ဝၼ်းတီႈ 7/1/2025 မိူဝ်ႈဝႃးၼႆႉ တပ်ႉၶိုၵ်ႉတွၼ်းမိူင်းဢမေႊရိၵၼ်ႊ တီႉၺွပ်းႁိူဝ်းတၢင်ႇၼမ်ႉမၼ်းမဵၼ် Marinera ဢၼ်ပူၵ်းတုင်းမိူင်းရတ်ႉသျႃႊဝႆႉ တီႈၼႂ်းၼမ်ႉသမုတ်ႊတရႃႊ ဢတ်ႉတလၼ်ႇတိတ်ႉ ပွတ်းႁွင်ႇ -သိုဝ်ႇၶၢဝ်ႇၼွၵ်ႈမိူင်းလၢႆလၢႆဢၼ် ႁၢႆးငၢၼ်းဝႆႉၼင်ႇၼႆ။

ႁိူဝ်းတၢင်ႇၼမ်ႉမၼ်းမဵၼ် Marinera ၼႆႉ လုၵ်ႉတီႈၸိုဝ်ႈ Bella 1 သေ လႅၵ်ႈလၢႆႈၸိုဝ်ႈဝႆႉ ပိူဝ်ႈတႃႇငိူင်ႉဝႄႈ လွင်ႈမိူင်းဢမေႊရိၵၼ်ႊ ပိၵ်ႉဢိုတ်းႁႅတ်ႉႁၢမ်ႈသဵၼ်ႈတၢင်းၼမ်ႉၼိူဝ် မိူင်းသႅၼ်ႊၼီႊသွႆႊလႃႊ ၼႂ်းလိူၼ်ပူၼ်ႉ မႃးၼႆႉ။

ယၢမ်းလဵဝ် တပ်ႉၶိုၵ်ႉတွၼ်းမိူင်းဢမေႊရိၵၼ်ႊ တီႉၺွပ်းလႆႈ ႁိူဝ်းတၢင်ႇၼမ်ႉမၼ်း Marinera တီႈပၢင်ႇလၢႆႇ ၼႂ်းၵႄႈ မိူင်းသၵွတ်ႉလႅၼ်ႊ Scotland လႄႈ ဢၢႆႊသ်သလႅၼ်ႊ  Iceland ။

ၵဵဝ်ႇလူၺ်ႈလွင်ႈၼႆႉသေ ႁွင်ႈၵၢၼ်ၽွင်းလူင်ၾၢႆႇၵၢၼ်ၵပ်းသိုပ်ႇတေႃႉသူင်ႇ မိူင်းရတ်ႉသျႃႊ လၢတ်ႈဝႃႈ -ပဵၼ်လွင်ႈႁဵတ်းၽိတ်းပူၼ်ႉပႅၼ် ပၵ်းပိူင်မၢႆမီႈၾၢႆႇသဵၼ်ႈတၢင်းၼမ်ႉၵူၺ်း။ တုၵ်းယွၼ်း ႁႂ်ႈဢမေႊရိၵၼ်ႊ ပွႆႇပၼ်ၶိုၼ်း ၵူၼ်းမိူင်းရတ်ႉသျႃႊ ၸိူဝ်းပႃးၵႂႃႇၸွမ်းၼိူဝ်ႁိူဝ်းၼၼ်ႉ ဝႃႈၼႆ။

မိူၼ်ၼႆ ၽူးတႅၼ်းၽွင်း မိူင်းရတ်ႉသျႃႊၶဝ်ၵမ်ႈၽွင်ႈၵေႃႈ သၢၼ်ၶတ်းဝႆႉႁၢဝ်ႈႁႅင်းဝႃႈ လွင်ႈႁဵတ်းသၢင်ႈ ဢမေႊရိၵၼ်ႊၼႆႉ မိူၼ်ၵၼ်တင်း ၸုမ်းၸူၼ်ၼႂ်းပၢင်ႇလၢႆႇၵူၺ်း ၼႆယဝ်ႉ။

Pete Hegseth ၽွင်းလူင်ၾၢႆႇၵႅတ်ႇၶႄႁႄႉၵင်ႈ မိူင်းဢမေႊရိၵၼ်ႊတႄႉ တႅမ်ႈတၢင်ႇဝႆႉတီႈၼိူဝ်သိုဝ်ႇတူင်ႇဝူင်းဝႃႈ – လွင်ႈပိၵ်ႉဢိုတ်းႁႅတ်ႉႁၢမ်ႈၼိူဝ် ၼမ်ႉမၼ်းမဵၼ် မိူင်းဝႅၼ်ႊၼီႊသွႆႊလႃႊၼႆႉ တိုၵ်ႉၶဝ်ႈတၢင်းတိုဝ်းတႃႇၼႂ်းလုမ်ႈၾႃႉ ၵူႈတီႈတီႈယူႇ ဝႃႈၼႆ။

ႁိူဝ်းတၢင်ႇၼမ်ႉမၼ်းမဵၼ် Marinera ၼႆႉ ပူၼ်ႉပႅၼ်လွင်ႈ ဢၼ်ဢမေႊရိၵၼ်ႊ ပိၵ်ႉဢိုတ်းႁႅတ်ႉႁၢမ်ႈၼၼ်ႉသေ တေႃႉတၢင်ႇၼမ်ႉမၼ်းမဵၼ် မိူင်းဝႅၼ်ႊၼီႊသွႆႊလႃႊ၊ မိူင်းရတ်ႉသျႃႊ လႄႈ မိူင်းဢီႊရၢၼ်ႊ။ လိူဝ်ၼၼ်ႉ တွပ်ႇထဵင် ဢမ်ႇပၼ်တပ်ႉပႂ်ႉၾင်ႇၼမ်ႉပၢင်ႇလၢႆႇ ဢမေႊရိ ၵၼ်ႊ ၶဝ်ႈၵူတ်ႇထတ်းတီႈၼိူဝ်ႁိူဝ်းလႄႈ ၸင်ႇလႆႈမီးမႃးၽႅၼ်ၵၢၼ်သိုၵ်းၶဝ်ႈတီႉၺွပ်းၼင်ႇၼႆ ၼႆယဝ်ႉ။

တႃႇၽႅၼ်ၵၢၼ်သိုၵ်း တီႉၺွပ်းႁိူဝ်းတၢင်ႇၼမ်ႉမၼ်းမဵၼ်ၼႆႉ တပ်ႉသိုၵ်းမိူင်းပရိတ်ႊထဵင်ႊ ဢဝ်ႁိူဝ်းမိၼ်သွပ်ႇၶၢဝ်ႇ ပၼ်တၢင်းၸွႆႈထႅမ်သေတႃႉ ဢၼ်ၶိုၼ်ႈၵႂႃႇတီႈၼိူဝ်ႁိူဝ်းၼၼ်ႉတႄႉ ဢမ်ႇလႆႈၶဝ်ႈႁူမ်ႈပႃးၼႆ John Healey ၽွင်းလူင်ၾၢႆႇၵႅတ်ႇၶႄႁႄႉၵင်ႈ မိူင်းပရိတ်ႊထဵင်ႊ လၢတ်ႈဝႆႉၼင်ႇၼႆ။