ဢမေႊရိၵၼ်ႊ တင်း ဢီႊရၼ်ႊ လႆႈၶေႃႈတူၵ်းလူင်းဝႃႈ တေႁူမ်ႈလူင်းလၢႆးမိုဝ်းၵိုတ်းတိုၵ်းၵၼ်ၵႂႃႇ ၼႂ်းဝၼ်းသုၵ်းတေထိုင်ၼႆႉ ဝႃႈၼႆ။
ၼႂ်းဝၼ်းတီႈ 14 လိူၼ်ၵျုၼ်ႊ (မိူဝ်ႈဝႃး) ၼႆႉ ၸွမ်ၸိုင်ႈဢမေႊရိၵၼ်ႊ တေႃႊၼႄႊလ်ထရမ်ႉ တႅမ်ႈတၢင်ႇ ဝႆႉတီႈၼိူဝ်သိုဝ်ႇတူင်ႇဝူင်း Truth မၼ်းၸၢႆးဝႃႈ – ဢမေႊရိၵၼ်ႊ တေထွႆ ၶိုၼ်းတပ်ႉၼမ်ႉ ဢၼ်ပိၵ်ႉဢိုတ်းႁႅတ်ႉႁၢမ်ႈဝႆႉတီႈတႃႈႁိူဝ်း မိူင်းဢီႊရၼ်ႊ၊ ဝၢႆးလင်လူင်းလၢႆးမိုဝ်းၶေႃႈတူၵ်းလူင်းၵၼ်ယဝ်ႉ ဢီႊရၼ်ႊ တေပိုတ်ႇပၼ် သဵၼ်ႈတၢင်းၼမ်ႉႁေႃႊမူတ်ႊသ်ၶိုၼ်း ဝႃႈၼႆ။
ၵဵဝ်ႇလူၺ်ႈ ၶေႃႈတူၵ်းလူင်းႁူဝ်ယွႆႈ မီးၸိူင်ႉႁိုဝ်ဢၼ်ဝႃႈၼၼ်ႉတႄႉ ပႆႇႁၼ်ပိုၼ်ၽၢဝ်ႇဢွၵ်ႇဝႆႉ။
မိူဝ်ႈ ဢမေႊရိၵၼ်ႊ ယိုဝ်းတိုၵ်းၼႂ်းမိူင်း ဢီႊရၼ်ႊ ႁၢဝ်ႈႁႅင်း (Photo – Crd)
ယူႇတီႈ ၽွင်းလူင်းၾၢႆႇၼွၵ်ႈမိူင်းလႄႈ ၶွင်ႊသီႊၾၢႆႇႁူမ်ႇလူမ်ႈၸိူဝ်ႉၸၢတ်ႈ မိူင်းဢီႊရၼ်ႊၵေႃႈ ယိုၼ်ယၼ်လၢတ်ႈဝႆႉ လွင်ႈလႆႈၶေႃႈတူင်းလူင်းၵၼ်ၼၼ်ႉယူႇ။
ၵူၺ်းၵႃႈ ဝၢႆးလင်ပၼ်ၶိုၼ်းၽၼ်ႇတႃႇငိုၼ်းတွင်း ၶွင်မိူင်းဢီႊရၼ်ႊ ဢၼ်ဢမေႊရိၵၼ်ႊၵုမ်းၵမ်ဝႆႉၼၼ်ႉ ႁိုင်ၶၢဝ်းတၢင်း 60 ဝၼ်းယဝ်ႉၸင်ႇ ဢီႊရၼ်ႊတေတႄႇဢုပ်ႇၵုမ် လွင်ႈၶိူင်ႈ ၼိဝ်ႊၶလီႊယိူဝ်ႊၵႂႃႇ ဝႃႈၼႆ။
မိူင်းပရဵင်ႊတဵင်ႊ၊ ၾရင်ႊသဵတ်ႈ၊ ၵျႃႊမၼီႊ တင်း ဢီႊတလီႊ ၶဝ် 4 မိူင်းၵေႃႈ ႁူမ်ႈၵၼ်ပိုၼ်ၽၢဝ်ႇဝႆႉဝႃႈ – သင် ဢီႊရၼ်ႊ ပွႆႇၽႃႈပႅတ်ႈ ၶိူင်ႈၼိဝ်ႊၶလီႊယိူဝ်ႊၸိုင် တေႁုပ်ႈသိမ်းပၼ် ၶိုၼ်း လွင်ႈလႆႈပိၵ်ႉဢိုတ်းႁႅတ်ႉႁၢမ်ႈၼိူဝ် မိူင်းဢီႊရၼ်ႊဝႆႉၼၼ်ႉ ၼႆယဝ်ႉ။
ၸွမ်ၽွင်းလူင် မိူင်းပႃႊၵိတ်ႊသတၼ်ႊ လၢတ်ႈဝႃႈ – ဢမေႊရိၵၼ်ႊ တင်း ဢီႊရၼ်ႊ တေႁူမ်ႈၵၼ်လူင်းလၢႆးမိုဝ်း ၶေႃႈတူၵ်းလူင်းၵႂႃႇ ၼႂ်းဝၼ်းသုၵ်းတေထိုင်ၼႆႉ တီႈဝဵင်း ၵျီႊၼီႊပႃႊ၊ မိူင်းသုၺ်ႊၸႃႊလႅၼ်ႊ ဝၢႆးလင်ပၢင်ၵုမ်ၸၼ်ႉသုင် G7 ဢၼ်ၸတ်းႁဵတ်းတီႈ မိူင်းၾရင်ႊသဵတ်ႈယဝ်ႉတူဝ်ႈ ဝႃႈၼႆ။
ယွၼ်ႉမီးၶၢဝ်ႇဢွၵ်ႇဝႃႈ သဵၼ်ႈတၢင်းၼမ်ႉႁေႃႊမူတ်ႉသ် ဢၼ်ပိၵ်ႉဢိုတ်းမႃး ၸဵမ်မိူဝ်ႈၼႂ်းလိူၼ်ၾႅပ်ႊပိဝ်ႊရီႊၼၼ်ႉ တေပိုတ်ႇၶိုၼ်းၼႆလႄႈ ၼႂ်းဝၼ်းတီႈ 14 လိူၼ်ၵျုၼ်ႊ (မိူဝ်ႈဝႃး) ၼႆႉ ၵႃႈၶၼ်ၼမ်ႉမၼ်းမဵၼ် မိူင်းဢမေႊရိၵၼ်ႊ ယွမ်းလူင်းၵႂႃႇၶိုၼ်း။ လွၵ်းၵၢတ်ႇသတွၵ်ႊ ၼႂ်းပိုၼ်ႉတီႈ ဢေးသျႃး – ပၸိၾိၵ်ႉၵေႃႈ ၶိုၼ်ႈသုင်မႃးၶိုၼ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ