ဝၼ်းတီႈ 9 ဝၼ်းလိူၼ်ၵျူႊလၢႆႊ တႄႇယၢမ်းၵၢင်ၼႂ်ၸဝ်ႉမႃး ၾူၼ်တူၵ်းႁၢဝ်ႈႁႅင်း ၼႂ်းဝဵင်းတေႊလီႊ လႄႈ ၸႄႈမိူင်းႁႃႊယႃႊၼႃႊ ၸိူဝ်းၼႆႉဢမ်ႇထၢတ်ႇလႄႈ ႁဵတ်းႁႂ်ႈၼမ်ႉလုပ်ႇၼွင်းထူမ်ႈႁိူၼ်းယေး သဵၼ်ႈတၢင်းႁၢဝ်ႈႁႅင်း ထိုင်တီႈ ႁွင်ႈၵၢၼ်ၾိင်ႈၾႃႉရႃႇသီႇ ၼႂ်းမိူင်းဢိၼ်ႊတီႊယိူဝ်ႊ လႆႈပိုၼ်ၽၢဝ်ႇမၵ်းမၼ်ႈဝႆႉ ပဵၼ်ၸၼ်ႉသီလႅင် မီးၽေးၼမ်လိူဝ်တီႈသုတ်းၼႆ သိုဝ်ႇၶၢဝ်ႇရႅၵ်ႊတိူဝ်ႊ ႁၢႆးငၢၼ်းဝႆႉၼင်ႇၼႆ။

ယွၼ်ႉၼမ်ႉလုပ်ႇၼွင်းထူမ်ႈၼႂ်းဝဵင်းႁၢဝ်ႈႁႅင်းလႄႈ သဵၼ်ႈတၢင်းၵႂႃႇမႃး ၸွမ်းႁိမ်းႁွမ်း ၶူင်ႇႁိူဝ်းမိၼ် ဝဵင်းတေႊလီႊ ၼၼ်ႉၵေႃႈ ၺႃးၼမ်ႉထူမ်ႈဝႆႉလႄႈ ၾၢႆႇၽူႈမီးပုၼ်ႈၽွၼ်း ၶူင်ႇႁိူဝ်းမိၼ်ဝဵင်းတေႊလီႊၵေႃႈ လႆႈၸႅင်ႈလူင်ႈၼႃႈဝႃႈ – ၵၢၼ်ဢွၵ်ႇၶၢဝ်းတၢင်း ၸၢင်ႈထိူင်းၵႂႃႇလိူဝ်ၵဝ်ႇ- ဝႃႈၼႆ။

ၾူၼ်တူၵ်းႁႅင်း လိၼ်ယူတ်ႇတီႈဝႃႊယႃႊၼၢတ်ႉသ် ၸႄႈမိူင်းၵီႊယႃႊရႃႊ မိူင်းဢိၼ်ႊတီႊယိူဝ်ႊပွတ်းၸၢၼ်းၼၼ်ႉသေ ၵူၼ်းလူႉတၢႆၵႂႃႇဢေႇသုတ်း 4 ၵေႃႉ၊ ၼမ်ႉလုပ်ႇၼွင်းထူမ်ႈ ၼႂ်းၸႄႈမိူင်းမႁႃႊရသျႃႊထရႃႊသေ ၵူၼ်းလူႉတၢႆၵႂႃႇထႅင်ႈ ဢေႇသုတ်း 13 ၵေႃႉ – ၼႆ သိုဝ်ႇၶၢဝ်ႇမိူင်းဢိၼ်ႊတီႊယိူဝ်ႊ ႁၢႆးငၢၼ်းဢွၵ်ႇဝႆႉၼင်ႇၼႆ။

မိူဝ်ႈႁၢင်လိူၼ်မေႊၼၼ်ႉ မိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း မိူင်းႁူမ်ႈတုမ် ဢွၵ်ႇၶၢဝ်းတၢင်းၵႂႃႇ မိူင်းဢိၼ်ႊတီႊယိူဝ်ႊသေ ႁူပ်ႉထူပ်းၵၼ်တင်း ၸွမ်ၸိုင်ႈမိူင်းဢိၼ်ႊတီႊယိူဝ်ႊဢုပ်ႇဢူဝ်းလွင်ႈၵၢၼ်ပၢႆးမၢၵ်ႈမီးၸၼ်ႉၸိုင်ႈမိူင်းမႃး ။