ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉ ၸွမ်းဝတ်ႉဝႃးၽႃသိူဝ်ႇ ၼႂ်းၸႄႈဝဵင်းသီႇပေႃႉၼၼ်ႉ ယွၼ်ႉပိူဝ်ႈ ငဝ်းလၢႆး ၼႂ်းဝၢၼ်ႈ ဢိူင်ႇၼိမ်သဝ်းမႃးယဝ်ႉလႄႈ ၵူၼ်းဝၢၼ်ႈတူၼ်ႈၵႅင်း ႁူဝ်ၵူၼ်း 30 ပၢႆ ဢွၼ်ၵၼ်ပွၵ်ႈၶိုၼ်းႁိူၼ်းယေးၽႂ်မၼ်းဝႃႈၼႆ။
ဝၼ်းတီႈ 04/04/2019 ယၢမ်းၵၢင်ၼႂ် မွၵ်ႈ 9 မူင်း ၵူၼ်းဝၢၼ်ႈတူၼ်ႈၵႅင်း ဢၼ်ပၢႆႈမႃးသွၼ်ႈဝႆႉတီႈ ဝတ်ႉၼႃးမၢၵ်ႇၶေႃ ၸႄႈ ဝဵင်းသီႇပေႃႉၼၼ်ႉ ဢွၼ်ၵၼ်ပွၵ်ႈၶိုၼ်းႁိူၼ်းယေးၽႂ်မၼ်းယဝ်ႉ။ ယွၼ်ႉငဝ်းလၢႆးၼႂ်းပိုၼ်ႉတီႈ ၼိမ်သဝ်းမႃးယဝ်ႉ ဝႃႈၼႆ။
ၶွမ်ႊမတီႊ ၽူႈၸွႆႈထႅမ် ၵူၼ်းပၢႆႈၽေးသိုၵ်း လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃးတႄႉ ၵူၼ်းဝၢၼ်ႈတူၼ်ႈၵႅင်း ႁူဝ်ၵူၼ်း 33 ၵေႃႉ ဢွၼ်ၵၼ်ပွၵ်ႈမိူဝ်းႁိူၼ်းယေး ယဝ်ႉ။ တေႃႈလဵဝ် ၵိုတ်းထႅင်ႈ ပီႈၼွင်ႉဝၢၼ်ႈလွႆမွၵ်ႇၵူၺ်းၶႃႈ တိုၵ်ႉၵိုတ်းဝႆႉတီႈသိုင်ႇ လုင်းလႃႉၽူၼ်း ဝၢၼ်ႈၼႃး လွႆ ၼၼ်ႉ ” ဝႃႈၼႆ။
တေႃႈလဵဝ် ၵူၼ်းပၢႆႈၽေးသိုၵ်း ဢၼ်တိုၵ်ႉၵိုတ်းဝႆႉတီႈသီႇပေႃႉၼၼ်ႉ ၵိုတ်းၵူၼ်းဝၢၼ်ႈ လွႆမွၵ်ႇ ဢိူင်ႇၵုင်းသေႃႉ ႁူဝ်ၵူၼ်း 69 ၵေႃႉ တီႈသိုင်ႇလုင်းလႃႉၽူၼ်း ဝၢၼ်ႈၼႃးလွႆ ၼၼ်ႉၵူၺ်းယဝ်ႉ။
ႁူဝ်ပီ 2019 ၼႆႉ သိုၵ်းတႆး သွင်တပ်ႉ ၽိုတ်ႉႁိမ်တီႈယူႇၵၼ်၊ ထဵင်မေႃး တိုၵ်းတေႃးၵၼ်လႄႈ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း ၼပ်ႉႁူဝ်ႁဵင် လႆႈပၢႆႈယၢၼ်ႁိူၼ်းယေးတီႈယူႇ။ ယွၼ်ႉပၢင်တိုၵ်းသေ ၵူၼ်းမိူင်းတိူဝ်ႉမၢတ်ႇ တၢႆႁၢႆၸွမ်းၵေႃႈမီးၼမ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ