ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉၸွမ်းဝတ်ႉဝႃးၽႃသိူဝ်ႇ တီႈသီႇပေႃႉၼၼ်ႉ ၵိုတ်းႁူဝ်ၵူၼ်း 157 ၵေႃႉ ပႆႇပဵၼ်ပွၵ်ႈၶိုၼ်း ယွၼ်ႉငဝ်းလၢႆးၼႂ်းပိုၼ်ႉတီႈ ပႆႇၼိမ်။
ဝၼ်းတီႈ 28/03/2019 ယၢမ်းၵၢင်ၼႂ် မွၵ်ႈ 10 မူင်းၶိုင်ႈၼၼ်ႉ ၵူၼ်းဝၢၼ်ႈလွႆမွၵ်ႇ ႁူဝ်ၵူၼ်း 42 ၵေႃႉ ဢၼ်မႃးသွၼ်ႈဝႆႉတီႈ သိုင်ႇလုင်းလႃႉၽူၼ်း ဝၢၼ်ႈၼႃးလွႆ တင်း ၵူၼ်းဝၢၼ်ႈပၢင်ႇလူင် ၸႄႈဝဵင်းၼမ်ႉတူႈ ႁူဝ်ၵူၼ်း 51 ၵေႃႉ ဢၼ်မႃးသွၼ်ႈဝႆႉ တီႈဝတ်ႉၼမ်ႉႁူးၼွႆႉ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇၼၼ်ႉ ၶိုၼ်းဢွၼ်ၵၼ်ပွၵ်ႈႁိူၼ်းယေးယဝ်ႉ။ ယၢမ်းလဵဝ် ဢၼ် ၵိုတ်းဝႆႉၼႆႉပဵၼ် ဝၢၼ်ႈတူၼ်ႈၵႅင်းတင်း ဝၼ်ႈလွႆမွၵ်ႇ ႁူဝ်ၵူၼ်း 157 ၵေႃႉ ပႆႇပဵၼ်ပွၵ်ႈ ဝႃႈၼႆ။
ၶွမ်ႊမတီႊ ၾၢႆႇၸွႆႇထႅမ်ၵူၼ်းပၢႆႈၽေးသိုၵ်း တီႈသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃး ဝၼ်းတီႈ 28 တႄႉ ဢွၼ်ၵၼ် ပွၵ်ႈမိူဝ်းၶိုၼ်းၵမ်ႈၽွင်ႈၶႃႈယဝ်ႉ ပဵၼ်ၵူၼ်းဝၢၼ်ႈလွႆမွၵ်ႇ တင်း ဝၢၼ်ႈပၢင်ႇလူင် ၸႄႈဝဵင်းၼမ်ႉတူႈ။ ၵူၼ်းပၢႆႈၽေးႁဝ်းၶႃႈ ၵေႃႈ ဢဝ်ငဝ်းလၢႆးမၼ်းဝႃႈၶႃႈယဝ်ႉ သင်ဝႃႈ ငဝ်းလၢႆးဢမ်ႇပေႃးၶႅမ်ႉၼႆၵေႃႈ ဢွၼ်ၵၼ်ငိူင်ႉဝႄႈဢွၵ်ႇမႃး။ ငဝ်းလၢႆးပၢင်တိုၵ်း သိုၵ်းသိူဝ်ၵေႃႈ ပႆႇယဵၼ် မၢင်တီႈၵေႃႈ တိုၵ်ႉပဵၼ်ပၢင်တိုၵ်းၵၼ်၊ တိုၵ်ႉၶဵင်ႈ ၶႅင်ၵၼ်ယူႇ” ဝႃႈၼႆ။
ၵူၼ်းပၢႆႈၽေးသိုၵ်း ဢၼ်တိုၵ်ႉၵိုတ်းဝႆႉတီႈဝတ်ႉၼႃးမၢၵ်ႇၶေႃ ႁူဝ်ၵူၼ်း 88 ၵေႃႉ ပဵၼ်ၵူၼ်းဝၢၼ်ႈတူၼ်ႈၵႅင်း ဢိူင်ႇၼႃးမၢၵ်ႇ ၶေႃ။ တီႈသိုင်ႇလုင်းလႃႉၽူၼ်း ဝၢၼ်ႈၼႃးလွႆ ႁူဝ်ၵူၼ်း 69 ၵေႃႉ ပဵၼ်ၵူၼ်းဝၢၼ်ႈလွႆမွၵ်ႇ ဢိူင်ႇၵုင်းသေႃႉ ၸိူဝ်းၼႆႉ ပႆႇ ပဵၼ်ပွၵ်ႈ ဝႃႈၼႆ။
မိူဝ်ႈဝၼ်းတီႈ 28/03/2019 ယၢမ်းၵၢင်ၼႂ် 8 မူင်းၶိုင်ႈပၢႆၼၼ်ႉ သိုၵ်းမၢၼ်ႈ ၶမယ 324 ဢၼ်ပၵ်းၼမ်ႉတူႈ လႄႈ ၸုမ်းဢူၺ်း လီပွတ်းႁွင်ႇပဵၼ်ပၢင်တိုၵ်းႁိမ်းလွႆႁၢင်းတီႈဢၼ် RCSS ပၵ်းပၢင်သဝ်းဝႆႉ။ သိုၵ်းမၢၼ်ႈဢဝ်ၶိူင်ႈမိၼ်မႅင်းမီႈမႃးယိုဝ်းဢမ်ႇၵႃး သၢမ်ၵမ်း။ ၾၢႆႇတၢင်းတပ်ႉလိၼ်သမ်ႉ ယိုဝ်းၵွင်ႈလူင်သႂ်ႇဢမ်ႇယွမ်း 5 ၵမ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ