ၵူၼ်းဝၢၼ်ႈၼႃး ၼႂ်းဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉ ဢွၼ်ၵၼ်ပၢႆႈႁွတ်ႈၽႅဝ် တီႈဝတ်ႉဝၢၼ်ႈၸၢၼ်း (ပူႇတႃႇ) ထႅင်ႈ လင်ႁိူၼ်း11 လင် မေႃႈၶဝ်ႈ ဝႃႈၼႆ။
ဝၼ်းတီႈ 03/12/2018 ယၢမ်းဝၢႆးဝၼ်း သိုၵ်းဢူၺ်းလီပွတ်းႁွင်ႇ တင်း သိုၵ်း RCSS တင်း SSPP ပဵၼ်ပၢင်တိုၵ်းၵၼ် ၼႂ်းဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ 2 ၾၢႆႇလႆႈပဵၼ်ပၢင်တိုၵ်းၵၼ်ထႅင်ႈသေ ၵူၼ်းဝၢၼ်ႈၼႃး ႁူဝ်ၵူၼ်း 36 ၵေႃႉ လႆႈဢွၼ်ၵၼ်ပၢႆႈဢွၵ်ႇမႃး သွၼ်ႈဝႆႉတီႈဝတ်ႉဝၢၼ်ႈၸၢၼ်း (ပူႇတႃႇ) ဝႃႈၼႆ။
ၽူႈတူင်ႉၼိုင် ၸွႆႈထႅမ်ၵူၼ်းပၢႆႈၽေးသိုၵ်း ၼႂ်းၸႄႈဝဵင်းသီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃး သဵင် ၵွင်ႈတႅၵ်ႇၸဵမ်ၸဝ်ႉၶႃႈယဝ်ႉ။ ၵူၼ်းပၢႆႈၽေး ဢွၼ်ၵၼ်ပၢႆႈဢွၵ်ႇမႃးထႅင်ႈ လင်ႁိူၼ်း 11 လင် ႁူဝ်ၵူၼ်း 36 ၵေႃႉ ၼႆဝႃႇ။ ပဵၼ်ၵူၼ်းဝၢၼ်ႈၼႃးၶႃႈ ဢၼ်ပၢႆႈမႃးထႅင်ႈၵမ်းၼႆႉ။ ပၢင်တိုၵ်းတႄႉ ပဵၼ်သိုၵ်းၸၢဝ်းၶိူဝ်းႁဝ်းၼင်ႇၵၼ်ၵူၺ်း” ဝႃႈၼႆ။
ၵူၼ်းဝၢၼ်ႈပၢႆႈမႃးယူႇ တီႈဝတ်ႉၶၢႆးႁဵဝ်း၊ ဝတ်ႉဝၢၼ်ႈၸၢၼ်းလႄႈ ဝတ်ႉဝၢၼ်ႈၸၢၼ်း (ပူႇတႃႇ) ၸဵမ်ၸိူဝ်းၼႆႉ။ ၵူၼ်းပၢႆႈ ၽေးသိုၵ်း ဢၼ်သွၼ်ႈဝႆႉတီႈဝတ်ႉဝိႁၢရ်ၶၢႆးႁဵဝ်း ပဵၼ်ၵူၼ်းဝၢၼ်ႈၶၢႆးႁဵဝ်း လင် ႁိူၼ်း 85 လင်၊ ၸၢႆး 192 ၵေႃႉ၊ ယိင်း 188 ၵေႃႉ ႁူမ်ႈၵၼ် 380 ၵေႃႉ။ တီႈဝတ်ႉဝၢၼ်ႈၸၢၼ်းသမ်ႉ ပဵၼ်ၵူၼ်းဝၢၼ်ႈ ဝၢၼ်ႈၸၢၼ်း၊ ဝၢၼ်ႈၼႃး၊ ၵွင်းဝဵင်း၊ ဝၢၼ်ႈ ၶုမ်ႇ၊ ဝၢၼ်ႈၵျွင်းလႄႈ ဝၢၼ်ႈၼႂ်းလူင် လင်ႁိူၼ်း 101 လင်၊ ၸၢႆး 173 ၵေႃႉ၊ ယိင်း 226 ၵေႃႉ ႁူမ်ႈၵၼ် 399 ၵေႃႉ။ လိူဝ် ၼၼ်ႉ တီႈဝၢၼ်ႈၸၢၼ်း (ပူႇတႃႇ) သမ်ႉ လင်းႁိူၼ်း 15 လင်၊ ၸၢႆး 27 ၵေႃႉ၊ ယိင်း 25 ၵေႃႉ ႁူမ်ႈၵၼ် 52 ၵေႃႉ။ တေႃႈ လဵဝ် ႁူမ်ႈၵၼ်တင်းမူတ်း ႁူဝ်ၵူၼ်းမီး 831 ၵေႃႉ။
တၢင်းပွတ်းဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉၼႆႉ မီးတပ်ႉသိုၵ်းလူင်ပွင်ၸိုင်ႈမၢၼ်ႈ၊ SSPP လႄႈ သိုၵ်း RCSS တူင်ႉၼိုင်ၵႂႃႇမႃးယူႇတႃႇသေႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ