ၶိူင်ႈမိၼ်တၢင်ႇၵူၼ်းဝႆႈၽြႃး တီႈမိူင်းဢိၼ်ႊတီႊယိူဝ်ႊလမ်းၼိုင်ႈ ယၢတ်ႇတူၵ်းထႅင်ႈတီႈသၼ်လွႆႁိမဝၼ်ႊတႃႇ ၵူၼ်းၶီႇၵႂႃႇၸွမ်း 7 ၵေႃႉ ပႃးလုၵ်ႈဢွၼ်ႇၵေႃႉၼိုင်ႈ လူႉတၢႆသဵင်ႈ ဝႃႈၼႆ။

ဝၼ်းတီႈ 15/06/2025 ၼႆႉ မိူဝ်ႈၶိူင်ႈမိၼ် ၽွင်းလုၵ်ႉတီႈ ၵျွင်းၽြႃးၵီႊတႃႊၼႅတ်ႉ ၸႄႈမိူင်းဢုတႃႊရႃႊၶၢၼ်ႊ မိၼ်ၶိုၼ်ႈၵႂႃႇ လႆႈပဵၼ်ၽေးၵိုင်ႉၵၢင်ႉယၢတ်ႇတူၵ်းသေ ၾႆးမႆႈ၊ ႁဵတ်း ႁႂ်ႈၵူၼ်းလူႉတၢႆၵႂႃႇတင်းသဵင်ႈ ဝႃႈၼႆ။

ၵျွင်းၽြႃး ၵီႊတႃႊၼႅတ်ႉၼႆႉ မီးဝႆႉတီႈတၢင်းသုင် 3,584 ထတ်း၊ ၶၢဝ်းရႃႇသီႇၸိူင်ႉၼႆ ၵႆႉမီးၵူၼ်းၵႂႃႇဝႆႈသႃ တီႈၵျွင်းၽြႃးၼမ်၊ ၽူႈမၢၵ်ႈၵူၼ်းမီးၶဝ်သမ်ႉ ၵႆႉၸၢင်ႈၶိူင်ႈမိၼ်ဢွၼ်ႇတင်းလမ်းသေ ၵႂႃႇမႃးတီႈၵျွင်းၽြႃး ဢၼ်မီးၼိူဝ်သၼ်လွႆ ႁိမဝၼ်ႊတႃႇၼၼ်ႉ ဝႃႈၼႆ။

မိူဝ်ႈလိူၼ်မေႊ ပူၼ်ႉမႃးၼၼ်ႉၵေႃႈ ၶိူင်ႈမိၼ်ဢွၼ်ႇလမ်းၼိုင်ႈ ၽွင်းမိူဝ်ႈတၢင်ႇၵူၼ်း ၵႂႃႇတီႈၵျွင်းၽြႃး ၼိူဝ်သၼ်လွႆၼၼ်ႉ လႆႈယၢတ်ႇတူၵ်းၵႂႃႇပွတ်းတၢင်းသေ မီးၵူၼ်းလူႉတၢႆ 6 ၵေႃႉ။

မိူၼ်ၼႆ ပူၼ်ႉမႃးလၢႆဝၼ်းၼႆႉၵူၺ်း ၶိူင်ႈမိၼ် သၢႆၵၢၼ်မိၼ် Air India လမ်းၼိုင်ႈ ပဵၼ်ၽေးၵိုင်ႉၵၢင်ႉယၢတ်ႇတူၵ်း မီးၵူၼ်းလူႉတၢႆထိုင် 240 ပၢႆ ၊ ၵမ်ႈၼမ် ပဵၼ်ၵူၼ်းမိူင်း ဢိၼ်ႊတီႊယိူဝ်ႊ ဝႃႈၼႆ။