ဢိင်ၼိူဝ် တပ်ႉသိုၵ်းလူင်ပွင်ၸိုင်ႈမၢၼ်ႈ လေႃႇယိုဝ်း တပ်ႉသိုၵ်း SSPP သေ ၵူၼ်းဝၢၼ်ႈ ၼႂ်းဢိူင်ႇၸေႈၶၢၼ် ဝဵင်းသီႇ ပေႃႉ 500 ပၢႆ ဢၼ်လႆႈပၢႆႈယၢၼ်ႁိူၼ်းယေးၼၼ်ႉ ပၢင်တိုၵ်းယဵၼ်ၵႂႃႇယဝ်ႉလႄႈ ဢွၼ်ၵၼ်ပွၵ်ႈမိူဝ်းၶိုၼ်း ႁိူၼ်းၽႂ် မၼ်းယဝ်ႉ ဝႃႈၼႆ။
ဝၼ်းတီႈ 14/11/2018 ယၢမ်းၵၢင်ဝၼ်း 11 မူင်းပၢႆ ၵူၼ်းဝၢၼ်ႈၼႃး တင်း ဝၢၼ်ႈၼႃးလေႃႉ ႁူဝ်ၵူၼ်း 262 ၵေႃႉ ဢၼ်ပၢႆႈ ၽေးမႃး သွၼ်ႈဝႆႉတီႈ ဝတ်ႉၼႃးဢုင် ဢိူင်ႇၸေႈၶၢၼ် ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇၼၼ်ႉ ၶိုၼ်းဢွၼ်ၵၼ် ပွၵ်ႈႁိူၼ်း ယေးၽႂ်မၼ်းမူတ်း ယွၼ်ႉငဝ်းလၢႆးၼႂ်းပိုၼ်ႉတီႈၼိမ်သဝ်းယဝ်ႉ ဝႃႈၼႆ။
လုင်းၸၢႆးၸၢင်းတေႃး ပူႇႁဵင် ဝၢၼ်ႈၼႃးဢုင် လၢတ်ႈတီႈၽူႈတွႆႇႁွၵ်ႈဝႃႈ “ ၶိုၼ်းဢွၼ်ၵၼ်ပွၵ်ႈမိူဝ်းမူတ်း ယဝ်ႉၶႃႈ။ တီႈ ဝတ်ႉၼႃးဢုင်တႄႉ ဢမ်ႇမီးၽႂ်သေၵေႃႉယဝ်ႉ။ ယွၼ်ႉငဝ်းလၢႆးၼႂ်းပိုၼ်ႉတီႈၵေႃႈ ယဵၼ်ယဝ်ႉၶႃႈ။ လႆႈငိၼ်းဝႃႈ သိုၵ်း တင်းသွင်ၾၢႆႇၵေႃႈ ထွႆႁူၼ်(ထွၼ်) ၼင်ႇၵၼ်ယဝ်ႉ” ဝႃႈၼႆ။
ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈဝတ်ႉၼႃးဢုင်ၼႆႉ ပဵၼ်ၵူၼ်းဝၢၼ်ႈၼႃး တင်း ဝၢၼ်ႈၼႃးလေႃႉ 2 ဝၢၼ်ႈ။ ၵူၼ်းဝၢၼ်ႈၼႃး ၽူႈၸၢႆး 73 ၵေႃႉ၊ ယိင်း 139 ၵေႃႉ။ ဝၢၼ်ႈၼႃးလေႃႉသမ်ႉ ၵူၼ်းၸၢႆး 11 ၵေႃႉ၊ ယိင်း 46 ၵေႃႉ ႁူမ်ႈၵၼ် တင်းမူတ်း 262 ၵေႃႉ ၾၢႆႇၼိုင်ႈၵေႃႈ ယွၼ်ႉပဵၼ်ၶၢဝ်းဢဝ်မၢၵ်ႇၶဝ်ႈတဝ်ႈၼမ်ႉလႄႈ ၸင်ႇလႆႈႁိပ်ႈပွၵ်ႈမိူဝ်း ဝႃႈၼႆ။
ၵူၼ်းပၢႆႈၽေးသိုၵ်း ဢၼ်ႁွတ်ႈၽႅဝ်တီႈဝတ်ႉၼႃးဢုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ ဢွၼ်ၵၼ်ပွၵ်ႈ ယဝ်ႉ။ ယွၼ်ႉဝႃႈ မႆႈၸႂ်ၶဝ်ႈၼႂ်းၼႃးလႄႈ ၶဝ်ႈၵၢပ်ႇ ဢၼ်တိုၵ်ႉလူဝ်ႇပၢတ်ႇလူဝ်ႇဢဝ်။ မိူဝ်ႈလဵဝ်ၼႆႉ သမ်ႉပဵၼ် ၶၢဝ်း ဢဝ်ၶဝ်ႈၶႃႈၼႃႇ။ ယွၼ်ႉၼၼ် ၶႂ်ႈယွၼ်းထိုင် တပ်ႉသိုၵ်းၾၢႆႇလႂ်သေဢမ်ႇဝႃႈ ယႃႇပေပိုတ်ႇၼႃႈသိုၵ်းတေႃႇၵၼ် ၶႃႈ ယဝ်ႉ” ဝႃႈၼႆ။
မိူဝ်ႈ ဝၼ်းတီႈ 13/11/2018 ယၢမ်းၵၢင်ဝၼ်း မွၵ်ႈ 12 မူင်း သိုၵ်းလူင်ပွင်ၸိုင်ႈမၢၼ်ႈ ၶမယ 501 ပႃႈတႂ်ႈၸၵၶ 1 ၵျွၵ်ႉ မႄး သွၵ်ႈတဝ် ၸွမ်းဝၢၼ်ႈၸွမ်းထိူၼ်ႇ ပိုတ်းယိုဝ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA 2 ၾၢႆႇ လႆႈ ပဵၼ်ပၢင်တိုၵ်းၵၼ် ၼႂ်းၵႄႈ ဝၢၼ်ႈၼႃးလေႃႉ တင်း ၼႃးမၢၵ်ႇၶေႃ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ၵူၼ်း ဝၢၼ်ႈ ၼႂ်းဢိူင်ႇၸေႈၶၢၼ် 500 ပၢႆ လႆႈဢွၼ်ၵၼ်ပၢႆႈၽေးသိုၵ်း ဝႃႈၼႆ။
ဢိူင်ႇၸေႈၶၢၼ်ၼႆႉ တင်းမူတ်း မီး 7 ဝၢၼ်ႈ။ ဝၢၼ်ႈမႂ်ႇ၊ ဝၢၼ်ႈၵိုတ်ႈ၊ ဝၢၼ်ႈၸေႈၶၢၼ်၊ ဝၢၼ်ႈၼႃး၊ ဝၢၼ်ႈၼႃးလေႃႉ၊ ဝၢၼ်ႈၼႃးလိၼ်းလႄႈ ဝၢၼ်ႈၼႃးဢုင် ၸဵမ်ၸိူဝ်းၼႆႉ။