တီႈဝဵင်း Los Angeles မိူင်းဢမေႊရိၵၼ်ႊပွတ်းတူၵ်းၼၼ်ႉ ၸဝ်ႈၼႃႈတီႈၶဝ် ၵူတ်ႇထတ်းတီႉၺွပ်း ၵူၼ်းၸိူဝ်းယူႇသဝ်းဢမ်ႇပဵၼ်တၢင်းၵၢၼ် ႁၢဝ်ႈႁႅင်း ထိုင်တီႈၵူၼ်းဢွၵ်ႇၼႄၵၢင်ၸႂ်သေ မီးပတိၵ်ႈၶၢတ်ႈၵၼ်တင်း ၽူႈမီးပုၼ်ႈၽွၼ်း ၾၢႆႇၵုမ်းၵမ် ၵူၼ်းၶဝ်ႈဢွၵ်ႇမိူင်းၶဝ် ၼႆယဝ်ႉ။

ၽူႈမီးပုၼ်ႈၽွၼ်းၾၢႆႇၵုမ်းၵမ် ၵူၼ်းၶဝ်ႈဢွၵ်ႇမိူင်းလႄႈ ႁွင်ႈၵၢၼ် ၾၢႆႇၵဵပ်းၶွၼ်ႇ (ICE)  မိူင်းဢမေႊရိၵၼ်ႊ လူင်းၵူတ်ႇထတ်းတီႉၺွပ်း ၼႂ်းဝဵင်းလႄႈ တီႈၵဵပ်းၶူဝ်း ဢွင်ႈတီႈ ၵူၼ်း ၸိူဝ်းဢမ်ႇမီး ဝတ်းဝႂ်ၶဝ် ၶွၼ်ႈတုမ်ၵၼ်ယူႇသဝ်းဝႆႉ ၸိူဝ်းၼၼ်ႉ။  

ၵူၼ်းၼႄၵၢင်ၸႂ်ၵမ်ႈၽွင်ႈ ဢဝ်ၶူဝ်းၶွင်သေ သိုင်းသႂ်ႇၽူႈမီးပုၼ်ႈၽွၼ်းၶဝ်၊  ၾၢႆႇပလိၵ်ႈၶဝ်သမ်ႉ ၸႂ်ႉတိုဝ်းမၢၵ်ႇၵႂၼ်းၼမ်ႉတႃသေ လိုပ်ႈလမ်းယႃႉပႅတ်ႈ ၵူၼ်းၸိူဝ်းၼႄၵၢင်ၸႂ်။ ၼႂ်းဝၼ်းတီႈ 7 ပူၼ်ႉမႃးၼႆႉၵေႃႈ ၵူၼ်းၼႄၵၢင်ၸႂ်လႄႈတင်း ၸုမ်းပလိၵ်ႈၶဝ် ပဵၼ်ပၼ်ႁႃပတိၵ်ႈၶၢတ်ႈၵၼ်။

တႃႇတေၵုမ်းၵမ် လွင်ႈဢမ်ႇၼိမ်သဝ်းၼႆႉသေ ၸွမ်ၸိုင်ႈ ၻူဝ်ႊၼေႃႊ ထရမ်ႉ လႆႈၸီႉသင်ႇ ႁႂ်ႈၸႅၵ်ႇၽႄဢဵၼ်ႁႅင်း တပ်ႉၾၢႆႇႁူမ်ႇလူမ်ႈၸိူဝ်ႉၸၢတ်ႈ(National Guard) ဝႆႉ 2,000 ပၢႆ။

ၽူႈမီးၸၼ်ႉသုင် ၼႂ်းၸုမ်းလူင်ပွင်ၸိုင်ႈလၢတ်ႈဝႃႈ – လူင်ပွင်ၸိုင်ႈမိူင်းဢမေႊရိၵၼ်ႊ လႆႈၸီႉသင်ႇဝႆႉ ႁႂ်ႈတီႉၺွပ်း ၵူၼ်းၸိူဝ်းယူႇသဝ်းၼႂ်းမိူင်း လူၺ်ႈဢမ်ႇမႅၼ်ႈတၢင်းၵၢၼ် ၼိုင်ႈဝၼ်း 3,000 ၵေႃႉ။

ပူၼ်ႉမႃးလၢႆဝၼ်းၼႆႉ တီႉၺွပ်းလႆႈ 118 ၵေႃႉ။ ၼႂ်းၼၼ်ႉ ၵမ်ႈၽွင်ႈပဵၼ်ၵူၼ်းၵႃႉၶၢႆယႃႈမဝ်းၵမ် လႄႈ ၵူၼ်းႁဵတ်းၽိတ်းပၵ်းပိူင်မၢႆမီႈဝႆႉ ဝႃႈၼႆ။

ၸွမ်ၸိုင်ႈထရမ်ႉၼႆႉ မိူဝ်ႈပူၼ်ႉမႃးလၢႆဝၼ်းၼႆႉၵေႃႈ ၸီႉသင်ႇႁၢမ်ႈဢိုတ်းပႅတ်ႈ ဢမ်ႇပၼ်ၶႂၢင်ႉၵူၼ်းမိူင်း လၢႆၸိုင်ႈမိူင်း ၶဝ်ႈၵႂႃႇၼႂ်းမိူင်းဢမေႊရိၵၼ်ႊလႄႈ ၺႃးထတ်းသၢင်ဝႆႉႁၢဝ်ႈႁႅင်း။