်ႉ ၸိုဝ်ႈႁွင်ႉ ၼၢင်းမျႃႉဢွင်ႇ ဢႃႇယု 50 ပၢႆ ယူႇပွၵ်ႉ 7 ( ၂ မိုင်ကုန်း- 2 လၵ်း) ။ တီႈတူဝ်မၼ်းၼၢင်းမီးႁွႆးမၢတ်ႇၸဵပ်း လႄႈလိူတ်ႈဢွၵ်ႇဝႆႉလၢႆလၢႆတီႈၼႆၼုမ်ႇ ၸၢႆးၵေႃႉၵႂႃႇၸွႆႈဢဝ်တူဝ်တၢႆ မၼ်းၼၢင်းပႅတ်ႈၼၼ်ႉ လၢတ်ႈၼႄတီႈ ၽူႈတွႆႇႁွၵ်ႈၼင်ႇၼႆ။

“ႁဝ်းၶႃႈၵႂႃႇႁၼ်တူဝ်တၢႆမၼ်းၼၢင်းၼႆႉ ပဵၼ်ၶၢဝ်းၵၢင်ၼႂ်ၸဝ်ႉၶႃႈဢေႃႈ။ မၼ်းတၢႆဝႆႉၾၢႆႇၼႃႈၽၵ်းတူ တီႈႁွင်ႈၼွၼ်း မၼ်းသေ တီႈၶေႃးမၼ်းၼၢင်းၼၼ်ႉ မီးႁွႆးမိုဝ်း မိပ်ႇငႅၼ်းဝႆႉ။ ၵွၵ်းႁူဝ်ၾၢႆႇသၢႆႉၵေႃႈ မူပ်ႇဝႆႉ မီးလိူတ်ႈဢွၵ်ႇဝႆႉတီႈၵွၵ်းႁူဝ် လႄႈ ၶူႈၼင်မၼ်း။ ၾၢႆႇၼိူဝ်ၶူၼ်တႃ ၾၢႆႇသၢႆႉမၼ်းၵေႃႈ မီးႁွႆးမၢတ်ႇဝႆႉမွၵ်ႈ 1 ၼိဝ်ႉၼႆႉဢေႃႈ။ သၢႆၶေႃး 1 သဵၼ်ႈ လႄႈ ၸွပ်ႇမိုဝ်း 2 ဝူင်း ဢၼ် ယၢမ်ႈၸပ်းတူဝ်မၼ်းၼၼ်ႉၵေႃႈ ႁၢႆၵႂႃႇ ၼႆၶႃႈဢေႃႈ။”

မၼ်းၼၢင်းပဵၼ်ၵူၼ်းၵေႃႉလဵဝ် ယၢမ်ႈလုၵ်ႉလွင်းသွမ်းၶၢဝ်းၵၢင်ၼႂ်ၸဝ်ႉ ၵူႈၼႂ်။ ထိုင်မႃးမိူဝ်ႈၼႆႉ ယၢမ်းၵၢင်ၼႂ်ၸဝ်ႉၼႆႉ ၵူၼ်းႁိမ်းႁိူၼ်းဢမ်ႇႁၼ်မၼ်းၼၢင်းဢွၵ်ႇလွင်းသွမ်းလႄႈ ၸင်ႇမိူဝ်းႁွင်ႉႁႃသေ ထူပ်းႁၼ်တူဝ်တၢႆမၼ်း ဝႃႈၼႆ။

ၽွင်းသိုၵ်းမၢၼ်ႈ တင်း သိုၵ်းတဢၢင်း ပဵၼ်ပၢင်တိုၵ်းၵၼ် ၼႂ်းၸႄႈဝဵင်းၵျွၵ်ႉမႄးၼၼ်ႉ ၼၢင်းမျႃႉဢွင်ႇ ပၢႆႈၽေးပၢင်တိုၵ်း ၵႂႃႇသွၼ်ႈယူႇဝႆႉတၢင်းၸႄႈဝဵင်းတႃႈၶီႈလဵၵ်း မိူင်းတႆးပွတ်း ဢွၵ်ႇသေ ၸင်ႇတိုၵ်ႉပွၵ်ႈမိူဝ်းယူႇၶိုၼ်းတီႈႁိူၼ်း ဝၢႆးလင်သိုၵ်းမၢၼ်ႈ ၶဝ်ႈၵုမ်းၶိုၼ်းဝဵင်းၵျွၵ်ႉမႄး ၼႆႉၵူၺ်း ၵူၼ်းၼႂ်းပွၵ်ႉလၢတ်ႈၼင်ႇၼႆ။

မိူဝ်ႈၸုမ်းၸွႆႈထႅမ် ၵၢၼ်တူင်ႇဝူင်းၵူၼ်း ၵႂႃႇၵဵပ်းဢဝ်တူဝ်တၢႆမၼ်းၼၢင်းဢွၵ်ႇႁိူၼ်း ယၢမ်းၵၢင်ၼႂ်ၸဝ်ႉ 8 မူင်းပၢႆၼၼ်ႉ တူဝ်တၢႆမၼ်းၼၢင်းတိုၵ်ႉဢူၼ်ႈသေငေႃးတိၼ်ငေႃးမိုဝ်းတိုၵ်ႉလႆႈယူႇ။ လိူတ်ႈဢၼ်ဢွၵ်ႇဝႆႉၼၼ်ႉၵေႃႈ ပႆႇတၼ်းၵၢမ်ႈၼႆလႄႈ လၢမ်းၶၢတ်ႈဝႃႈ မၼ်းၼၢင်းၺႃးၶႃႈတၢႆၽွင်းၵၢင်ၼႂ်ၸဝ်ႉမိူင်းပႆႇလႅင်းၼႆႉၵူၺ်းၼႆ ၼုမ်ႇၸၢႆးၵေႃႉႁၼ်တူဝ်တၢႆၼၢင်း မျႃႉဢွင်ႇ ယိုၼ်ယၼ်လၢတ်ႈၼႄဝႆႉၼင်ႇၼႆ။