ၸုမ်းဢူၺ်းလီပွတ်းႁွင်ႇ ၸိူဝ်းတိုၵ်ႉပဵၼ်ပၢင်တိုၵ်းတင်း သိုၵ်းလူင်ပွင်ၸိုင်ႈမၢၼ်ႈၼၼ်ႉ မီးၶၢဝ်ႇဢွၵ်ႇမႃးဝႃႈ ႁူဝ်လိူၼ် တေမႃးၼႆႉ တေႁူပ်ႉဢုပ်ႇၵၼ်တင်း တူဝ်တႅၼ်းလူင်ပွင်ၸိုင်ႈမၢၼ်ႈ ၼႂ်းမိူင်းၶႄႇ ဝႃႈၼႆ။
ႁူဝ်လိူၼ်ဢွၵ်ႊထူဝ်ႊၿိူဝ်ႊ 2018 တေထိုင်ၼႆႉ ၸုမ်းဢူၺ်းလီပွတ်းႁွင်ႇ 3 ၸုမ်း မိူၼ်ၼင်ႇ ၸုမ်း MNDAA၊ ၸုမ်း TNLA လႄႈ ၸုမ်း AA တင်း တူဝ်တႅၼ်းၶွမ်ႊမတီႊလွင်ႈငမ်းယဵၼ် လူင်ပွင်ၸိုင်ႈ တေႁူပ်ႉၵၼ် တီႈဝဵင်းၶုၼ်ႊမိင် ၸႄႈမိူင်းယုၼ် ၼၢၼ် မိူင်းၶႄႇ ထႅင်ႈ ဝႃႈၼႆ။
မိူဝ်ႈဝၼ်းတီႈ 23/09/2018 သိုၵ်းလူင်ပွင်ၸိုင်ႈမၢၼ်ႈ တင်း တပ်ႉသိုၵ်းရၶႅင်ႇ AA ပဵၼ်ပၢင်တိုၵ်းၵၼ် ၼႂ်းၸႄႈ ဝဵင်းပလႅတ်ႉဝႃႉ ဝႃႈၼႆ။
ဢူးၶၢႆႇသုၶ ၽူႈၶၢၼ်ပၢၵ်ႇ တပ်ႉသိုၵ်း ရၶႅင်ႇ AA လၢတ်ႈတီႈႁူင်းပွႆႇသဵင် RFA ဝႃႈ “ ၵဵဝ်ႇလူၺ်ႈလွင်ႈပၢင်တိုၵ်းၼႆႉ တင်းသွင်ၾၢႆႇမီးလွင်ႈလူႉသုမ်းၼင်ႇၵၼ်” ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 05/09/2018 ၼၼ်ႉၵေႃႈ ၸုမ်းဢူၺ်းလီ ပွတ်းႁွင်ႇ 3 ၸုမ်း၊ ၸုမ်း AA ၊ TNLA လႄႈ MNDAA တင်း NRPC ႁူပ်ႉၵၼ် တီႈၸႄႈဝဵင်းၶုၼ်ႊမိင် ၼႂ်းၸႄႈမိူင်းယုၼ်ၼၢၼ်၊ မိူင်းၶႄႇ ၵမ်းၼိုင်ႈယဝ်ႉ ဝႃႈၼႆ။
မိူဝ်ႈဝၼ်းတီႈ 17-19 လိူၼ်ၼႆႉၵေႃႈ ၸုမ်းယိပ်းၵွင်ႈၵၢင်ႇလူင်းလၢႆးမိုဝ်းၵိုတ်းတိုၵ်းတူဝ်ႈမိူင်း NCA ၸုမ်းပႆႇလူင်း လၢႆး မိုဝ်း UNFC ၸုမ်းတိုၵ်ႉလေႃႇတိုၵ်း FPNCC ၶဝ်သၢမ်ၾၢႆႇ ၵႂႃႇႁူပ်ႉၵၼ်တီႈငဝ်းငုၼ်း သိုၵ်းၶၢင် KIA ဝဵင်းလၢႆႇ ၸႃႇ။ ယိူင်း ဢၢၼ်းႁူပ်ႉၵၼ်ၼၼ်ႉ ပိူဝ်ႈတႃႇႁႃၶေႃႈယိူင်းဢၢၼ်း ဢၼ်မိူၼ်ၵၼ်၊ လူင်ႉလႅင်းပွင်ႇၸႂ်ၵၼ် ႁူမ်ႈၵၼ်သၢၼ်မိုဝ်းသၢင်ႈလွင်ႈငမ်းယဵၼ်ၵႂႃႇ ဝႃႈၼႆ။
