ၵူၼ်းတူၵ်းၶွၵ်ႈၸိူဝ်းလုၵ်ႉမိူင်းၶႄႇပွၵ်ႈမႃးမီးတီႈဝဵင်းၼမ်ႉသၼ်ႇ ၸိုင်ႇတႆးပွတ်းႁွင်ႇၼၼ်ႉ ယၢပ်ႇၽိုတ်ႇၶဝ်ႈၼမ်ႉတၢင်းၵိၼ်။
ၵူၼ်းၼမ်ႉသၼ်ႇ ၸိူဝ်းလုၵ်ႉမိူင်းၶႄႇသေပွၵ်ႈမႃး ၵုမ်းတူဝ်ဝႆႉတီႈဝဵင်းၼမ်ႉသၼ်ႇ ၼႃႈလိၼ်ၽွင်းငမ်းတူဝ်ၵဝ်ႇ တဢၢင်း ပလွင်ႈ မီးယူႇ 51 ၵေႃႉ။
ဢူးၵျႃးတီႇ ႁူဝ်ပဝ်ႈၸုမ်းၶႂၢႆႇၶႃပႄလႅင် ၸႄႈဝဵင်းၼမ်ႉသၼ်ႇ ဢၼ်ပၼ်တၢင်းၸွႆႈထႅမ်ၵူၼ်းပွၵ်ႈမိူင်း ၸိူဝ်းၼၼ်ႉလၢတ်ႈဝႃႈ -“ ၸိူဝ်းၶဝ် လူဝ်ႇၶဝ်ႈၼမ်ႉတၢင်းၵိၼ်ဢေႃႈယၢမ်းလဵဝ်။ ၵွပ်ႈဝႃႈ ၵၵ်းၶင်တူဝ်ဝႆႉတီႈၼမ်ႉသၼ်ႇၼႆႉ ၸိူဝ်းၶဝ်လႆႈၸူၵ်းထွင်းၸဝ်ႈၵဝ်ႇသေ ပၼ်ၵႃႈၵိၼ်ၵႃႈယူႇ ၼိုင်ႈၵေႃႉ ၼိုင်ႈဝၼ်း 3000 ပျႃး။ ၾၢႆႇႁဝ်းၶႃႈၵေႃႈ လႆႈၸွႆႈပၼ်ၼိုင်ႈၵေႃႉ ၼိုင်ႈဝၼ်း 3000 ပျႃးမိူၼ်ၵၼ်။ ႁဝ်းၶႃႈဢမ်ႇလႆႈငိုၼ်းၵမ်ႉၸွႆႈတီႈလူင်ပွင်ၸိုင်ႈလူး။ ၵွပ်ႈၼႆ တႃႇသိုပ်ႇၵၵ်းၶင်တူဝ်ၶဝ် တႃႇလဵင်ႉလူၶဝ် ဢမ်ႇပေႃးၶႂ်ႈၵုမ်ႇယဝ်ႉၶႃႈဢေႃႈ။ ”- ဝႃႈၼႆ။
ၵူၼ်းပွၵ်ႈမိူင်းၶႄႇမႃး မိူဝ်ႈဝၼ်းတီႈ 7 ၼၼ်ႉတင်းမူတ်းမီး 241 ၵေႃႉ။ ၼႂ်းၼၼ်ႉပႃးၵူၼ်းၼမ်ႉသၼ်ႇ 51 ၵေႃႉ။ ပဵၼ်ၽူႈၸၢႆး 32 ၵေႃႉ ၵုမ်းတူဝ်ဝႆႉတီႈ ႁူင်းႁဵၼ်းႁုၼ်ႈမုၼ်းလႅၼ်လိၼ်၊ ၼၢင်းယိင်းသမ်ႉ 19 ၵေႃႉသမ်ႉၵုမ်းတူဝ်ဝႆႉတီႈ ႁူင်းႁဵၼ်းႁုၼ်ႈမုၼ်းငဝ်ႈတိုၼ်းၵူၼ်း။
ၵူၼ်းၸိူဝ်းမီးတၢင်းပဵၼ်သေ ယႅၵ်ႈၵုမ်းတူဝ်ဝႆႉၼၼ်ႉၵေႃႈ ၶႅၼ်းၸိုၼ်ႈၶိုၼ်ႈမႃးယဝ်ႉၼႆ ၻွၵ်ႊတိူဝ်ႊ ထႅတ်ႉၽဵဝ်းဝူၺ်ႇလၢတ်ႈ။
ၵူၼ်းၸိူဝ်းပွၵ်ႈမိူင်းၶႄႇမႃးၼႆႉ ပဵၼ်ၵူၼ်းၸိူဝ်းထုၵ်ႇတီႉၺွပ်းၵုမ်းၶင်ၶွၵ်ႈတီႈဝဵင်း ဝူႊႁၢၼ်ႊသေ လူင်ပွင်ၸိုင်ႈၶႄႇ ပွႆႇလွတ်ႈမႃး ၊ ၸုမ်းၸွႆႈထႅမ် ပရႁိတၼမ်ႉသၼ်ႇၵႂႃႇႁပ်ႉဢဝ်ၶဝ်တီႈ ဝဵင်းမူႇၸေႊမႃး ။
ဢိင်ၶၢဝ်ႇ-NMG