ပေႃးထိုင်မႃးဝၼ်းတီႈ 21/1/2026 ၼႆႉ လူင်ပွင်ၸိုင်ႈမိူင်းဢမေႊရိၵၼ်ႊ တေၵိုတ်းယင်ႉဝႆႉ ၶၵ်ႉၵၢၼ် တေႃႇဝီႊသႃႊ တႃႇၵူၼ်းမိူင်းၼွၵ်ႈ တေၵႂႃႇယူႇသဝ်းၼႂ်းမိူင်းၶဝ်ၼၼ်ႉ ၸူဝ်ႈ ၶၢဝ်း လူၺ်ႈဢမ်ႇမီး လွင်ႈမၵ်းမၼ်ႈၶၢဝ်းႁိုင် ။
ၸိုင်ႈမိူင်းၸိူဝ်းဢမေႊရိၵၼ်ႊ ၵိုတ်းပႅတ်ႈၵၢၼ်တေႃႇဝီႊသႃႊပၼ်ၼၼ်ႉ တင်းသဵင်ႈမီးယူႇ 75 ၸိုင်ႈမိူင်း။ ၼႂ်းၼၼ်ႉ ပႃးမိူင်းမၢၼ်ႈ၊ မိူင်းထႆး၊ မိူင်းၵမ်ႊပူႊၶျႃႊ လႄႈ မိူင်းလၢဝ်း ၸဵမ်ၸိူဝ်းၼႆႉ။
မိူဝ်ႈဝၼ်းတီႈ 14/01/2026 ပူၼ်ႉမႃးၼႆႉ ႁွင်ႈၵၢၼ်ၽွင်းလူင်ၾၢႆႇၼွၵ်ႈမိူင်း မိူင်းဢမေႊရိၵၼ်ႊ ပိုၼ်ၽၢဝ်ႇဢွၵ်ႇဝႃႈ – ငိုၼ်းၵမ်ႉၸွႆႈ ဢၼ်ဢဝ်ၵႃႈၶွၼ်ႇၵူၼ်းမိူင်းဢမေႊရိၵၼ်ႊသႂ်ႇဝႆႉၼၼ်ႉ ယႃႇႁႂ်ႈၵႂႃႇတူၵ်းၼႂ်းမိုဝ်းၵူၼ်းၸိူဝ်းမေႃၵိၼ်ၸိၵ်းတွၵ်ႇၸွၵ်းၼၼ်ႉ လႄႈ ၸင်ႇလႆႈယင်ႉၵိုတ်းဝႆႉ ၶၵ်ႉၵၢၼ်ၸိူဝ်းၼႆႉ ဝႃႈၼႆ။
ၵၢၼ်မၵ်းတတ်းလွင်ႈၵိုတ်းယင်ႉၶၵ်ႉၵၢၼ်တေႃႇဝီႊသႃႊၼႆႉ ဢမ်ႇၵဵဝ်ႇသင်ၸွမ်း ဝီႊသႃႊတွင်ႈတဵဝ်း လႄႈ ၵၢၼ်မၢၵ်ႈမီး။ ပဵၼ်တႃႇၵူၼ်းၸိူဝ်းႁၢင်ႈႁႅၼ်းတူဝ် တေၵႂႃႇယူႇသဝ်းတမ်း မုင်ႉႁေႃႁိူၼ်း တီႈမိူင်းဢမေႊရိၵၼ်ႊ ပဵၼ်တၢင်းၵၢၼ်ၵူၺ်း ၼႆယဝ်ႉ။
ၸိုင်ႈမိူင်းၸိူဝ်းလူင်ပွင်ၸိုင်ႈမိူင်းဢမေႊရိၵၼ်ႊ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉၼၼ်ႉ – ပႃးမိူင်း ပရႃႊသီႊလ်၊ ပႃႊၵိတ်ႉသ်ထၢၼ်ႊ၊ ပင်ႊၵလႃႊၻဵတ်ႉသ် ၸိူဝ်းၼႆႉၵူၺ်းဢမ်ႇၵႃး လႅတ်ႊထိၼ်ႊဢမေႊရိၵ ၊ ဢႅပ်ႉၾ်ရိၵ လႄႈ ၸိုင်ႈမိူင်းပွတ်းဢွၵ်ႇၵၢင် ၸိူဝ်းၼႆႉတင်းၼမ်လၢႆ ၼႆယဝ်ႉ။
ဝၢႆးလင် ထရမ်ႉၶိုၼ်ႈပဵၼ်ၸွမ်ၸိုင်ႈထႅင်ႈၵမ်းၼိုင်ႈယဝ်ႉဢမ်ႇႁိုင် ၶူင်းၵၢၼ် ႁေႉႁၢမ်ႈၵူၼ်းမိူင်းၼွၵ်ႈ လၵ်ႉၶဝ်ႈဢွၵ်ႇမိူင်းဢမေႊရိၵၼ်ႊ ၵေႃႈတႄႇမႃးသေ ယၢမ်းလဵဝ် ၶတ်းၸႂ် ႁေႉ ႁၢမ်ႈပႃး ၵူၼ်းၸိူဝ်း ၶတ်းၸႂ်တေၵႂႃႇယူႇသဝ်းမိူင်းၶဝ် ပဵၼ်တၢင်းၵၢၼ်ၼၼ်ႉထႅင်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ