တပ်ႉသိုၵ်းမိူင်းဢိၼ်ႊတီႊယိူဝ်ႊ ယိုၼ်ယၼ်လၢတ်ႈဝႃႈ လႆႈၸၢမ်းယိုဝ်းမၢၵ်ႇၼူၾႆး သႅၼ်းၵၢင် (တာလတ်ပစ်ဒုံးကျည်) ဢၼ်သႂ်ႇၶိူင်ႈမၢၵ်ႇၼိဝ်ႊၶလီႊယိူဝ်ႊလႆႈ တီႈၸိၵ်းမၼ်း ၼၼ်ႉ ဝႃႈၼႆ။

ဝၼ်းတီႈ 20/08/2025 ၼႆႉ တပ်ႉသိုၵ်း မိူင်းဢိၼ်ႊတီႊယိူဝ်ႊ ၸၢမ်းယိုဝ်းမၢၵ်ႇၼူၾႆး သႅၼ်း Angi -5  တီႈၼႂ်းၸႄႈတွၼ်ႈဢေႃးရိသ မိူင်းဢိၼ်ႊတီႊယိူဝ်ႊ ပွတ်းဢွၵ်ႇ၊ ပဵၼ်ဢၼ် ဢွင်ႇမၢၼ်လႄႈ လီ ပဵင်းပေႃးႁၢၼ်ႉၸႂ် လိူဝ်ၼၼ်ႉ မၢၵ်ႇၼူၾႆးၼႆႉ ၸၢင်ႈယိုဝ်းၶဝ်ႈထိုင်လႆႈ ၼႂ်းမိူင်းၶႄႇၵူႈတီႈ ဝႃႈၼႆ။

မိူဝ်ႈပီ 2020 ၼၼ်ႉ ယွၼ်ႉပၼ်ႁႃၸွမ်းလႅၼ်လိၼ်သေ မိူင်းဢိၼ်ႊတီႊယိူဝ်ႊတင်း မိူင်းၶႄႇ ယၢမ်ႈမီးပတိၵ်ႈၶၢတ်ႈ ၵၢၼ်သိုၵ်းတေႃႇၵၼ်မႃး ႁၢဝ်ႈႁႅင်း။ ၵူၺ်းၵႃႈ ယၢမ်းလဵဝ်သွင်ၸိုင်ႈမိူင်းတႄႉ ၶိုၼ်းၶတ်းၸႂ်ၵေႃႇသၢင်ႇလွင်ႈမိုတ်ႈၵိုဝ်း ၸမ်ၸႂ်ၵၼ်မႃး။

ၾၢႆႇၼိုင်ႈၵေႃႈ လွင်ႈၵပ်းသိုပ်ႇၵႄႈၵၢင် မိူင်းဢိၼ်ႊတီႊယိူဝ်ႊတင်း မိူင်းပႃႊၵိတ်ႊသတၢၼ်ႊ (ဢၼ်ပဵၼ်မိူင်းတိတ်းၸပ်းလႅၼ်လိၼ်ၵၼ်) ၼၼ်ႉၵေႃႈ မီးလွင်ႈၶဵင်ႈၶႅင်ၵၼ်ဝႆႉ။ မိူင်း ၶႄႇ၊ မိူင်း ဢိၼ်ႊတီႊယိူဝ်ႊတင်း မိူင်းပႃႊၵိတ်ႊသတၢၼ်ႊ 3 မိူင်းၼႆႉ ပဵၼ်မိူင်းဢၼ်မီးဝႆႉၶိူင်ႈၼိဝ်ႊၶလီႊယိူဝ်ႊ ၼင်ႇၵၼ်။

မိူင်းဢိၼ်ႊတီႊယိူဝ်ႊၼႆႉ ဢဝ်လွင်ႈပၼ်ႁႃၸွမ်းလႅၼ်လိၼ် ႁဵတ်းၶေႃႈဢၢင်ႈသေ မီးလွင်ႈၶဵင်ႈၶႅင် ၵၼ်ဝႆႉတင်း မိူင်းႁိမ်းႁွမ်း။ ယွၼ်ႉၼၼ်လႄႈ ၸင်ႇၶတ်းၸႂ်သႂ်ႇႁႅင်းယုၵ်ႉမုၼ်း ၼႂ်းၾၢႆႇၵၢၼ်ၵႅတ်ႇ ၶႄႁႄႉၵင်ႈ။ ၼႂ်းၼၼ်ႉ ၶဝ်ႈပႃးလွင်ႈတိူဝ်းၶႂၢၵ်ႈႁူင်းၸၢၵ်ႈႁဵတ်းဢွၵ်ႇၶိူင်ႈယိပ်းၵွင်ႈၵၢင်ႇၼႂ်းမိူင်း ၼႆယဝ်ႉ။

မၢၵ်ႇၼူၾႆး Angi-5 ၼႆႉ ပဵၼ်ၼႂ်းသႅၼ်း မၢၵ်ႇၼူၾႆး ယိုဝ်းၸမ်လႄႈ သႅၼ်းပၢၼ်ၵၢင်ၼၼ်ႉ ဢၼ်ၼိုင်ႈ၊ လိူဝ်ၼၼ်ႉ ပဵၼ်ဢၼ်ၸၢမ်းႁဵတ်းဢွၵ်ႇဝႆႉ ၼႂ်းမိူင်းဢိၼ်ႊတီႊယိူဝ်ႊ၊ ယိုဝ်းလႆႈပဝ်ႉမၢႆ ဢၼ်မီးၵႆ 7,000 – 8,000 ၵီႊလူဝ်ႊမီႊတိူဝ်ႊ – သိုဝ်ႇၶၢဝ်ႇ NDTV ဢွၵ်ႇဝႆႉၼင်ႇၼႆ။