ၼမ်ႉၵိုင်ႉၵၢင်ႉလုပ်ႇၼွင်းထူမ်ႈ တီႈၼႂ်းၸႄႈတွၼ်ႈတႅၵ်ႉသႅၵ်ႉ (Texas) မိူင်းဢမေႊရိၵၼ်ႊ မီးၵူၼ်းလူႉတၢႆ 80 ၵေႃႉပၢႆ ဝႃႈၼႆ။

ပူၼ်ႉမႃးဝၼ်းတီႈ 04/07/2025 ၼႆႉ ၾူၼ်တူၵ်းႁၢဝ်ႈႁႅင်း ၼႂ်းတီႈဝဵင်းၵႃႊ (Kerr County) လႄႈ လၢႆလၢႆပိုၼ်ႉတီႈ ၼႂ်းတႅၵ်ႉသႅၵ်ႉ(Texas) မိူင်းဢမေႊရိၵၼ်ႊ မႄႈၼမ်ႉလူၼ်ႉၾင်ႇသေ ၵိုင်ႉၵၢင်ႉလုပ်ႇၼွင်းထူမ်ႈ ႁၢဝ်ႈႁႅင်း။ တေႃႇထိုင်ဝၼ်းတီႈ 7 ယၢမ်းၵၢင်ၼႂ် မီးၵူၼ်းလူႉတၢႆၵႂႃႇ 80 ပၢႆ၊ ၼႂ်းၼၼ်ႉ ပႃးလုၵ်ႈဢွၼ်ႇ 28 ၵေႃႉ၊ ၸိူဝ်းႁၢႆလၢႆဝႆႉၵေႃႈ မီးထႅင်ႈတင်းၼမ်။

ၼႂ်းဝူင်ႈၼႆႉၵေႃႈ ၾိင်ႈၾႃႉရႃႇသီႇ ၼႂ်းၸႄႈတွၼ်ႈတႅၵ်ႉသႅၵ်ႉ တိုၵ်ႉတေသိုပ်ႇႁူၵ်ႉႁၢႆႉႁႅင်းထႅင်ႈလႄႈ ႁူဝ်ၼပ်ႉၵူၼ်းလူႉတၢႆ ၸၢင်ႈတိူဝ်းၼမ်ၶိုၼ်ႈမႃးထႅင်ႈၼႆ – ၸဝ်ႈၼႃႈတီႈ ၽူႈမီးပုၼ်ႈၽွၼ်း ၶဝ်ပၼ်ၾၢင်ႉဝႆႉၼင်ႇၼႆ။

ယူႇတီႈ ၽူႈၵွၼ်းၸႄႈတွၼ်ႈတႅၵ်ႉသႅၵ်ႉၵေႃႈ လႆႈလူင်းၵႂႃႇၵူတ်ႇထတ်းတူၺ်း ဢွင်ႈတီႈ ၸိူဝ်းၺႃးၼမ်ႇလုပ်ႇၼွင်းထူမ်ႈၼၼ်ႉသေ လၢတ်ႈပၼ်ၵႂၢမ်းမၼ်ႈဝႃႈ တေၶတ်းၸႂ်ႁႃ ႁႂ်ႈထူပ်းႁၼ်ၶၢပ်ႈတူဝ်တၢႆၵူၼ်းၵူႈၵေႃႉ ဝႃႈၼႆ။

ယၢမ်းလဵဝ် ၽူႈမီးပုၼ်ႈၽွၼ်းၾၢႆႇၸွႆႈထႅမ်ၶဝ် လႆႈဢွၼ်ၵၼ်ႁဵတ်းၵၢၼ်ၶူၼ်ႉႁႃၸွႆႈထႅမ်ဝႆႉ ႁိမ်းႁွမ်း ဢွင်ႈတီႈဢႅဝ်ႇလႄႇ Camp Mystic ။ ယွၼ်ႉမႄႈၼမ်ႉ ၵႂႃႊတႃႊလူႊပီႊ (Guadalupe River) ဢၼ်လတ်းၽၢၼ်ႇ ၼႂ်းပိုၼ်ႉတီႈၼၼ်ႉ ၵိုင်ႉၵၢင်ႉၶိုၼ်ႈသုင်မႃး 26 ထတ်း ၼႂ်းၶၢဝ်းတၢင်း 45 မိ ၼိတ်ႉလႄႈ ၸင်ႇႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈ လႆႈၺႃး ၽေးၼမ်ႉၵႂႃႇႁၢဝ်ႈႁႅင်း ဝႃႈၼႆ။

ဝၼ်းတီႈ 4 ၼႆႉ ပဵၼ်ဝၼ်းလွတ်ႈလႅဝ်းသဝ်းၶေႃ မိူင်းဢမေႊရိၵၼ်ႊ ပဵၼ်ဝၼ်းလိုဝ်ႈၵၢၼ်လႄႈ ၵူၼ်းၸိူဝ်းဢွၼ်ၵၼ်ၵႂႃႇဢႅဝ်ႇလႄႇတီႈ Camp Mystic ၵေႃႈ ၵိုၼ်းၶွၼ်ႈဝႆႉ။

ၵဵဝ်ႇလူၺ်ႈလွင်ႈၼႆႉသေ ၸွမ်ၸိုင်ႈမိူင်း ဢမေႊရိၵၼ်ႊ ထရမ်ႉ လႆႈပိုၼ်ၽၢဝ်ႇ တီႈဝဵင်းၵႃႊ ပဵၼ်ငဝ်းလၢႆးၶိုၵ်ႉၶၵ်ႉသေ ၼႂ်းဝၼ်းတီႈ 6 ၼႆႉ လႆႈသူင်ႇၸုမ်းၾၢႆႇၸွႆႈထႅမ်ၵႂႃႇတီႈ ၼႂ်းၸႄႈတွၼ်ႈတႅၵ်ႉသႅၵ်ႉယဝ်ႉ ဝႃႈၼႆ။