ၼႂ်းဝၼ်းတီႈ 16 လိူၼ်ၵျုၼ်ႊ ယၢမ်းႁူဝ်ၶမ်ႈၼၼ်ႉ ႁိူဝ်းမိၼ်ၵျႅတ်ႊ သုၼ်ႇတူဝ်လမ်းၼိုင်ႈ ယၢတ်ႇတူၵ်း ႁိမ်းၶၢင်ႈတၢင်း တီႈၼိုင်ႈသေၾႆးမႆႈ ၼႂ်းၸႄႈတွၼ်ႈထႅၵ်ႊသႅၵ်ႊ မိူင်းဢမေႊရိ ၵၼ်ႊ။
ၽွင်းၸုမ်းၸွႆႈထႅမ်ၶဝ် ပႆႇတၼ်းထိုင် ဢွင်ႈတီႈပဵၼ်ၽေးၵိုင်ႉၵၢင်ႉၼၼ်ႉ ၵူၼ်းၵႂႃႇမႃးၸွမ်းတၢင်း ဢွၼ်ၵၼ်ၸွႆႈဢဝ်တူဝ် ၵူၼ်းမီးၼႂ်းႁိူဝ်းမိၼ်ဢွၵ်ႇမႃး။ ၸိူဝ်းၶဝ်ဢဝ်သဵမ် ၶွၼ်ႉၸွၵ်းသေ တွႆႇယႃႉ မၢၼ်ႇ ၽၵ်းတူႁိူဝ်းမိၼ်၊ ၵမ်ႈၽွင်ႈဢဝ် မေႃႈၼမ်ႉထၢတ်ႈၶႄၾႆး (မီးသတ်ဆေးဘူး) သေ သိတ်းၶႄၾႆးဢၼ်တိုၵ်ႉ မႆႈႁိူဝ်းမိၼ်ဝႆႉၼၼ်ႉ ၼႆယဝ်ႉ။
ဝၢႆးၼၼ်ႉယဝ်ႉ ၸုမ်းပလိၵ်ႈ၊ ၾၢႆႇၶႄႇၾႆး၊ ၾၢႆႇၸွႆႈထႅမ် တင်း ၵူၼ်းမိူင်း ႁူမ်ႈၵၼ်ၸွႆႈ ထႅမ် ၵူၼ်းၸိူဝ်းၶမ်ဝႆႉယူႇ ၼႂ်းႁိူဝ်းမိၼ်ၼၼ်ႉဢွၵ်ႇမႃး ဝႃႈၼႆ။
ႁိူဝ်းမိၼ်လမ်းၼၼ်ႉ လုၵ်ႉတီႈ Los Cabos မႅၵ်ႊသီႊၵူဝ်ႊသေ တေဢၢၼ်းမိၼ်ၵႂႃႇတီႈ ဝဵင်း Austin ၸႄႈတွၼ်ႈ ထႅၵ်ႊသႅၵ်ႊ၊ ယွၼ်ႉၶိူင်ႈၸၢၵ်ႈမီးပၼ်ႁႃလႄႈ ႁိူဝ်းမိၼ်တူၵ်း ၊ ၵွၼ်ႇတေတူၵ်းၼၼ်ႉ ၽူႈၶပ်းႁိူဝ်းမိၼ် လႆႈပွင်ႇၶၢဝ်ႇၵႂႃႇၸူးတီႈ ဝၢင်းႁိူဝ်းမိၼ်ဝႆႉယူႇ ဝႃႈၼႆ။
တီႈၼိူဝ်ႁိူဝ်းမိၼ်ၼၼ်ႉ မီးၵူၼ်းၶီႇမႃးၸွမ်းတၢင်းမူတ်း 6 ၵေႃႉ၊ ၼႂ်းၼၼ်ႉ တၢႆၵႂႃႇ ၵေႃႉၼိုင်ႈ၊ တႃႇ 5 ၵေႃႉတႄႉ လႆႈသူင်ႇယူတ်းယႃတူဝ်ဝႆႉတီႈႁူင်းယႃ ။ ႁိူဝ်းမိၼ်ယၢတ်ႇ တူၵ်းသႂ်ႇ တုမ်ႉတိူဝ်ႉပႃးရူတ်ႉၵႃးလမ်းၼိုင်ႈ ဢၼ်တိုၵ်ႉလႅၼ်ႈဝႆႉၼိူဝ်သဵၼ်ႈတၢင်း၊ ရူတ်ႉၵႃးၵေႃႈမီးလွင်ႈလူႉၵွႆၸွမ်းၽွင်ႈ- လႆႈႁူႉၼင်ႇၼႆ။
ၶလိပ်ႉငဝ်းႁၢင်ႈသဵင် လွင်ႈၵူၼ်းမိူင်းဢွၼ်ၵၼ်ၸွႆႈထႅမ် ၵူၼ်းၼႂ်းႁိူဝ်းဢွၵ်ႇၼၼ်ႉ ၸွတ်ႇၽႄႈၵႂႃႇ တီႈၼိူဝ်သိုဝ်ႇတူင်ႇဝူင်းဝႆးၽႂ်း ႁဵတ်းႁႂ်ႈၵူၼ်းတၢင်းၼမ် ဢွၼ်ၵၼ်ယုၵ်ႉယွင်ႈ တၢင်း ႁတ်းႁၢၼ် လႄႈ ၼမ်ႉၸႂ်လီ ဢၼ်မေႃ ၸွႆႈထႅမ်ၵၼ် ။
တီႈႁိူဝ်းမိၼ်တူၵ်းၼႆႉ ယၢၼ်ၵၼ်တၢင်း ဝၢင်းႁိူဝ်းမိၼ် လႃႊရီႊတူဝ်ႊမွၵ်ႈ 150 ၵီႊလူဝ်ႊမီႊတိူဝ်ႊ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ