မုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇ ႁူဝ်ၵူၼ်း 70 ၵေႃႉ ႁူမ်ႈၵၼ် လိူၵ်ႈတင်ႈ ၽူႈဢွၼ်ႁူဝ် တၼ်းႁဵင်း ႁူဝ်ပဝ်ႈ လႄႈ ၵေႃ ၵမ်ၵၢၼ် တႃႇႁၢပ်ႇၵိုတ်ႉၵၢၼ်ပီ 2019-2020 ၶၢဝ်းတၢင်း 2 ပီ ဝႃႈၼႆ။
ဝၼ်းတီႈ 27/01/2019 ယၢမ်းၵၢင်ၼႂ် 9 မူင်း ထိုင် 5 မူင်းႁူဝ်ၶမ်ႈ ယူႇတီႈၵေႃပွင်ၵၢၼ် မုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇ ၸတ်းႁဵတ်းပၢင်လိူၵ်ႈတင်ႈ တီႈ ABC World သဵၼ်ႈတၢင်း ရၢမ်းၶမ်းႁႅင် ၵိဝ်ႇ 30 ဝဵင်းလူင်မိူင်းၵွၵ်ႇ ၸိုင်ႈထႆး ဝႃႈၼႆ။
ၼၢင်းမႂ်ႇ ၵေႃႉလႆႈႁပ်ႉတၼ်းႁဵင်း ၵႅမ်ႁူဝ်ပဝ်ႈ 2 မုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ “ မုၵ်ႉၸုမ်း ၸၢဝ်းၶိူဝ်းတႆး မိူင်းၵွၵ်ႇ ၼႆႉ မီးပၵ်းပိူင်ဝႆႉ (2) ပီလႂ် ၼိုင်ႈပွၵ်ႈ တေလႆႈမီးပၢင်လိူၵ်ႈတၢင်ႇ ၽူႈဢွၼ်ႁူဝ်ၵေႃႉမႂ်ႇ လႄႈ လႅၵ်ႈလၢႆႈ ၵေႃႇမတီႇ ႁွင်ႈၵၢၼ် ဢၼ်ၵိုင်ႇလႅၵ်ႈလၢႆႈ ၸွမ်းၼင်ႇၼႃႈၵၢၼ်လႄႈလၵ်းၼမ်း မီးဝႆႉၼၼ်ႉသေ ၸင်ႇလႆႈ မီးပၢင်လိူၵ်ႈ တၢင်ႇႁႃ ၽူႈ ဢွၼ်ႁူဝ် ဢၼ်မီးၼမ်ႉၵတ်ႉတၢင်းမေႃလႄႈ ဢွၼ် ႁူဝ်ႁဵတ်းသၢင်ႈၼႃႈၵၢၼ်ၵႂႃႇ။
မုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇၼႆႉ ၸွမ်းၼင်ႇပိူင်လၵ်းၼမ်း မီးဝႆႉ ႁွင်ႈၵၢၼ် တင်းမူတ်း မီး 14 ႁွင်ႈၵၢၼ် ၽူႈၶဝ်ႈ ပဵၼ်လုၵ်ႈၸုမ်းသမ်ႉ မိူင်းၵွၵ်ႇ၊ ရယွင်း၊ ပထုမ်ထႃးၼီးလႄႈ ၵပီႇ တင်းမူတ်း မီးလုၵ်ႈၸုမ်း 629 ၵေႃႉ။ ၵေႃႇမတီႇႁၢပ်ႇ ၵၢၼ်သမ်ႉ 85 ၵေႃႉ။ ၼႂ်း 85 ၵေႃႉၼၼ်ႉ လိူၵ်ႈႁႃၽူႈမီးသုၼ်ႇလႆႈပဵၼ်ႁူဝ်ပဝ်ႈ ၼႂ်းၵေႃႇမတီႇၸုမ်းပွင်ၵၢၼ် ဢၼ်ၵိုင်ႇ ဢၢပ်ႈလႄႈ ႁၼ်လီၽႂ်ၵေႃႉလႂ်ၼၼ်ႉ ၶိုၼ်ႈမႃး 5 ၵေႃႉ ဝႃႈၼႆ။
ၼႂ်း 5 ၵေႃႉၼၼ်ႉ လိူၵ်ႈၶိုၼ်ႈမႃး ဢၼ်လႆႈၶႅပ်းသဵင်ၼမ်တီႈသုတ်းသမ်ႉပဵၼ်ၸၢႆးၼၼ်ႇတေႃး သၼ်လွႆတွၼ်း 24 သဵင်/ၶႅပ်း၊ ၸၢႆးသႅင်ၶိူဝ်း ၼုမ်ႇတႆးပၢၼ်မႂ်ႇ 15 သဵင်/ၶႅပ်း၊ ၸၢႆးလတ်း တိုၼ်းၶိူဝ်းလွႆ 14 သဵင်/ၶႅပ်း၊ ၼၢင်းထူၺ်းဢိင်ႇ ပူႇလွႆဢုင်း 7သဵင်/ၶႅပ်းလႄႈ ၸၢႆးၸွႆႇ 1 သဵင်/ၶႅပ်း ဝႃႈၼႆ။
ပီ 2019-2020 တႃႇၶၢဝ်းတၢင်း 2 ပီၼႆႉ ၸၢႆးၼၼ်ႇတေႃး သၼ်လွႆတွၼ်း ႁူဝ်ပဝ်ႈ မုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇ ၵေႃႉၵဝ်ႇ လႆႈထုၵ်ႇၶတ်းလိူၵ်ႈၶိုၼ်ႈမႃးပဵၼ်ႁူဝ်ပဝ်ႈထႅင်ႈ ဝႃႈၼႆ။
ၼၢင်းမႂ်ႇ လၢတ်ႈဝႃႈ “ ပုၼ်ႈတႃႇၸိူဝ်ႉၸၢတ်ႈ ဝၢၼ်ႈမိူင်း ၽႃႇသႃႇ သႃႇသၼႃႇ ပေႃးတေႁိုဝ်ႈႁိူင်းၶိုၼ်ႈယႂ်ႇၼၼ်ႉ ယူႇ တီႈမုၵ်ႉၸုမ်းၸၢဝ်းၶိူဝ်းတႆး ႁဝ်းၶႃႈသေ တေသူၼ်းတုမ် ပီႈၼွင်ႉတႆးၵူႈတီႈ ၼင်ႇႁိုဝ်ပေႃးတေပွင်ႇၸႂ် လွင်ႈၵၢၼ် ၵူၼ်းတင်းၼမ် လႄႈ ၵၢၼ်မိူင်းၼၼ်ႉ မုၵ်ႉၸုမ်းႁဝ်းၶႃႈ တေၶတ်းၸႂ်ႁဵတ်းသၢင်ႈ ၸွမ်းၼင်ႇလၵ်းၼမ်း ဢၼ်မၵ်း မၼ်ႈဝႆႉၼၼ်ႉယူႇ” ဝႃႈၼႆ။
မုၵ်ႉၸုမ်းၸၢဝ်းၶိူဝ်းတႆးၼႆႉ ယိူင်းဢၢၼ်းလူင် ႁႂ်ႈပဵၼ်တီႈတႆးႁွတ်ႈမိူင်းထႆး ၶွၼ်ႈတုမ်ၵၼ်၊ မိုတ်ႈၵိုဝ်းၸမ်ၸႂ်ၵၼ် မေႃၸွႆႈၵၼ်။ ႁႂ်ႈတႆးႁွတ်ႈမိူင်းထႆး လႆႈၵႆယၢၼ်ၵၢၼ်ႁၢႆႉမိူၵ်ႈ၊ ၽိတ်းမေႃးပေႃႉထုပ်ႉ၊ လၵ်ႉၸူၼ်ၵၼ်သေ ဢမ်ႇၵႃး ႁႂ်ႈၵႆယၢၼ်ပႃးၽေးယႃႈမဝ်းၵမ်။ ပၼ်တၢင်းႁူႉၵၼ်ႁႂ်ႈမေႃယူႇၸွမ်းပၵ်း ၸွမ်းပိူင်မိူင်းထႆး ၸဵမ်ၸိူဝ်းၼႆႉ။
