မုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇ ၵေႃႇတင်ႈၶွပ်ႈတဵမ် 7 ပီ လုၵ်ႈၸုမ်းႁူမ်ႈၵၼ် ၸတ်းႁဵတ်းပၢင်လူႇတၢၼ်း ၵၢပ်ႈသွမ်းလႄႈ ပၢင်ႁူပ်ႉထူပ်းၵိၼ်ၶဝ်ႈႁူမ်ႈမူႇ၊ ဢိၵ်ႇလူၺ်ႈယိုၼ်ႈမွပ်ႈပၼ် ဝႂ်ယွင်ႈယေႃးၼမ်ႉၸႂ် ၽူႈႁၢပ်ႇၵၢၼ်လႄႈ ပုၵ်ႉၵူဝ်ႇၽူႈမီးၼမ်ႉ ၸႂ် ၸွႆႈထႅမ်ပူၵ်းပွင် တႃႇၵူၼ်းၼမ်။
ဝၼ်းတီႈ 29/9/2019 ယၢမ်းၵၢင်ၼႂ် 9 မူင်း ထိုင် 4 မူင်းဝၢႆးဝၼ်း ယူႇတီႈမုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇ ၸတ်းႁဵတ်းဝၼ်း ၵိူတ်ႇ ၶွပ်ႈတဵမ် 7 ပီ တီႈဝတ်ႉမႂ်ႇတႆး မိူင်းၵွၵ်ႇ ၸိုင်ႈထႆး။
ၼၢင်းထူၺ်းဢိင်ႇ လွႆဢုင်း (ႁွင်ႉ) ၼၢင်းမႂ်ႇ ၵႅမ်ႁူဝ်ပဝ်ႈ 2 မုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ “ မီး ၽူႈယႂ်ႇၵူၼ်းလူင်လၢႆမူႇလၢႆၸုမ်း လႆႈတူင်ႉတၵ်ႉမွၵ်ႇလၢတ်ႈၶေႃႈၵႂၢမ်း လႅၵ်ႈလၢႆႈပၼ်တၢင်းႁူႉ တၢင်းႁၼ်ထိုင်တင်းၼမ်။ ယဝ်ႉၵေႃႈ မီးပီႈၼွင်ႉတႆးႁဝ်းၶႃႈ မႃးၶဝ်ႈပဵၼ်လုၵ်ႈၸုမ်းမႂ်ႇထႅင်ႈၵေႃႈၼမ်။ ၼင်ႇႁိုဝ် ႁဝ်းၶႃႈပေႃးတေမီးႁႅင်းသိုပ်ႇၶတ်းၸႂ် ၵႂႃႇမိူဝ်းၼႃႈထႅင်ႈ” ဝႃႈၼႆ။
ၼႂ်းပၢင်ၶွပ်ႈၶူပ်ႇ 7 ပီတဵမ်ၼႆႉ မီးၸုမ်းလုၵ်ႈႁဵၼ်းသင်ၶၸဝ်ႈမိူင်းၵွၵ်ႇလႄႈ သၢႆၸုမ်းၸၢဝ်းၶိူဝ်းတႆးလၢႆလၢႆတီႈဢိၵ်ႇလူၺ်ႈ မူႇပီႈၸုမ်းၼွင်ႉၼႂ်းၸိုင်ႈထႆး တင်းၼမ် ၶဝ်ႈႁူမ်ႈပၼ်ႁႅင်း။ ၼႂ်းပၢင်ၼႆႉ ယင်းမီးၸၢႆးသိူဝ်ၶမ်းလႄႈ ၶူးတွင်ႉၾႃႉ ၽူႈပွင် ၵၢၼ် ပၢႆးပၺ်ၺႃယိုၼ်းယၢဝ်း ၶူင်းၵၢၼ် SEA လႆႈမႃးတူင်ႉတၵ်ႉမွၵ်ႇလၢတ်ႈလွင်ႈ ပၢႆးပၺ်ၺႃလႄႈ လွင်ႈပီႈၼွင်ႉတႆး လၢႆ မူႇလၢႆၸုမ်း လႆႈႁူမ်ႈႁဵတ်းသၢင်ႈတႃႇၶူင်းၵၢၼ် SEA လႄႈ ပၢႆး IT ဝႃႈၼႆ။
မုၵ်ႉၸုမ်းၸၢဝ်းၶိူဝ်းတႆး ဢၼ်ပိုတ်ႇလုမ်းဝႆႉ ၼႂ်းၸိုင်ႈထႆး တင်းမူတ်း မီး 3 တီႈ မိူင်းၵွၵ်ႇ(ၵုင်းထဵပ်ႈ)၊ ၵဵင်းမႆႇလႄႈ ရယွင်း။ လိူဝ်ၼၼ်ႉ ၵိင်ႇၽႄမုၵ်ႉၸုမ်းၸၢဝ်းၶိူဝ်းတႆး ထႅင်ႈ 2 တီႈသမ်ႉ မိူၼ်ၼင်ႇ ၵိင်ႇၽႄ လမ်းပုၼ်း။ ၵိင်ႇၽႄပရႃႇထုမ်းထႃး ၼီး ၸဵမ်ၸိူဝ်းၼႆႉ။
မုၵ်ႉၸုမ်းၸၢဝ်းၶိူဝ်းတႆးၼႆႉ တူင်ႉၼိုင်ႁဵတ်းသၢင်ႈၸွႆႈထႅမ်လွင်ႈၵိၼ်လူႇလူႉတၢႆပီႈၼွင်ႉတႆး ၼႂ်းမိူင်းထႆး ၵဵပ်းႁွမ်တွမ်ၸူႉ ၶူဝ်းၶွင်ၵိၼ်ယႅမ်ႉတႃႇၵမ်ႉၸွႆႈၽူႈႁၢပ်ႇၵၢၼ်ၸိူဝ်ႉၸၢတ်ႈၼိူဝ်လွႆတႆးလႅင်း ၸဵမ်ၸိူဝ်းၼႆႉ။
လၵ်းၼမ်း(ပေႃႇလသီႇ) ဢၼ်မုၵ်ႉၸုမ်းၸၢဝ်းၶိူဝ်းတႆး ယိပ်းတိုဝ်းဝႆႉ တင်းမူတ်း မီး 7 ၶေႃႈ မိူၼ်ၼင်ႇ –
1) ပၼ်ႁႅင်းၵမ်ႉထႅမ် လၵ်းၼမ်းၶွင်ႇသီႇဢဝ်ၶိုၼ်းၸိုင်ႈတႆး RCSS ။
2) ၸွႆႈၵၼ်ႁဵတ်းသၢင်ႈတႃႇႁႂ်ႈၸိူဝ်ႉၸၢတ်ႈၸိုင်ႈတႆး မီးသုၼ်ႇလႆႈၽဵင်ႇပဵင်းၼႂ်းလုမ်ႈၾႃႉ။
3) ပၼ်ႁႅင်းဢုပ်ႉပိူင်ႇလူၺ်ႈ လွၵ်းလၢႆးတီႇမူဝ်ႇၶရေႇသီႇ (ဢုပ်ႉပိူင်ႇလူၺ်ႈၵၢင်ၸႂ်ၵူၼ်းမိူင်း)။
4) သၢၼ်ၶတ်းယႃႈမဝ်းၵမ် ၵူႈၸိူဝ်းၸိူဝ်း။
5) သၢၼ်ၶတ်းၵူၼ်းၵႃႉၵူၼ်း (ၵူၼ်းၼင်ႇၵၼ်ၵဝ်းလႅၼ်ၶၢႆၵိၼ်ၵၼ်)။
6) သိုပ်ႇသၢၼ် ပူၵ်းပွင်ၾိင်ႈၶိူဝ်းလႄႈ ပိုၼ်ၽႄႈလိၵ်ႈလၢႆးပၢႆးပိုၼ်းၵူႈပၢႆးပၢႆး။
7) ၼင်ႇႁိုဝ် ပီႈၼွင်ႉတႆး ႁႅင်းၵၢၼ်ယၢၼ်မိူင်း တေၽွမ်ႉသဵင်ပဵင်းပၢၵ်ႇၵၼ်ၼၼ်ႉ ယုမ်ႇယမ်သေ တေၸွႆႈၵၼ်ႁဵတ်းသၢင်ႈ ၸွမ်းလၵ်းၼမ်းၼႆႉၵႂႃႇ ၸဵမ်ၸိူဝ်းၼႆႉ။
