ဢိင်ၼိူဝ်ငဝ်းလၢႆးလၢႆလွင်ႈသေ ၼုမ်ႇၸၢႆး သႅၼ်းႁုၼ်ႈမႂ်ႇၵေႃႉၼိုင်ႈ လႆႈၶၢႆႉဝၢၼ်ႈဢွၵ်ႇမိူင်း လတ်းၸူးမိူင်းၸိုင်ႈထႆး ။ထၢင်ႇၸၢတ်ႈပၢၼ်တေလီလိူဝ်သေ မိူဝ်ႈယူႇမိူင်းတႆး ၵၢၼ်ႉၸိုၼ်ႇၶတ်းၸႂ် ၶမ်ႈဝၼ်းၼႂ် ။ တၼ်းႁဵတ်းၵၢၼ် 2-3 ပီၵူၺ်း ယွၼ်ႉၸပ်းတၢင်းပဵၼ်ၶႅၼ်ႊသိူဝ်ႊလႄႈ ထိုင်တီႈ လႆႈတႅပ်းပႅတ်ႈၶႃၶွၼ်ၼိုင်ႈ ။

ဢမ်ႇမုင်ႈဢမ်ႇမွင်းသေ ၵိုင်ႉၵၢင်ႉလႆႈသုမ်းၶႃၵႂႃႇလႄႈ ယၢမ်ႈပဵၼ်ၵူၼ်းႁႅင်းၸႂ်တူၵ်း ထိုင်တီႈဢမ်ႇၶႂ်ႈသူႈၸၢတ်ႈပၢၼ်။ ၵူၺ်းၵႃႈ သမ်ႉၶိုၼ်းလုၵ်ႉၽိုၼ်ႉၸဝ်ႈၵဝ်ႇသေ ဢမ်ႇဝႃႈလွင်ႈၶဵင်ႇတႃႉ မီးသင်ၵေႃႈ ၸိုၼ်ႇယူႇမႃးလႆႈ ။ ၶႃၶွၼ်လဵဝ် သူႈၸၢတ်ႈပၢၼ် ဢမ်ႇယွမ်းၵူၼ်းဢၼ်တဵမ်ထူၼ်ႈလႄႈ ထိုင်တီႈ လိုဝ်းလင် ယူႇၼိူဝ်သူဝ်ႊသျႄႊမီႊတီႊယိူဝ်ႊ။ ထိုင်တီႈ ၶျွင်ႉထီးဝီႊထႆး ယင်းၽိတ်ႈမွၵ်ႇႁွင်ႉဢွၵ်ႇလၢႆးၵၢၼ်ၸွမ်း ။ ၵူၼ်းႁဝ်းၵူႈၵေႃႉၵေႃႈ တၵ်းလူဝ်ႇမေႃၶၢမ်ႈပူၼ်ႉလွင်ႈၶွင်ႈၶမ်ႈလၢႆလွင်ႈသေ မေႃလတ်းၸူးသဵၼ်ႈတၢင်းလီ သၢင်ႈၸဝ်ႈၵဝ်ႇႁႂ်ႈၶိုၼ်ႈယႂ်ႇယူႇ ။

ၵေႃႉဢၼ် ၸပ်းတၢင်းပဵၼ်ၶႅၼ်ႊသိူဝ်ႊသေ လႆႈတႅပ်းၶႃ ၾၢႆႇသၢႆႉပႅတ်ႈ ၶွၼ်ၼိုင်ႈၼႆႉ ၸိုဝ်ႈ ၸၢႆးဢွၼ်ႇၶိူဝ်း ဢႃယု 24 လုၵ်ႈၸၢႆးလုင်းၸူဝ်း ပႃပဵင်း ယူႇၼႂ်းဢိူင်ႇႁမ်းငၢႆး ၸႄႈဝဵင်းမိူင်းၵိုင် ။

မၼ်းၸၢႆးၼႆႉ ၸဵမ်မိူဝ်ႈမေႃႁူႉၵႂၢမ်းမႃး မီးၼမ်ႉၸႂ် ၶႂ်ႈႁၢပ်ႇႁၢမ်ႈၵၢၼ်ၸိူဝ်ႉၸၢတ်ႈ မီးၼမ်ႉၸႂ်တႃႇပုၼ်ႈၵူၼ်းၼမ် ။ မိူဝ်ႈပႆႇၶၢႆႉၶဝ်ႈမိူင်းထႆးၵေႃႈ ယၢမ်ႈၸွႆႈၵၢၼ်ဝၢၼ်ႈၵၢၼ်သူၼ်တီႈဝၢၼ်ႈၵိူတ်ႇမိူင်းၼွၼ်း ၸဝ်ႈၵဝ်ႇမႃးယူႇ ဝႃႈၼႆ။

မိူဝ်ႈၶဝ်ႈမိူင်းထႆးမႂ်ႇမႂ်ႇ သမ်ႉမႅၼ်ႈၽွင်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ လၢမ်း ၽႄႈ လႄႈ ႁႃႁဵတ်းၵၢၼ်ယၢပ်ႇ ။ ၽွင်းပီ 2020-2021 ၼၼ်ႉ တႃႇႁဵတ်းဝတ်းဝႂ်ႁႂ်ႈတဵမ်ထူၼ်ႈၵေႃႈ ဢမ်ႇၸႂ်ႈလွင်ႈငၢႆႈ ။ ႁႃၵိၼ်ၸၢင်ႈ ႁႂ်ႈပေႃး ယဝ်ႉၵႂႃႇ ဝၼ်းလႂ်ဝၼ်းၼၼ်ႉ လိူၼ်လႂ်လိူၼ်ၼၼ်ႉၵူၺ်း ။ ၽွင်းၼၼ်ႉတႄႉ တိၼ်မိုဝ်း ယင်းတိုၵ်ႉတဵမ်ထူၼ်ႈယူႇ ၼႆ မၼ်းၸၢႆးလၢတ်ႈ။

ၵွပ်ႈလႆႈၶၢႆႉလၢႆႈတီႈယူႇတၼ်းသဝ်း လုၵ်ႉမိူင်းတႆး ၶၢႆႉၶဝ်ႈမိူင်းထႆးလႄႈ တႃႇတင်ႈၸၢတ်ႈပၢၼ်မႂ်ႇၼၼ်ႉလႆႈၸိုၼ်ႇတေႉတေႉ ။ ၵၢၼ်ၼၵ်းၵၢၼ်မဝ် ဢမ်ႇသူႈသဵတ်ႈသႅၼ်းမၼ်း။ ပေႃးဝႃႈ ပဵၼ်ၵၢၼ်ႁႃၵိၼ်လဵင်ႉတွင်ႉဢၼ်ထုၵ်ႇၸွမ်းပိူင်ဝၢၼ်ႈပိူၼ်ႈမိူင်းပိူၼ်ႈ ၶတ်းၸႂ်ႁဵတ်းမႃးလၢႆလွင်ႈယူႇ။

ၸၢႆးဢွၼ်ႇၶိူဝ်းၼႆႉ ႁဵတ်းၵၢၼ်ဢမ်ႇသူႈလႆႈလိုဝ်ႈတဵမ်တီႈလႄႈ ႁႅင်းၵမ်ႉတူဝ်ဢႄႇသေ ၵမ်းလိုၼ်း တိတ်းၸပ်းတၢင်းပဵၼ်ၶႅၼ်ႊသိူဝ်ႊတီႈၶႃ ။ ယွၼ်ႉၽႄႈလၢမ်းငၢႆႈလႄႈ သင်ဢမ်ႇတႅပ်းပႅတ်ႈၶႃတႄႉ ၸၢင်ႈထိုင်သၢႆၸႂ် ၼႆ မေႃယႃပၼ်ၾၢင်ႉမၼ်းလၢႆၵမ်း ။

မၼ်းၸၢႆးသိုပ်ႇလၢတ်ႈဝႃႈ ၸူးၸႂ်တႄႉ ဢမ်ႇၶႂ်ႈတႅပ်းပႅတ်ႈသေဢိတ်း တႃႇသုမ်းတိၼ်မိုဝ်းၸဝ်ႈၵဝ်ႇၼႆႉ ဢမ်ႇၶႂ်ႈပဵၼ်သေဢိတ်း ။ ၽွင်းၼၼ်ႉ မၼ်းယင်းလၢတ်ႈမေႃယႃဝႃႈ ပိုင်ႈယႃပၼ်ႁႂ်ႈၶႅၼ်းၽွင်ႈ သဵင်ႈၵႃႈႁိုဝ်ၵေႃႈ တေပၼ် ။ တိူၵ်ႈတီႈဝႃႈ ၸဝ်ႈၵဝ်ႇဢမ်ႇမီးငိုၼ်းတဵမ်ထူၼ်ႈၵေႃႈ တေၵူႈယိမ်ႁိူၼ်းတႂ်ႈႁိူၼ်းၼိူဝ်သေပၼ်ၼႆလူးၵွၼ်ႇ ။ဝႃႈၼၼ်သေတႃႉ မေႃယႃလၢတ်ႈၶေႃႈလဵဝ်ဝႃႈ ပေႃးဢမ်ႇတႅပ်းၵေႃႈ ယွၼ်ႉပဵၼ်ႁၢဝ်ႈႁႅင်းလႄႈ တေဢမ်ႇၸၢင်ႈယူႇၵႂႃႇလႆႈႁိုင် ၼႆယူႇ။

ၽႂ်ၵေႃႈ ႁူႉတေဢဝ်သၢႆၸႂ်ပဵၼ်ယႂ်ႇၵူၺ်းလႄႈ မၼ်းၸၢႆးၵေႃႈ ၵႃႈလႆႈတႅပ်းတတ်း တႃႇတႅပ်းၶႃ ဢွၵ်ႇပႅတ်ႈ ။ မၼ်းၸၢႆးလႆႈၶဝ်ႈႁူင်းယႃတတ်းၶႃၶွၼ်ၼိုင်ႈပႅတ်ႈ မိူဝ်ႈဝၼ်းတီႈ 07/02/2024 ။ တႄႇၼၼ်ႉမႃး မၼ်းၸၢႆးယဵၼ်းပဵၼ်ၵူၼ်းဢၼ်ၶိူင်ႈဢႅင်ႇၵႃႇဢမ်ႇတဵမ်ႈထူၼ်ႈ ။

မိူဝ်ႈပႆႇပဵၼ်တၢင်းပဵၼ်သင်တႄႉ ႁဵတ်းၵၢၼ်လဵင်ႉလူပေႃႈမႄႈလႆႈ လဵင်ႉလူပႃးပီႈၼွင်ႉလႆႈလူးၵွၼ်ႇ ယွၼ်ႉဝႃႈ ပဵၼ်လုၵ်ႈၵေႃႉယႂ်ႇသုတ်းလႄႈ ၶတ်းၸႂ်ႁႂ်ႈပဵၼ်ၵူၼ်းၼႂ်းႁိူၼ်းလႆႈပိုင်ႈမႃးတႃႇသေႇ ၼႆယူႇ ။

ဝၢႆးသေ သုမ်းၶႃ ၶွၼ်ၼိုင်ႈယဝ်ႉတႄႉ တႃႇတေႁဵတ်းၵၢၼ်ၼၵ်းၵၢၼ်မဝ် ၸွမ်းၼင်ႇႁႅင်းၸဝ်ႈၵဝ်ႇမီးၼၼ်ႉတႄႉဢမ်ႇလႆႈထႅင်ႈယဝ်ႉ ။ ပေႃးဝႃႈ ၶိူင်ႈဢႅင်ႇၵႃႇတူဝ်ၶိင်းၵူၼ်း ဢမ်ႇမီး ပုတ်းၶၢတ်ႇသေဢၼ်ဢၼ်ယဝ်ႉတႄႉ ၵၢၼ်ၵေႃႈ ႁႃႁဵတ်းယၢပ်ႇတေႉတေႉၼႆ မၼ်းၸၢႆးလၢတ်ႈၼႄတူဝ်ထူပ်းၼင်ႇၼႆ –

ဝၢႆးသေ ဢႅင်ႇၵႃႇဢမ်ႇတဵမ်ထူၼ်ႈယဝ်ႉၼႆၵေႃႈ လႆႈတူၵ်းသုမ်းမူတ်းဢေႃႈ ။တူၵ်းသုမ်းလွင်ႈၼႃႈၵၢၼ် ။ ငိုၼ်းဢၼ်ၸဝ်ႈၵဝ်ႇႁႃမႃး ။ ၵေႃႈ ၶၢဝ်းတၢင်း သွင်သၢမ်ပီၼႆႉၼႆ သိုဝ်ႉရူတ်ႉလႆႉ ၽွၼ်ႇရူတ်ႉလႆႈႁင်းၵူၺ်း ။ ယဝ်ႉၵေႃႈ လဵင်ႉလူပေႃႈမႄႈပီႈၼွင်ႉလႆႈထႅင်ႈ။မီးငိုၼ်းၵဵပ်းထႅင်ႈ။ၽိူဝ်ႇဝႃႈ လႆႈတႅပ်းၶႃပႅတ်ႈယဝ်ႉၼႆ ငိုၼ်းဢၼ်ၸဝ်ႈၵဝ်ႇႁႃမႃးၵေႃႈ လႆႈဢဝ်ၵႂႃႇပၼ်မေႃယႃမူတ်း။ငိုၼ်းၵဵပ်းတူဝ်ၸဝ်ႈၵဝ်ႇသေ ပႃးငိုၼ်းပေႃႈမႄႈထႅင်ႈ။ၶမ်းတူဝ်ၵဝ်ႇၵေႃႈ လႆႈၶၢႆပႅတ်ႈ။ရူတ်ႉၸိူဝ်းၼႆႉၵေႃႈ လႆႈၶိုၼ်းပၼ်တီႈႁၢၼ်ႉမၼ်းမူတ်း ၽွင်းယၢမ်းၼၼ်ႉၼႆ ၸႂ်တူၵ်းၼႃႇၶႃႈ

ၽိူဝ်သေ လႆႈသုမ်းၶိူင်ႈဢႅင်ႇၵႃႇတူဝ်ၶိင်းၸဝ်ႈၵဝ်ႇၵႂႃႇပိူင်ၼိုင်ႈယဝ်ႉ ငိုၼ်းၶမ်းၵေႃႈ မိူၼ်ပွႆႇလွင်ႈၸွမ်းၼမ်ႉ ဢမ်ႇလိူဝ် ဢမ်ႇၵိုတ်းသင် ။ ၽွင်းၼၼ်ႉ တႃႇမီးႁႅင်းၸႂ်ၼၼ်ႉဢမ်ႇႁၼ်သဵၼ်ႈတၢင်းမၼ်း။

ဝႃႈၼၼ်သေတႃႉ ယင်း မီးၵူၼ်းယူႇဢိူမ်ႈၸမ်ယူႇလႄႈ တုၵ်ႉၵေႃႈ ယင်းယႃၸႂ်လႆႈယူႇၽွင်ႈ ။ ၵူၺ်းၵႃႈ ၽိူဝ်ႇတႅပ်းၶႃယဝ်ႉ ပႆႇတၼ်းလႆႈလိူၼ် ၵေႃႉပဵၼ်မေးၼၢင်းသမ်ႉ ပၢႆႈပႅတ်ႈထႅင်ႈလႄႈ ယိင်ႈၶႅၼ်းႁဵတ်းႁႂ်ႈ ၸၢႆးဢွၼ်ႇၶိူဝ်း တိူဝ်ႉၸႂ် ထၢတ်ႈၸႂ်တူၵ်းထႅင်ႈ ၼႆ မၼ်းၸၢႆးလၢတ်ႈ။

ဝၢႆးၼၼ်ႉ ယွၼ်ႉဢမ်ႇၶႂ်ႈႁႂ်ႈ ၵူၼ်းႁိမ်းႁွမ်းယၢပ်ႇၸႂ်ၸွမ်း တူဝ်ၸဝ်ႈၵဝ်ႇလႄႈ ႁူႉတူဝ်ၵဝ်ႇဝႃႈ ဢမ်ႇတဵမ်ထူၼ်ႈသေတႃႉ ၶတ်းၸႂ်ဢွၵ်ႇႁိူၼ်း လူၺ်ႈဢမ်ႇမီးတိုၼ်းလၢင်းသင် ။ တေၵိၼ်ၸၢင်ႈပိူၼ်ႈၵေႃႈ ဢမ်ႇႁပ်ႉလႄႈ ထိုင်တီႈပေႃးလႆႈ တႅပ်းတတ်းသဵၼ်ႈၸႂ် တေႁဵတ်းၵူၼ်းယွၼ်း ၼႆယူႇ။

ဝူၼ်ႉသင်ဢမ်ႇမႃးသင်လႄႈ မၼ်းၸၢႆးႁဵတ်းပဵၼ်ၵူၼ်းယွၼ်းသေ ယူႇၸွမ်းၵၢတ်ႇလူင်ၼႂ်းၵဵင်းမႂ်ႇ ယူႇၵမ်းၼိုင်ႈ ။ ၺႃးၵူၼ်းၼမ်ၵူၼ်းလၢႆ ထၢင်ႇလဵၵ်ႉ သၢင်းၽႅပ်ႉ ႁၼ်မဝ်ၼိူဝ်မၼ်းၸၢႆးတေႉတေႉဝႃႈဝႃႈ ထိုင်တီႈ တေဢမ်ႇငွၵ်ႈႁူဝ်လႆႈ ။ ၵေႃႉပဵၼ်ပေႃႈမႄႈ ယဵၼ်ႉသီးၸႂ်ဢမ်ႇလႆႈယဝ်ႉလႄႈ လႄႇႁႃ ႁွင်ႉဢဝ်ပွၵ်ႈၶိုၼ်းႁိူၼ်း ၼႆ မၼ်းၸၢႆးလၢတ်ႈ ။

မိူဝ်ႈပွၵ်ႈယူႇႁိူၼ်းၶိုၼ်းၼၼ်ႉ မၼ်းၸၢႆးသမ်ႉပေႃး ၸပ်းတၢင်းပဵၼ်ပၢႆးၸႂ်ထႅင်ႈယဝ်ႉၼႆ မၼ်းၸၢႆးယိုၼ်တူဝ်လၢတ်ႈဝႃႈ – “ ဢမ်ႇလၢတ်ႈတေႃႇၽႂ် ၊ ပေႃႈမႄႈၵေႃႈ ပၼ်ႁႅင်းၸႂ်ပေႃးတိူၵ်ႈ ၊ ၽႂ်ဝႃႈသင်ၵေႃႈ ဢမ်ႇၶႂ်ႈထွမ်ႇ ၊ ၶႂ်ႈဢဝ်ၵၢင်ၸႂ်ၸဝ်ႈၵဝ်ႇဝႃႈၵူၺ်း ။ ပေႃးမီးၵူၼ်းမႃးၸီႉၸမ်ႈၼႃႇပူၼ်ႉတီႈၵေႃႈ ပၢႆၸႂ်လမ်ဢွၵ်ႇတေႃးသႃႉလူးၵွၼ်ႇ ၼႆယဝ်ႉ။ ယၢမ်းၼၼ်ႉ ဢမ်ႇၶႂ်ႈတေႃႇၼႃႈၽႂ်သေ ၵႂႃႇၼင်ႈႁႆႈယူႇၵေႃႉလဵဝ် ၸွမ်းတႂ်ႈတူၼ်ႈမႆႉ ၸွမ်းႁိမ်းၾင်ႇတၢင်းၸိူဝ်းၼႆႉ မွၵ်ႈၶၢဝ်းတၢင်း 2 လိူၼ်ၼႆယူႇ

ၾၢႆႇၼိုင်ႈၵေႃႈ ၽွင်းၼၼ်ႉ မၼ်းၸၢႆးယင်းလဵၼ်ႈၾူၼ်း လဵၼ်ႈဢွၼ်ႊလၢႆႊ တူၺ်းသူဝ်ႊသျႄႊမီႊတီႊယိူဝ်ႊယူႇလႄႈ လႆႈၵႂႃႇႁၼ် ၶိပ်ႉဝီႊတီႊဢူဝ်ႊ လွင်ႈၵူၼ်းၼွၵ်ႈမိူင်း ၵေႃႉၼိုင်ႈ ပိူင်ပဵၼ်ငၢႆးၵၼ်တၢင်းတူဝ်ႇၸဝ်ႈၵဝ်ႇ။ ၵူၼ်းၵေႃႉၼၼ်ႉ ယင်းဢမ်ႇယွမ်းၵၢၼ်ႉၸၢတ်ႈပၢၼ် ၸိုၼ်ႇၶတ်းၸႂ် ၼႂ်းၸၢတ်ႈပၢၼ်ၸဝ်ႈၵဝ်ႇလႄႈ မၼ်းၸၢႆးၵေႃႈ ၸင်ႇဢဝ်လွင်ႈၼၼ်ႉ ပဵၼ်တွၼ်ႈသွၼ်သေ မေႃမႄးတူဝ်မႄးၸႂ်မႃး ။ ၵူၺ်းၵႃႈ ၵူၼ်းၼႆႉ ၵႃႈပေႉၶႂ်ႈလႆႈႁႅင်းၸႂ်တီႈလႂ်ၵေႃႈ ယဝ်ႉ ပေႃးတူဝ်ၵဝ်ႇ ဢမ်ႇလုၵ်ႉႁဵတ်းတႄႉ ဢမ်ႇမီးလွင်ႈသင် ၼႆ မၼ်းၸၢႆးသိုပ်ႇလၢတ်ႈၼင်ႇၼႆ-

ပေႃးႁဝ်းတူၵ်းသုမ်းၵႂႃႇ သေၸိူဝ်ႉသေလွင်ႈၼႆ ယႃႇပေဝူၼ်ႉဝႃႈ ၵူၼ်းၵေႃႉၼၼ်ႉၵေႃႉၼႆႉ တေမႃးပၼ်ႁႅင်းၵဝ်။ ဢၼ်လမ်ႇလွင်ႈတီႈသုတ်းၼႆႉ ႁႅင်းၸႂ်ၼႆႉ ယူႇတီႈတူဝ်ၵဝ်ႇၼႆႉ ၵမ်းသိုဝ်ႈ။ယူႇတီႈတူဝ်ၸဝ်ႈၵဝ်ႇႁေ တေၽုတ်းဢွၵ်ႇမႃးၼႂ်းတူဝ်ၸႂ်ၸဝ်ႈၵဝ်ႇၵမ်းသိုဝ်ႈ။တေဢွၵ်ႇမႃးၼႂ်းၸႂ်ၸဝ်ႈၵဝ်ႇဝႃႈ တူဝ်ၵဝ်ႇတေႁဵတ်းသင် ။ဢၼ်ႁဵတ်းႁႂ်ႈၶႃႈ လုၵ်ႉတီႈၸုတ်ႇၼၼ်ႉမႃးလႆႈၵေႃႈ ယူႇတီႈတူဝ်ၸႂ်ႁဝ်းၼႆႉၵမ်းသိုဝ်ႈယဝ်ႉ။ၵႂႃႇႁၼ်ႁႅင်းၸႂ်ဢၼ်ၼၼ်ႉဢၼ်ၼႆႉသေတႃႉ သင်ဝႃႈ ၸဝ်ႈၵဝ်ႇဢမ်ႇလူင်းမိုဝ်းၸွမ်းမၼ်းၵေႃႈ ဢမ်ႇပဵၼ်သင်ၵႂႃႇလႆႈ

မၼ်းၸၢႆး ပၢၵ်ႈပႅတ်ႈတၢင်းၵူဝ်တၢင်းဢၢႆ ယွမ်းႁပ်ႉပိူင်ပဵၼ်တေႉမီးတေႉၸဝ်ႈၵဝ်ႇသေ ႁႃလၢႆးတၢင်းၸုၵ်းၸင်ႈၼိူဝ်တူဝ်ၵဝ်ႇမႃး ။ ထိုင်တီႈဝႃႈ ဢမ်ႇမီးတိုၼ်းလၢင်း ၶိူင်ႈဢႅင်ႇၵႃႇ ဢမ်ႇတဵမ်ထူၼ်ႈယဝ်ႉသေတႃႉ မၼ်းၸၢႆး ဝႆႉၸႂ်ဝႃႈ ဢၼ်လူႉၼႆႉ မီးပိူင်လဵဝ်ၵူၺ်း ဢၼ်ပႆႇလူႉ ၼႂ်းတူဝ်ႁဝ်းၼႆႉ မီးထႅင်ႈတင်းၼမ် ။ ဝၢႆးသေ မၼ်းၸၢႆး ဝူၼ်ႉလႆႈလီယဝ်ႉ ၸင်ႇတႄႇႁႃၵပ်းသိုပ်ႇ ၵူၼ်းၸိူဝ်းၵႃႉၶၢႆၼိူဝ်ဢွၼ်ႊလၢႆႊ ၸိူဝ်းၼႆႉသေ တႄႇၵၢၼ်ၵႃႉၶၢႆမႃး ။

မၼ်းၸၢႆး ပႆၸွမ်းသဵၼ်ႈတၢင်းဢၼ်ပွင်ပဵၼ်လႆႈတီႈသုတ်း။ ဢဝ်တီႈယူပ်ႈယွမ်း ၸုတ်ႇဢူၼ်ႈ လႅၵ်ႈပဵၼ် ၸုတ်ႇၶႅင်သေ ၶတ်းၸႂ် ။ မၼ်းၸၢႆး မၼ်ႈၸႂ်ဝႃႈ ဢမ်ႇမီးၶႃၶွၼ်လဵဝ်ၵူၺ်း မိုဝ်းတိုၵ်ႉလီတင်းသွင်ၶွၼ် မၢၵ်ႇတႃတိုၵ်ႉတူၺ်းႁၼ်လႆႈတင်းသွင်ၾၢႆႇ ႁူယင်းတိုၵ်ႉလီ ၼႆ တႄႇၵႂႃႇ တူဝ်ၵဝ်ႇမေႃပၼ်ႁႅင်းတူဝ်ၵဝ်ႇမႃး ။ တေႃႇပေႃးထိုင် ႁဵၼ်းႁူႉ မေႃၶၢႆၵုၼ်ႇၼိူဝ်ဢွၼ်ႊလၢႆႊ လႆႈၼမ်ႉမျၢတ်ႈၼမ်ႉတွၼ်းမႃး ထိုင်တီႈ ပေႃးမီးငိုၼ်းၸူၵ်းငိုၼ်းၸၢႆႇ ဢႅဝ်ႇထိုင်မိူင်းတႂ်ႈမိူင်းၼိူဝ်လႆႈ။

ၽွင်းမိူဝ်ႈပဵၼ် ၵူၼ်းၵႃႉၵုၼ်ႇၼိူဝ်ဢွၼ်ႊလၢႆႊယူႇၼၼ်ႉၵေႃႈ ယင်းၺႃးၵူၼ်းမႃးသႄႉမႃးၼႄး ၵဵဝ်ႇၵပ်းလွင်ႈ ၶိူင်ႈဢႅင်ႇၵႃႇဢမ်ႇတူၼ်ႈထူၼ်ႈ ။ ၵူၺ်းၵႃႈ မၼ်းၸၢႆး ၶတ်းၸႂ်ၶၢမ်ႈပူၼ်ႉ ၶေႃႈၸႃႉၸိူဝ်းၼၼ်ႉသေ ၶတ်းၸႂ် သၢင်ႈၶေႃႈလီၶိုၼ်ႈမႃးႁႂ်ႈၵူၼ်းၼမ်ႁပ်ႉႁူႉႁပ်ႉႁၼ်လႆ ၼႆယဝ်ႉ။

လွင်ႈတူင်ႉၼိုင်မၼ်းၵူႈဝၼ်းဝၼ်း ၼၼ်ႉ မၼ်းၸၢႆးတၢင်ႇၼႄၼိူဝ်သူဝ်ႊသျႄႊမီႊတီႊယိူဝ်ႊလႄႈ မီးၵူၼ်းယွင်ႈဢၢမ်းမၼ်းၸၢႆးၼမ် ၊ ၵူၼ်းႁူႉၸၵ်းၼမ် ၊ ပဵၼ်ၵူၼ်းမီးၶႃၶွၼ်လဵဝ်သေ လႄႇဝၢၼ်ႈလၢဝ်းမိူင်းလႆႈလႄႈ ႁဵတ်းႁႂ်ႈၵူၼ်းၼႂ်းမိူင်းထႆး သူၼ်ၸႂ်မႃးၼမ် ။ ထိုင်တီႈ ၶျွင်ႉထီးဝီးထႆး ႁွင်ႉၵႂႃႇဢွၵ်ႇလၢႆးၵၢၼ်ၸွမ်း။

ၽွင်းဢွၵ်ႇၶၢဝ်းတၢင်းၵေႃႈ ၵပ်းသိုပ်ႇမိုတ်ႇၵိုဝ်းပႃးၵူၼ်းၸိူဝ်းဢမ်ႇၶႅင်ႇႁႅင်း ၵူၼ်းၸိူဝ်းၶိူင်ႈဢႅင်ႇၵႃႇ ဢမ်ႇတဵမ်ထူၼ်ႈၸိူဝ်းၼႆႉလႄႈ မၼ်းၸၢႆးႁပ်ႉႁူႉဝႃႈ ၼႂ်းလုမ်ႈၾႃႉၼႆႉ ဢမ်ႇမီးၵေႃႉလဵဝ် ဢၼ်လႆႈထူပ်းလွင်ႈၶွင်ႈၶမ်ၼႂ်းၸၢတ်ႈပၢၼ်။

မၼ်းၸၢႆးယင်းသိုပ်ႇလၢတ်ႈဝႃႈ လုၵ်ႉတီႈတူဝ်ထူပ်းၸဝ်ႈၵဝ်ႇယၢမ်ႈလႆႈတုၵ်ႉလႆႈမႆႈမႃးၼႆႉသေ ၶႂ်ႈပဵၼ်တီႈပိုင်ႈ ၵူၼ်းၸိူဝ်းဢမ်ႇၶႅင်ႁႅင်း ၵူၼ်းၸိူဝ်းၶိူင်ႈဢႅင်ႇၵႃႇဢမ်ႇတဵမ်ထူၼ်ႈဢမ်ႇလီၸိူဝ်းၼႆႉ ။ ၼင်ႇႁိုဝ် ၵူၼ်းၸိူဝ်း ၽဝဢမ်ႇတဵမ်ထူၼ်ႈမိူၼ်ၵၼ် တေဢမ်ႇယွမ်းၵၢၼ်ႉၸၢတ်ႈပၢၼ်ၼၼ်ႉ ၶႂ်ႈပဵၼ်တီႈပၼ်ႁႅင်း ၊ ပေႃးပွင်ပဵၼ်လႆႈ ဝၼ်းၼိုင်ႈမႃး ၶႂ်ႈသၢင်ႈႁႂ်ႈမီးမႃးဢွင်ႈတီႈ ဢၼ် ၵူၼ်းၸိူဝ်းၶိူင်ႈဢႅင်ႇၵႃႇဢမ်ႇတဵမ်ထူၼ်ႈ လူးၵွၼ်ႇ ဝႃႈၼႆ။