ဢိင်ၼိူဝ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼင်ႇၵၼ် ပိုတ်းယိုဝ်း ၶဵင်ႈၶႅင်ၵၢၼ်သိုၵ်းတေႃႇၵၼ် ႁၢဝ်ႈႁႅင်းသေ ၵူၼ်းဝၢၼ်ႈ ဢွၼ်ၵၼ်ၽူင်ႉပၢႆႈဢွၵ်ႇမႃးသွၼ်ႈဝႆႉၸွမ်းဝတ်ႉဝႃး ၽႃသိူဝ်ႇ တေႃႈလဵဝ် မီးႁူဝ်ၵူၼ်းပၢႆႈၽေးယဝ်ႉ 2,443 ၵေႃႉ ဝႃႈၼႆ။
ဝၼ်းတီႈ 05/03/2019 ယၢမ်းၵၢင်ဝၼ်း မွၵ်ႈ 11:30 မူင်းၼၼ်ႉ ၵူၼ်းဝၢၼ်ႈပၢင်ၼိူဝ် ဢိူင်ႇတႃႈတေႈ ႁူဝ်ၵူၼ်း 35 ၵေႃႉ ဢွၼ်ၵၼ်ပၢႆႈၽေးသိုၵ်းမႃးသွၼ်ႈဝႆႉတီႈဝတ်ႉၽူဝ်းတေႃႇ ပွၵ်ႉၸၢင်ႈၶမ်းၸၢၼ်း ၸႄႈဝဵင်းသီႇပေႃႉ ၸႄႈတွၼ်ႈ ၵျွၵ်ႉ မႄး ၸိုင်ႈတႆးပွတ်းႁွင်ႇ ဝႃႈၼႆ။
ၶွမ်ႊမတီႊၽူႈၸွႆႈထႅမ်ၵူၼ်းပၢႆႈၽေးသိုၵ်း တီႈသီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် ၵူၼ်းပၢႆႈ ၽေးသိုၵ်း တီႈသီႇပေႃႉၼႆႉ တိူဝ်းၼမ်မႃးၵူႈဝၼ်းယဝ်ႉ။ လွင်ႈၵိၼ်ယႅမ်ႉၵေႃႈ ပဵၼ်ဢၼ်ယၢပ်ႇၽိုတ်ႇမႃး လိူဝ်ႁႅင်းၶႃႈ။ မိူၼ်ၼင်ႇ တင်းမၢၼ်ႈလီႈၼႆႉ ၼိုင်ႈဝၼ်းလႂ် လႆႈၸွႆႈၶဝ်ႈသၢၼ်ၵႂႃႇ (ထူင်လူင်) 10 ထူင် မူတ်းၸွမ်းၵူႈ ဝၼ်းၶႃႈဢေႃႈ။ လိူဝ်ၼၼ်ႉ ထႅင်ႈလၢႆလၢႆတီႈၶႃႈ။ ယွၼ်ႉဝႃႈ တေႃႈလဵဝ် ႁူဝ်ၵူၼ်းပၢႆႈၽေးသိုၵ်းႁဝ်းၵေႃႈၼမ်သေ ပေႃး ၸူးဢဝ်ပီႈၼွင်ႉႁဝ်းၶႃႈ တီႈသီႇပေႃႉၼႆႉဢၼ်လဵဝ် ၸွႆႈတူၺ်းလုမ်းလႃးၵမ်ႉထႅမ်ၵၼ်တႄႉ တေဢမ်ႇပေႃး ၵုမ်ႇၵၼ် လႆႈယဝ်ႉၶႃႈ” ဝႃႈၼႆ။
ၶွမ်ႊမတီႊၽူႈၸွႆႈထႅမ်ၵူၼ်းပၢႆႈၽေးသိုၵ်း သိုပ်ႇလၢတ်ႈဝႃႈ “ ယၢမ်းလဵဝ် ဢၼ်ၵူၼ်းပၢႆႈၽေးလူဝ်ႇလိူဝ်ႁႅင်းပဵၼ် ၶဝ်ႈ သၢၼ်၊ ၶွင်ၵိၼ်ယႅမ်ႉ ၽၵ်းယိူဝ်ႈၼၢင်းၶဵဝ် ၸဵမ်ၸိူဝ်းၼႆႉ။ ယွၼ်ႉၼၼ်လႄႈ သင်ပီႈၼွင်ႉႁဝ်း ၽူႈမီးၼမ်ႉၸႂ် ၸေႇတ ၼႃႇ တီႈၸမ်ၵႆ ၸွႆႈထႅမ်မႃးၼႆၸိုင် ယိၼ်းၸူမ်းၶွပ်ႈၸႂ်တႄႉၶႃႈ။ ဢမ်ႇၼၼ် သင်ပီႈၼွင်ႉႁဝ်းၶႃႈ ယူႇၵႆ ဢမ်ႇမႃးလႆႈ ၼႆၸိုင် ၸွႆႈၵမ်ႉထႅမ်ငိုၼ်းတွင်းမႃးၵေႃႈ ႁဝ်းၶႃႈတေၶိုၼ်းဢဝ်ငိုၼ်းၼၼ်ႉသေ သိုဝ်ႉၶွင်ၵိၼ်ယႅမ်ႉၶိုၼ်း လဵင်ႉလူၵၼ် ၵႂႃႇၶႃႈ။ ၶူဝ်းၼုင်ႈတၢင်းဝႆတႄႉ တဵမ်ထူၼ်ႈၵၼ်ယူႇၶႃႈ ဢမ်ႇပေႃးလႆႈမႆႈၸႂ်။ ဢၼ်မႆႈၸႂ်တႄႉ ပဵၼ်လွင်ႈၵိၼ်ယႅမ်ႉ ယဝ်ႉၶႃႈ” ဝႃႈၼႆ။
တေႃႈလဵဝ် ၵူၼ်းပၢႆႈၽေးသိုၵ်း ဢၼ်ႁွတ်ႈၽႅဝ်ဝႆႉဝတ်ႉဝႃးၽႃသိူဝ်ႇ တီႈဝဵင်းသီႇပေႃႉသမ်ႉ တီႈဝတ်ႉၼမ်ႉသိမ်ႇ 52 ၵေႃႉ၊ ဝတ်ႉမၢၼ်ႈလီႈ 1,399 ၵေႃႉ၊ ဝတ်ႉၽူဝ်းတေႃႇ ပွၵ်ႉၸၢင်ႈၶမ်းၸၢၼ်း 383 ၵေႃႉ၊ ဝတ်ႉ (2500) ႁူဝ်ၵူၼ်း 192 ၵေႃႉ၊ ႁူင်းႁဵၼ်းၸၼ်ႉဢွၼ် တီႈဝၢၼ်ႈတူင်ႈၸၢင်ႉ 234 ၵေႃႉ၊ ဝတ်ႉၼႃးမၢၵ်ႇၶေႃ 123 ၵေႃႉလႄႈ ဝတ်ႉၵုင်းၸၢင်ႈ လဵၵ်း 60 ၵေႃႉ တင်းမူတ်းမီးႁူဝ်ၵူၼ်း 2,443 ၵေႃႉ ဝႃႈၼႆ။
ၵူၼ်းပၢႆႈၽေးသိုၵ်းသမ်ႉ ပဵၼ်ၵူၼ်းဝၢၼ်ႈပႃႇၵၢင်း၊ လွႆငိုၼ်း၊ ဝၢၼ်ႈၶၢႆးႁဵဝ်း၊ ဝၢၼ်ႈတႃႈတေႈ၊ ဝၢၼ်ႈၵုင်းၸၢင်ႈလဵၵ်း၊ မၢၼ်ႈမႂ်ႇ၊ ဝၢၼ်ႈပၢင်ၼိူဝ်၊ ဝၢၼ်ႈတူၼ်ႈၵႅင်း၊ ဝၢၼ်ႈတႃႈလူင်၊ ဝၢၼ်ႈႁူဝ်ၼႃး၊ မၢၼ်ႈႁူမ်ႈ။ လိူဝ်ၼၼ်ႉ တၢင်းၸႄႈဝဵင်း ၼမ်ႉတူႈသမ်ႉ မၢၼ်ႈလီႈလႄႈ ဝၢၼ်ႈပၢင်ႇလေႃႉ ဢိူင်ႇပုင်ႇဝူဝ်း ၸႄႈဝဵင်းၵျွၵ်ႉမႄး ၸိူဝ်းၼႆႉ။
သင်ပီႈၼွင်ႉ တီႈၸမ်ၵႆ ၶႂ်ႈၸွႆႈထႅမ် ၵူၼ်းပၢႆႈၽေးၼႆၸိုင် ၵပ်းသိုပ်ႇလႆႈတီႈမၢႆၾူၼ်း 094-03764777, 099-56882654, 097-87979140 ၸိူဝ်းၼႆႉ။
