မိူဝ်ႈဝႃးဝၼ်းတီႈ 12/2/2026 ယၢမ်းၵၢင်ၶမ်ႈ သိုၵ်းမၢၼ်ႈယိုတ်းမိူင်း ဢဝ်ႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းဝဵင်းၵျွၵ်ႉတေႃႇ လႄႈ ဝဵင်းမျွၵ်ႉဢူး မိူင်းရၶႅင်ႇ ၵူၼ်းမိူင်းလူႉတၢႆထင်တီႈၵႂႃႇ 7 ၵေႃႉ မၢတ်ႇၸဵပ်းၵႂႃႇ 10 ၵေႃႉပၢႆ ၼႆယဝ်ႉ။
ယၢမ်းၵၢင်ၶမ်ႈ 9 မူင်းပၢႆ 15 မိၼိတ်ႉ ႁိူဝ်းမိၼ်တိုၵ်းၵျႅတ်ႉၾၢႆႇတႃႇ သိုၵ်းမၢၼ်ႈယိုတ်းမိူင်း ပွႆႇမၢၵ်ႇလူင်ႁႅင်း 500 ပွင်ႊတီႈၼႂ်းဝဵင်းၵျွၵ်ႉတေႃႇ ၵူၼ်းမိူင်းလူႉတၢႆထင်တီႈၵႂႃႇ 4 ၵေႃႉ၊ တီႈဝဵင်းမျွၵ်ႉဢူးၵေႃႈ မၢၵ်ႇလူင်တူၵ်း သႂ်ႇ ၼႂ်းပွၵ်ႉၵၢင်ၵၢတ်ႇ (အလယ်စျေးရပ်ကွက်) လႄႈ ပွၵ်ႉပၢႆႉတႄႇ (ပိုက်သည်ရပ် ရပ်ကွက်) သေ ၵူၼ်းမိူင်းလူႉတၢႆၵႂႃႇ တင်းမုင်ႉႁေႃႁိူၼ်း ပႃးၸဵမ်လုၵ်ႈဢွၼ်ႇတိုၵ်ႉၵိူတ်ႇမႃးၼပ်ႉႁူဝ်လိူၼ်မၼ်းၵူၺ်းၼႆ သိုဝ်ႇၶၢဝ်ႇမိူင်းရၶႅင်ႇ ႁၢႆးငၢၼ်းဝႆႉၼင်ႇၼႆ။
လိူဝ်ၼၼ်ႉ ႁိူၼ်းယေးၵူၼ်းမိူင်းၸိူဝ်းမီးယူႇၼႂ်းပွၵ်ႉဢၼ်မၢၵ်ႇလူင်ႁိူဝ်းမိၼ်သိုၵ်းမၢၼ်ႈတူၵ်းသႂ်ႇၼၼ်ႉၵေႃႈ လူႉၵွႆၵႂႃႇ တင်းၼမ်ၼႆယဝ်ႉ။
သဵၼ်ႈမၢႆၵူၼ်းမိူင်းၸိူဝ်းလူႉတၢႆမၢတ်ႇၸဵပ်းယွၼ်ႉ မၢၵ်ႇလူင်ႁိူဝ်းမိၼ်သိုၵ်းမၢၼ်ႈယိုတ်းမိူင်း ၼႂ်းဝၼ်းမိူင်းႁူမ်ႈ တုမ်ၼၼ်ႉ ႁူမ်ႈသဵၼ်ႈမီးၸမ် 20 ၵေႃႉ။ တႃႇႁူႉလႆႈႁူဝ်ယွႆႈ လႄႈ ၶေႃႈမုလ်းတႅတ်ႈတေႃးၼၼ်ႉ ႁွင်ႈၵၢၼ်သိုဝ်ႇၶၢဝ်ႇဢၼ်ပၵ်းတႃပႂ်ႉတူၺ်းၸွမ်းလွင်ႈမိူင်းရၶႅင်ႇ တိုၵ်ႉသိုပ်ႇတိတ်းတၢမ်းဝႆႉယူႇ ဝႃႈၼႆ။
မိူဝ်ႈဝၼ်းသုၼ်ႇလႆႈသုၼ်ႇပဵၼ်ၵူၼ်းၵူႈၸိုင်ႈမိူင်း တီႊသႅမ်ႊပိူဝ်ႊ 10 ဝၼ်း ပီ 2025 ၼၼ်ႉၵေႃႈ သိုၵ်းမၢၼ်ႈ ဢဝ်ႁိူဝ်းမိၼ်တိုၵ်းပွႆႇမၢၵ်ႇသႂ်ႇ ႁူင်းယႃလူင်ၵူၼ်းမိူင်း တီႈဝဵင်းမျွၵ်ႉဢူးလႄႈ ၵူၼ်းမိူင်း တင်း ၽူႈႁၢပ်ႇၵၢၼ် ၾၢႆႇယူႇလီၶဝ် လူႉတၢႆၵႂႃႇ 33 ၵေႃႉ မၢတ်ႇၸဵပ်းၵႂႃႇ 77 ၵေႃႉၵူၺ်းဢမ်ႇၵႃး ႁူင်းၵေႃႇၵၢႆႇႁူင်းယႃလူင်ၵေႃႈ လူႉလႅဝ်ယွၵ်းယွႆၵႂႃႇတင်းသဵင်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ