ၸုမ်းဢူၺ်းလီပွတ်းႁွင်ႇ FPNCC ဢွၵ်ႇလိၵ်ႈပိုၼ်ၽၢဝ် လွင်ႈတပ်ႉသိုၵ်းတဢၢင်း TNLA တူၵ်းလူင်းတေပွႆႇပၼ် တူဝ် ၼၢင်းမူဝ်ႁွမ် ဝႆးဝႆးၼႆႉ ဝႃႈၼႆ။
မိူဝ်ႈၼႆႉ ဝၼ်းတီႈ 10/10/2018 ယူႇတီႈၶွမ်ႊမတီႊဢုပ်ႇဢူဝ်းငူပ်ႉငီႉၵၢၼ်မိူင်း ၸုမ်းဢူၺ်းလီပွတ်းႁွင်ႇ FPNCC ယူႇၵၢင်ၶိုင်ပၼ်သေ တူဝ်တႅၼ်းၸုမ်းတူင်ႉၼိုင်တူင်ႇဝူင်းတႆး 10 ၸုမ်း ဝဵင်းၼမ်ႉၶမ်း လႆႈဢုပ်ႇၵၼ်တင်း သိုၵ်းတဢၢင်း TNLA ။ ၾၢႆႇတဢၢင်း တူၵ်းလူင်းတႃႇပွႆႇပၼ်တူဝ်ၼၢင်းမူဝ်ႁွမ်ၶိုၼ်းဝႆးဝႆး ၼႆသေ ႁူမ်ႈၵၼ် ဢွၵ်ႇၶေႃႈပိုၼ်ၽၢဝ်ႇ ၽိုၼ်ၼိုင်ႈ။
ၼႂ်းၶေႃႈပိုၼ်ၽၢဝ်ႇတႅမ်ႈဝႆႉဝႃႈ ၾၢႆႇတၢင်း TNLA လၢတ်ႈဝႃႈ ႁၼ်ထိုင် လွင်ႈမိုတ်ႈၵိုဝ်းၸမ်ၸႂ်ၸၢဝ်းၶိူဝ်း ၼင်ႇၵၼ်ယူႇၸွမ်းၵၼ်မႃးပီယၢဝ်းၶၢဝ်းႁိုင်ၼၼ်ႉသေ ၸင်ႇလႆႈတူင်းလူင်း ပူတ်းပွႆႇတူတ်ႈတၢမ်ႇပၼ် ၼၢင်းမူဝ်ႁွမ်သေ တေၶိုၼ်းပွႆႇတူဝ်ပၼ်ၼႂ်းဝႆးဝႆးၼႆႉ-ဝႃႈၼႆဝႆႉ။ ၵူၺ်းၵႃႈ တေပွႆႇပၼ် ဝၼ်းလႂ် ဢၼ်ဝႃႈၼၼ်ႉတႄႉ ဢမ်ႇလႆႈတႅမ်ႈဝႆႉ ပႃးၼႂ်းၶေႃႈပိုၼ်ၽၢဝ်ႇ ။
ၸၢႆးသေႃးသူၺ်ႇ(ႁွင်ႉ) ၸၢႆးလၢဝ်ၶမ်း ၵေႃႉပဵၼ်ၽူဝ် ၼၢင်းမူဝ်ႁွမ် လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် ၶႃႈႁဝ်း တႄႉ ပႆႇၸၢင်ႈလၢတ်ႈသင်ၶႃႈ။ လႆႈႁၼ်ၶေႃႈပိုၼ်ၽၢဝ်ႇ ဢွၵ်ႇၸိူင်ႉၼႆ ၶႃႈႁဝ်းၵေႃႈ ပဵၼ်ဢၼ်ၸူမ်းတႄႉၶႃႈ။ ပေႃးမၼ်းၼၢင်းဢွၵ်ႇမႃးၽႅဝ်ၸိုင် ၸူမ်းပေႃးႁႃတီႈဝႃႈဢမ်ႇမီးယဝ်ႉ” ဝႃႈၼႆ။
ၼၢင်းမူဝ်ႁွမ်ၼႆႉ ထုၵ်ႇသိုၵ်းတဢၢင်း TNLA တီႉၺွပ်းၵုမ်းၶင်ဢဝ်တူဝ်မၼ်းၼၢင်းၵႂႃႇ မိူဝ်ႈဝၼ်းတီႈ 17/08/2018 ၶဝ်ႈတီႉဢဝ်တီႈႁိူၼ်းမၼ်း ၼၢင်း တီႈပွၵ်ႉႁူဝ်ၼွင် ၸႄႈဝဵင်းၼမ်ႉၶမ်း ။