ဢိင်ၼိူဝ် တပ်ႉသိုၵ်းဢူၺ်းလီပွတ်းႁွင်ႇ လႄႈ RCSS လႆႈပဵၼ်ပၢင်တိုၵ်းၵၼ်ၼႂ်းဢိူင်ႇၼႃးမၢၵ်ႇၶေႃ ၸႄႈဝဵင်းသီႇ ပေႃႉၼၼ်ႉသေ ၵူၼ်းမိူင်းသီႇပေႃႉလႆႈဢွၼ်ၵၼ် ပၢႆႈၽေးသိုၵ်း မီး 1,052 ၵေႃႉ သွၼ်ႈဝႆႉတီႈဝတ်ႉၵျွင်းမုၼ်ၸဝ်ႈ ဝႃႈၼႆ။
ဝၼ်းတီႈ 02-03/11/2018 ၼႂ်းၶၢဝ်းတၢင်း 2 ဝၼ်းၼႆႉ ၵူၼ်းဝၢၼ်ႈ ဢွၼ်ၵၼ်ပၢႆႈၽေးသိုၵ်း မႃးသွၼ်ႈဝႆႉတီႈ ဝတ်ႉဝိႁၢရ်လူင်ၼႃးမၢၵ်ႇၶေႃ တင်း ဝတ်ႉဝိႁၢရ်လူင်ဝၢၼ်ႈႁူမ်ႈ ၼႂ်းဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉ ၸိုင်ႈတႆး ပွတ်းႁွင်ႇ ဝႃႈၼႆ။
ၸၢႆးဝၼ်းႁိူင်း ၵူၼ်းၼုမ်ႇဝၢၼ်ႈၼႃးမၢၵ်ႇၶေႃ ၸွႆႈထႅမ်ၵူၼ်းပၢႆႈၽေးသိုၵ်း လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ၵူၼ်းဝၢၼ်ႈႁူမ်ႈ ပၢႆႈဢွၵ်ႇမႃးထႅင်ႈ မွၵ်ႈ 20 ပၢႆ ႁွတ်ႈၽႅဝ်ဝႆႉတီႈၼႃးမၢၵ်ႇၶေႃယဝ်ႉၶႃႈ။ လႆႈငိၼ်းဝႃႈ ပၢင် တိုၵ်းတႄႉ ယဵၼ်ၵႂႃႇယဝ်ႉ။ တင်းသွင်ၾၢႆႇၵေႃႈ ထွၼ်ၶိုၼ်းၼင်ႇၵၼ်ယဝ်ႉၼႆ ။ ၵူၺ်းၵႃႈ ပႆႇၸၢင်ႈပွၵ်ႈမိူဝ်းၶိုၼ်း၊ ပႂ်ႉတူၺ်းငဝ်း လၢႆးထႅင်ႈဢိတ်းၼိုင်ႈၵွၼ်ႇ” ဝႃႈၼႆ။
ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈဝတ်ႉဝိႁၢရ်လူင်ၼႃးမၢၵ်ႇၶေႃသမ်ႉ ပဵၼ်ၵူၼ်းဝၢၼ်ႈႁူဝ်ၼႃး၊ ဝၢၼ်ႈၼႂ်းလူင်၊ ဝၢၼ်ႈတူၼ်ႈၵႅင်း၊ ဝၢၼ်ႈတႃႈလူင်၊ ဝၢၼ်ႈၶၢႆးႁဵဝ်း တင်းမူတ်းလင်ႁိူၼ်းမီး 228 လင်၊ ႁူဝ်ၵူၼ်း 652 ၵေႃႉ။ ၵူၼ်း ဝၢၼ်ႈႁူမ်ႈ ဢၼ်ပၢႆႈသွၼ်ႈဝႆႉတီႈဝတ်ႉဝၢၼ်ႈႁူမ်ႈၶိုၼ်းသမ်ႉ လင်ႁိူၼ်း 94 လင်၊ ႁူဝ်ၵူၼ်း 410 ၵေႃႉ။ တင်းမူတ်း ႁူမ်ႈၵၼ် လင်ႁိူၼ်း 322 လင် ႁူဝ်ၵူၼ်း 1,052 ၵေႃႉ ဝႃႈၼႆ။
ၸၢႆးဝၼ်းႁိူင်း လၢတ်ႈဝႃႈ “ လွင်ႈၵိၼ်ယႅမ်ႉ ၶူဝ်းၼုင်တင်းဝႆတႄႉ ၸုမ်းတူင်ႉၼိုင်တူင်ႇဝူင်းၵူၼ်းၼမ်ႉလၼ်ႈ၊ သီႇ ပေႃႉလႄႈ ပႃႇတီႇႁူဝ်သိူဝ် ဢိၵ်ႇလၢႆလၢႆပႃႇတီႇ ႁူမ်ႈၵၼ်မႃးၵမ်ႉထႅမ်ပၼ်ယူႇ” ဝႃႈၼႆ။
ၼႂ်းဝူင်ႈဝၢင်ႈၼႆႉ တပ်ႉသိုၵ်းဢူၺ်းလီပွတ်းႁွင်ႇလႄႈ တပ်ႉသိုၵ်းၸိုင်ႈတႆး RCSS ပဵၼ်ပၢင်တိုၵ်းၵၼ်ၶိူဝ်းယႂ်း။ မိူၼ် ၼင်ႇၼႂ်းၸႄႈဝဵင်းၼမ်ႉတူႈ၊ လႃႈသဵဝ်ႈ၊ သီႇပေႃႉလႄႈ ၵူၼ်းမိူင်းပၢႆႈယၢၼ်ႁိူၼ်းယေး ပၢႆႈၽေးသိုၵ်းသွၼ်ႈယူႇ ၸွမ်းဝတ်ႉဝႃးၽႃသိူဝ်ႇ မီး 2 ႁဵင်ပၢႆ။ ၸိူဝ်းၶဝ်လႆႈပွၵ်ႈၶိုၼ်းႁိူၼ်းယေးယဝ်ႉဝႃႈၼႆသေတႃႉ ပီၼႆႉၵူၼ်းမိူင်းၵုမ်ႇ ပၢႆႈၽေးသိုၵ်း ၵူၺ်းလႄႈ ဢွၼ်ၵၼ်မႆႈၸႂ်မၢၵ်ႇၶဝ်ႈတဝ်ႈၼမ်ႉတႃႇပီတေမႃးၵူၺ်းယဝ်ႉ ဝႃႈၼႆ။
