မုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇ ၸတ်းႁဵတ်း ဝၼ်းၵိူတ်ႇ ၶွပ်ႈတဵမ် 6 ပီ တီႈဝတ်ႉမႂ်ႇတႆး မိူင်းၵွၵ်ႇ (ၵုင်းထဵပ်ႈ) မီး ပီႈၼွင်ႉတႆး တီႈၸမ်ၵႆ ၶဝ်ႈႁူမ်ႈ တင်းၼမ်လၢႆ။
ဝၼ်းတီႈ 30/09/2018 ယၢမ်းၵၢင်ၼႂ် 7 မူင်း ထိုင် 4 မူင်းဝၢႆးဝၼ်း မုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇ ၸတ်းႁဵတ်း ဝၼ်းၵိူတ်ႇ ၶွပ်ႈတဵမ် 6 ပီ ဢၼ်လႆႈၵေႃႇတင်ႈမုၵ်ႉၸုမ်းၶိုၼ်ႈမႃးလႄႈ ၵၢပ်ႈသွမ်းသင်ၶၸဝ်ႈ တီႈဝတ်ႉမႂ်ႇတႆး သႃႇထုပရႃႇ တိတ်ႇ သွႆး 44/ 1 ယၢၼ်းၼႃးဝႃး မိူင်းၵွၵ်ႇ (ၵုင်းထဵပ်ႈ) ၸိုင်ႈထႆး။ လိူဝ်ၼၼ်ႉ တွၼ်ႈဝၢႆးဝၼ်းသမ်ႉ ၸတ်းႁဵတ်းပႃး ပၢင်ဢုပ်ႇဢူဝ်း လႅၵ်ႈလၢႆႈတၢင်းႁူႉထႅင်ႈ ဝႃႈၼႆ။
ၼၢင်းထူၺ်းဢိင်ႇ လွႆဢုင်း (ႁွင်ႉ) ၼၢင်းမႂ်ႇ ၽူႈၵပ်းသိုပ်ႇတိတ်းတေႃႇ မုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇ လၢတ်ႈတီႈ ၽူႈတွႆႇႁွၵ်ႈဝႃႈ “ ၶႂ်ႈႁႂ်ႈႁႅင်းၵၢၼ် ယၢၼ်မိူင်းၵူၼ်းၼုမ်ႇႁဝ်း မေႃၶဝ်ႈဢွၵ်ႇ ၵပ်းသိုပ်ႇၸွႆႈထႅမ်ၵၼ် ဢမ်ႇၶႂ်ႈႁႂ်ႈယူႇၽႂ် ယူႇမၼ်း။ လိူဝ်ၼၼ်ႉ ၼင်ႇႁိုဝ် တေၶိုတ်းတၼ်း ၶၢဝ်းယၢမ်းၼၼ်ႉ ပီႈၼွင်ႉႁဝ်းၶဝ် ယူႇမိူင်းလႂ် တီႈလႂ်သေဢမ်ႇဝႃႈ ႁႂ်ႈမေႃဢွၼ်ၵၼ်ထွမ်ႇ/ႁူႉ ၶၢဝ်ႇငၢဝ်းဝၢၼ်ႈမိူင်းလႄႈ လွင်ႈလႅၵ်ႈလၢႆႈတၢင်းႁူႉတေႃႇၵၼ်” ဝႃႈၼႆ။
မုၵ်ႉၸုမ်း ၸၢဝ်းၶိူဝ်းတႆး မိူင်းၵွၵ်ႇ ဢၼ်လႆႈၵေႃႇတင်ႈၶိုၼ်ႈမႃး ၶွပ်ႈတဵမ် 6 ပီၼႆႉ တင်းမူတ်း မီးလုၵ်ႈၸုမ်း 567 ၵေႃႉ။ ၼႂ်းဝၼ်းတီႈ 30 ၼၼ်ႉသမ်ႉ မီးလုၵ်ႈၸုမ်းမႂ်ႇမႃးၶဝ်ႈႁူမ်ႈထႅင်ႈ 11 ၵေႃႉ ဝႃႈၼႆ။
မုၵ်ႉၸုမ်းၸၢဝ်းၶိူဝ်းတႆး ဢၼ်ပိုတ်ႇလုမ်းဝႆႉ ၼႂ်းၸိုင်ႈထႆး တင်းမူတ်း မီး 3 တီႈ မိူင်းၵွၵ်ႇ(ၵုင်းထဵပ်ႈ)၊ ၵဵင်းမႆႇလႄႈ ရယွင်း။ လိူဝ်ၼၼ်ႉ ၵိင်ႇၽႄမုၵ်ႉၸုမ်းၸၢဝ်းၶိူဝ်းတႆး ထႅင်ႈ 2 တီႈသမ်ႉ မိူၼ်ၼင်ႇ ၵိင်ႇၽႄ လမ်းပုၼ်း။ ၵိင်ႇၽႄ ပရႃႇထုမ်းထႃးၼီး ၸဵမ်ၸိူဝ်းၼႆႉ။
လၵ်းၼမ်း(ပေႃႇလသီႇ) ဢၼ်မုၵ်ႉၸုမ်းၸၢဝ်းၶိူဝ်းတႆး ယိပ်းတိုဝ်းဝႆႉ တင်းမူတ်း မီး 7 ၶေႃႈ မိူၼ်ၼင်ႇ –
1) ပၼ်ႁႅင်းၵမ်ႉထႅမ် လၵ်းၼမ်းၶွင်ႇသီႇဢဝ်ၶိုၼ်းၸိုင်ႈတႆး RCSS ။
2) ၸွႆႈၵၼ်ႁဵတ်းသၢင်ႈတႃႇႁႂ်ႈၸိူဝ်ႉၸၢတ်ႈၸိုင်ႈတႆး မီးသုၼ်ႇလႆႈၽဵင်ႇပဵင်းၼႂ်းလုမ်ႈၾႃႉ။
3) ပၼ်ႁႅင်းဢုပ်ႉပိူင်ႇလူၺ်ႈ လွၵ်းလၢႆးတီႇမူဝ်ႇၶရေႇသီႇ (ဢုပ်ႉပိူင်ႇလူၺ်ႈၵၢင်ၸႂ်ၵူၼ်းမိူင်း)။
4) သၢၼ်ၶတ်းယႃႈမဝ်းၵမ် ၵူႈၸိူဝ်းၸိူဝ်း။
5) သၢၼ်ၶတ်းၵူၼ်းၵႃႉၵူၼ်း (ၵူၼ်းၼင်ႇၵၼ်ၵဝ်းလႅၼ်ၶၢႆၵိၼ်ၵၼ်)။
6) သိုပ်ႇသၢၼ် ပူၵ်းပွင်ၾိင်ႈၶိူဝ်းလႄႈ ပိုၼ်ၽႄႈလိၵ်ႈလၢႆးပၢႆးပိုၼ်းၵူႈပၢႆးပၢႆး။
7) ၼင်ႇႁိုဝ် ပီႈၼွင်ႉတႆး ႁႅင်းၵၢၼ်ယၢၼ်မိူင်း တေၽွမ်ႉသဵင်ပဵင်းပၢၵ်ႇၵၼ်ၼၼ်ႉ ယုမ်ႇယမ်သေ တေၸွႆႈၵၼ်ႁဵတ်းသၢင်ႈၸွမ်းလၵ်းၼမ်းၼႆႉၵႂႃႇ ၸဵမ်ၸိူဝ်းၼႆႉ။
