ႁိူဝ်းမိၼ်ပွႆႇမၢၵ်ႇ သႅၼ်း B-52 ၶွင်တပ်ႉလူမ်း မိူင်းဢမေႊရိၵၼ်ႊ လမ်းၼိုင်ႈ ယၢတ်ႇတူၵ်းသေ မီးၵူၼ်းလူႉတၢႆၵႂႃႇၸွမ်း 8 ၵေႃႉ ဝႃႈၼႆ။

မိူဝ်ႈဝႃး ဝၼ်းတီႈ 15/6/2026 ယၢမ်းတၢမ်းၶမ်ႈ တပ်ႉလူမ်းမိူင်းဢမေႊရိၵၼ်ႊၶဝ် ဢဝ်ႁိူဝ်းမိၼ်ပွႆႇမၢၵ်ႇ သႅၼ်း B-52 လမ်းၼိုင်ႈ ၸၢမ်းမိၼ်တူၺ်း ပိူဝ်ႈတႃႇၵူတ်ႇထတ်းတူၺ်းၶိူင်ႈ ၸၢၵ်ႈၼႆ မိူၼ်ၵူႈပွၵ်ႈၼၼ်ႉၼႆသေ လုၵ်ႉတီႈဝၢင်းႁိူဝ်းမိၼ်တပ်ႉလူမ်း Edwards ဢၼ်မီးၼႂ်းၸႄႈတွၼ်ႈ ၵႄႊလီႊၽူဝ်ႊၼီႊယိူဝ်ႊပွတ်းၸၢၼ်း မိၼ်ၶိုၼ်ႈၵႂႃႇ ဢမ်ႇတၼ်းႁိုင်သင် ၶိုၼ်းယၢတ်ႇတူၵ်းမႃးလႄႈ ဢဝ်ၾႆးမႆႈႁိူဝ်းမိၼ်ၵႂႃႇ ႁၢဝ်ႈႁႅင်း ၼႆယဝ်ႉ။

ၾၢႆႇတပ်ႉလူမ်း မိူင်းဢမေႊရိၵၼ်ႊ ဢွၵ်ႇမႃးပိုၼ်ၽၢဝ်ႇလၢတ်ႈဝႃႈ – ၵူၼ်းပႃးၵႂႃႇၸွမ်းၼိူဝ်ႁိူဝ်းမိၼ် ၸိူဝ်းပဵၼ်ၽူႈႁၢပ်ႇၵၢၼ်ၼႂ်းတပ်ႉလူမ်း လႄႈ ၽူႈႁၢပ်ႇၵၢၼ်လူင်ပွင်ၸိုင်ႈ လူႉတၢႆတင်းသဵင်ႈ။ ၵဵဝ်ႇလူၺ်ႈလွင်ႈၼႆႉ လႆႈပွင်ႇၶၢဝ်ႇၸူးၵူၼ်းႁိူၼ်းၽႂ်မၼ်းလႄႈ တေပိုၼ်ၽၢဝ်ႇသဵၼ်ႈမၢႆၵူၼ်းၸိူဝ်းလူႉတႃႇၵႂႃႇၼၼ်ႉ ၼႂ်းၶၢဝ်းတၢင်း 24 ၸူဝ်ႈမူင်းယူႇ။ ယွၼ်ႉသင်လႄႈ ႁိူဝ်းမိၼ်ယၢတ်ႇတူၵ်းဢၼ်ဝႃႈၼၼ်ႉတႄႉ ပႆႇလႆႈႁူႉလွင်ႈတၢင်းမၼ်းတႅတ်ႈတေႃး။ တႃႇတေၵူတ်ႇထတ်းႁႂ်ႈႁူႉလွင်ႈတၢင်းမၼ်းၵေႃႈ တေလႆႈၸႂ်ႉၶၢဝ်းယၢမ်းမၼ်းႁိုင်ယူႇ ၶၢဝ်းတၢင်း 1 လိူၼ်၊ တႃႇတေႁၢႆးငၢၼ်းလႆႈႁူဝ်ယွႆႈမၼ်းသမ်ႉ တေလႆႈၸႂ်ႉၶၢၢဝ်းယၢမ်းႁိုင်မွၵ်ႈ 6 လိူၼ် – ဝႃႈၼႆ။

ႁိူဝ်းမိၼ်သႅၼ်း B-52 ၼႆႉ ပဵၼ်ၶွမ်ႊပၼီႊ Boeing ႁဵတ်းဢွၵ်ႇဝႆႉ။ ပဵၼ်ႁိူဝ်းမိၼ်ၵဝ်ႇၵႄႇ ဢၼ်ၸႂ်ႉတိုဝ်းမႃး ၼႂ်းတပ်ႉလူမ်း မိူင်းဢမေႊရိၵၼ်ႊ ၶၢဝ်းႁိုင်။ ၸဵမ်မိူဝ်ႈ ၽွင်းပီ 1950 ဢမေႊရိၵၼ်ႊ ၸႂ်ႉတိုဝ်းႁိူဝ်းမိၼ်သႅၼ်းၼႆႉမႃး ၼႂ်းၽႅၼ်ၵၢၼ်သိုၵ်း။ ၼႂ်းပၢင်တိုၵ်း ဢမေႊရိၵၼ်ႊ – ဢီႊရၼ်ႊၼႆႉၵေႃႈ ဢမေႊရိၵၼ်ႊ ၸႂ်ႉတိုဝ်းပႃးႁိူဝ်းမိၼ်ပွႆႇမၢၵ်ႇသႅၼ်းၼႆႉ မိူၼ် ၵၼ်။ ႁိူဝ်းမိၼ်သႅၼ်း B-52 ၼႆႉ လုၵ်ႉတီႈတၢင်းသုင် 5 မိုၼ်ႇထတ်းသေ ပွႆႇမၢၵ်ႇလႆႈ ဢၼ်မီးၼမ်ႉၼၵ်း 7 မိုၼ်ႇတၼ်ႇ။

ၼႂ်းၶၢဝ်းတၢင်း 2 ဝၼ်းမႃးၼႆႉ ဢမေႊရိၵၼ်ႊ လႆႈသုမ်းႁိူၼ်းမိၼ်ၵႂႃႇ 2 လမ်း။

မိူဝ်ႈဝၼ်းတီႈ 13 လိူၼ် ၵျုၼ်ႊၼၼ်ႉၵေႃႈ ႁိူဝ်းမိၼ်တိုၵ်းသႅၼ်း F/A – 18 Hornet ၸုမ်းမရဵၼ်း ယၢတ်ႇတူၵ်း ယွၼ်ႉၶိူင်ႈၸၢၵ်ႈမီးပၼ်ႁႃ။ ၽူႈၶပ်းႁိူဝ်းမိၼ် တၼ်းဝႅၼ်ဢွၵ်ႇၸွမ်း ၸွင်ႈမိၼ်လႄႈ လွတ်ႈသၢႆၸႂ်ၵႂႃႇ ၼႆယဝ်ႉ။

မိူၼ်ၼႆၼင်ႇၵဝ်ႇ ႁိူဝ်းမိၼ်တေႃႉသူင်ႇၶူဝ်းၶွင်သႅၼ်း AN-32 ၶွင်တပ်ႉလူမ်း မိူင်းဢိၼ်ႊတီႊယိူဝ်ႊ ပလၢတ်ႉဢွၵ်ႇၼိူဝ်သဵၼ်ႈတၢင်းလႅၼ်ႈသေ ၾႆးမႆႈ၊ ၵူၼ်းသိုၵ်း လူႉတၢႆ 5 ၵေႃႉ မိူဝ်ႈဝၼ်းတီႈ 13/6/2026 ၼႆယဝ်ႉ။