မိူဝ်ႈဝၼ်းတီႈ 21/1/2026 သိုၵ်းမၢၼ်ႈယိုတ်းမိူင်း ၸတ်းပွႆးလူင်းပၢင်ႁဵၼ်းသွၼ်ၵၢၼ်ႁေႃႈႁိူဝ်း မိၼ် တီႈငဝ်ႈတပ်ႉၵၢင်ႁၢဝ် ဝဵင်းမဵတ်ႉထိလႃႇ။
ၼင်ႇႁိုဝ်တေၶိုတ်းတၼ်းငဝ်းလၢႆးလုမ်ႈၾႃႉၼၼ်ႉ ယၢမ်းလဵဝ်ၾၢႆႇသိုၵ်းမၢၼ်ႈ တိုၵ်ႉၽိူမ်ႉၵၢၼ်သိုဝ်ႉႁိူဝ်းမိၼ် ၵူႈသႅၼ်းသႅၼ်းသေ ႁိူဝ်းမိၼ်ၸိူဝ်းဢမ်ႇလူဝ်ႇမီးၵူၼ်းၶပ်း (ႁေႃႈ) ၼၼ်ႉၵေႃႈ တိုၵ်ႉတေသိုဝ်ႉထႅင်ႈယူႇ ၼႆယဝ်ႉ။
ၼႂ်းပၢင်ၼၼ်ႉ ၸွမ်သိုၵ်းလူင်ထုၼ်းဢွင်ႇ ၽူႈၵုမ်းတပ်ႉၵၢင်ႁၢဝ် ႁွင်ႈၵၢၼ်ၾၢႆႇၵႅတ်ႇၶႄႇသိုၵ်းမၢၼ်ႈ လၢတ်ႈၵႂႃႇဝႃႈ “ၵူၼ်းသိုၵ်းၾၢႆႇႁွင်ႈၵၢၼ်တပ်ႉၵၢင်ႁၢဝ် တေလႆႈႁေႃႈႁိူဝ်းမိၼ် ဢၼ်ၶိုတ်းၸၼ်ႉ တၼ်းၸွမ်းၵၢပ်ႈပၢၼ်လုမ်ႈၾႃႉသေ ႁၢပ်ႇပုၼ်ႈၽွၼ်းၵႂႃႇယဝ်ႉ။ ယွၼ်ႉတေလႆႈၸႂ်ႉတိုဝ်းၶိူင်ႈၶိုတ်းၵၢပ်ႈႁင်း ၽႂ်မၼ်းၼၼ်ႉ လူဝ်ႇလႆႈမီးပၢင်ၾိုၵ်းႁဵတ်းတူဝ်ထူပ်းတေႉတေႉ ၸွမ်းၼင်ႇဢၼ်လႆႈႁဵၼ်းသွၼ်မႃး” ဝႃႈၼႆ။
ပၢင်သွၼ်ၵၢၼ်ၶပ်း (ႁေႃႈ) ႁိူဝ်းမိၼ်သိုၵ်းမၢၼ်ႈၼႆႉ ပွၵ်ႈၼႆႉ ပဵၼ်ပွၵ်ႈၵမ်း 87 သေ ၼႂ်းၶႅပ်းႁၢင်ႈဢၼ်သိုၵ်း မၢၼ်ႈပိုၼ်ၽၢဝ်ႇဢွၵ်ႇဝႆႉၼၼ်ႉတႄႉ လႆႈႁၼ်ဝႆႉၼပ်ႉႁူဝ်သိပ်းၵေႃႉမၼ်းၵူၺ်းသေတႃႉ ႁူမ်ႈသဵၼ်ႈ ၵူၼ်းၸိူဝ်း လူင်းပၢင်သွၼ်ၵၢၼ်ႁေႃႈႁိူဝ်းမိၼ် မီးလၢႆၵေႃႉၼႆတႄႉ ဢမ်ႇပိုၼ်ၽၢဝ်ႇဢွၵ်ႇပဵၼ်တၢင်း ၵၢၼ်ဝႆႉပႃး။
သိုၵ်းမၢၼ်ႈၼႆႉ ဝၢႆးလင်ယိုတ်းဢဝ်ဢႃႇၼႃႇၸိုင်ႈမိူင်းမႃး လိပ်းလိပ်းလႅင်လႅင်တီႈလူင်ပွင်ၸိုင်ႈၵူၼ်းမိူင်းယဝ်ႉ ၸႂ်ႉတိုဝ်းႁိူဝ်းမိၼ်သေယိုဝ်း၊ တိုၵ်းသႂ်ႇၼႂ်းၼႃႈလိၼ်ၸုမ်းသိုၵ်းၸၢဝ်း ၶိူဝ်း ၸိူဝ်းလုၵ်ႉၽိုၼ်ႉၶဝ်ၶိုၼ်းၼၼ်ႉယူႇႁၢဝ်ႈႁႅင်း။
ၸႄႈဝဵင်းၸိူဝ်းတပ်ႉၶဝ်သုမ်းၵၢၼ်ႉသိုၵ်းသေ ပၼ်ၸုမ်းသိုၵ်းၸၢဝ်းၶိူဝ်းၵုမ်းၵမ်လႆႈၵႂႃႇၼၼ်ႉ ႁူင်းႁဵၼ်း၊ ႁိူၼ်းယေး ၵူၼ်းမိူင်း လႄႈ ပၢင်သဝ်းၵူၼ်းပၢႆႈၽေးသိုၵ်းၵေႃႈဢမ်ႇဝႆႉ ၾၢႆႇတပ်ႉၵၢင်ႁၢဝ်သိုၵ်းမၢၼ်ႈ တမ်းဝၢင်းၽႅၼ်ၵၢၼ်သေယိုဝ်း၊ ပွႆႇမၢၵ်ႇလူင်သႂ်ႇႁၢဝ်ႈႁႅင်း။ ၵူၼ်းမိူင်းၼပ်ႉႁူဝ်ပၢၵ်ႇ၊ ႁူဝ်ႁဵင်ၵေႃႉ လူႉတၢႆမၢတ်ႇၸဵပ်း ၵႂႃႇၸွမ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ