မိူဝ်ႈဝႃးဝၼ်းတီႈ 8/6/2026 ယၢမ်းတၢမ်းၶမ်ႈ 3 မူင်းၶိုင်ႈ ၸဝ်ႈႁၢၼ်ႉၶၢႆၶမ်း ၼႂ်းၵၢတ်ႇလူင်ဝဵင်းမူႇၸေႊ ၵူၼ်းၸုမ်းၼိုင်ႈၸူၼ် ႁိမ်ဢဝ်ထူင်ၶမ်းၵႂႃႇ ၸွမ်းတၢင်း ၽွင်းဢိုတ်းလၢၼ်ႉ ယဝ်ႉသေ ပွၵ်ႈၶိုၼ်းႁိူၼ်းယေး ၊ ၶမ်း ပႃးၵႂႃႇၸွမ်း 30 ၵျၢပ်ႈ ၵိုင်ႇငိုၼ်းမၢၼ်ႈ မွၵ်ႈ 2,000 သႅၼ်ပျႃး ဝႃႈၼႆ။

ၽွင်းၸဝ်ႈႁၢၼ်ႉၶမ်း ပႃးတင်းထူင်ငိုၼ်းထူင်ၶမ်းသေ ၶီႇရူတ်ႉၶိူင်ႈပွၵ်ႈၶိုၼ်းႁိူၼ်းၼၼ်ႉ မီးၵူၼ်းၸုမ်းၼိုင်ႈ သႅၼ်းပၢၼ်ဢႃယုမွၵ်ႈ 25 ပီၶိုၼ်ႈၼိူဝ်ၶီႇရူတ်ႉၵႃး ပႂ်ႉဝႆႉၼႂ်းၵိဝ်ႇသေ ပႂ်ႉၸူၼ်။

ၼၢင်းယိင်းဢႃႇယု 40 ပီပၢႆ ၵေႃႉႁူႉႁၼ်ၸွမ်းပိူင်ပဵၼ်လွင်ႈၼႆႉ လၢတ်ႈၼႄတီႈၽူႈတွႆႇႁွၵ်ႈဝႃႈ “ပဵၼ်ႁိမ်းၶၢင်ႈႁိူၼ်း ႁဝ်းၵူၺ်းလႄႈ ၽိူဝ်ႇဝႃႈလႆႈငိၼ်းသဵင်ယဝ်ႉ ဢၢင်ႈၵႂႃႇၸွႆႈတႆးၵေႃႉ ၶႃႈၼႆ ၵူၼ်းၸူၼ် ထူၵ်းၵွင်ႈမႃး လၼ်ႇယိုဝ်းသႂ်ႇလႄႈ ႁဝ်းၵေႃႈဢမ်ႇၸၢင်ႈၵႂႃႇၸွႆႈ။ ပဵၼ်ၽွင်းၶႃၽူဝ်မေး ဢိုတ်းလၢၼ်ႉယဝ်ႉႁႄ ပွၵ်ႈၶိုၼ်းႁိူၼ်းဢေႃႈ။ ၵူၼ်းၸူၼ်ၼႆႉ လၢတ်ႈၵႂၢမ်းမၢၼ်ႈ ပႃးႁႄ။ ၶဝ်မႃးႁိမ်ဢဝ်ထူင်ၶမ်းတႆးၵေႃႉၶႃႈ လၢတ်ႈဝႃႈပေႃးဢမ်ႇပွႆႇ တေယိုဝ်းၼႆလႄႈ တႆးၵေႃႉၶႃႈၵေႃႈ ၵႃႈလႆႈပွႆႇထူင်ၶမ်းမၼ်းၵႂႃႇၶႃႈဢေႃႈ” ဝႃႈၼႆ။

လႆႈႁူႉဝႃႈ ၵူၼ်းၸူၼ် လႆႈၶမ်းၵႂႃႇ တင်းသဵင်ႈ 30 ၵျၢပ်ႈ ယၢမ်းလဵဝ် ၾၢႆႇၸဝ်ႈၼႃႈတီႈပလိၵ်ႈ လႄႈ ၸိူဝ်းမီးပုၼ်ႈၽွၼ်းၼႂ်းပွၵ်ႉၼႂ်းယွမ်ႇၵူႈၾၢႆႇၾၢႆႇ ၼႂ်းဝဵင်းမူႇၸေႊ ဢွၼ်ၵၼ် ၸွမ်းႁႃ တူဝ်ၵူၼ်းၸူၼ်သေ ပိုတ်ႇလိူင်ႈဢဝ်တၢင်းၽိတ်းဝႆႉ တီႈႁူင်းပလိၵ်ႈ ဝဵင်းမူႇၸေႊ ၼႆယဝ်ႉ။

ၽူႈမီးပုၼ်ႈၽွၼ်း ၼႂ်းပွၵ်ႉၼႂ်းယွမ်ႇ ၵေႃႉယူႇဝႆႉၼႂ်းဝဵင်းမူႇၸေႊ လၢတ်ႈၼႄတီႈၽူႈတွႆႇႁွၵ်ႈဝႃႈ “ၼႂ်းပီ 2026 မႃး ၸူဝ်ႈၶဝ်မႃးၺွပ်းၵျႃႊၽျႅၼ်ႉ ၸွမ်းၼင်ႇၽႅၼ်ၵၢၼ် လူင်ပွင်ၸိုင်ႈ 100 ဝၼ်းၶဝ်ၼၼ်ႉ လွင်ႈၸူၼ်ၵၼ်ယႂ်ႇလူင်ၸိူင်ႉၼႆ ယဵၼ်ၵႂႃႇတေႉတေႉဢေႃႈ။ ၵူၺ်းၵႃႈ ၵၢၼ်ၵျႃႊၽျႅၼ်ႉတႄႉ ဢၼ်ယႂ်ႇဢၼ်လူင်မၼ်းၼၼ်ႉတိုၵ်ႉမီးယူႇ။ ဢၼ်ၶဝ်ၺွပ်းၼၼ်ႉ တေႃႉတႄႉၺွပ်းၼႄ ၸိူဝ်းပဵၼ်ၸုမ်းလဵၵ်ႉၸုမ်းၼွႆႉမၼ်းၵူၺ်း။ ပေႃးဝႃႈသိုဝ်ႈသိုဝ်ႈမႃး ဝဵင်းမူႇၸေႊၼႆႉ မၼ်းဢမ်ႇၵႂၢင်ႈယႂ်ႇတၢၼ်ႇၼၼ်ႉ တၢင်းမူတ်းၼႆႉ မီး 9 ပွၵ်ႉ 9 ၽၢႆႇၵူၺ်းလူး ပေႃးၸဝ်ႈၼႃႈတီႈၶဝ် ၶဝ်ႈၺွပ်းၵူႈၶမ်ႈၵူႈၶိုၼ်း တေႉတေႉဝႃႈဝႃႈတႄႉ မၼ်းတိုၵ်ႉမူၺ်ႉလႆႈယူႇ။ မိူဝ်ႈလဵဝ်ၼႆႉ ၾၢႆႇၸဝ်ႈၼႃႈတီႈၶဝ်ၵေႃႈ တေႃႉတႄႉၺွပ်းဢဝ်ၼႄၾၢင်ႁၢင်ႈမၼ်း ၵူၺ်း” ဝႃႈၼႆ။

ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ယဝ်ႉမႃးႁၢၼ်ႉတေႃႇထိုင်ဝၼ်းမိူဝ်ႈၼႆႉ (6/6/2026) ၵၢၼ်ၵႃႉၶၢႆ ၸွမ်းလႅၼ်လိၼ် လႄႈ ၼႂ်းမိူင်းတႆးပွတ်းႁွင်ႇ ဢမ်ႇၼိမ်သဝ်း ႁဵတ်းႁႂ်ႈ ၵူၼ်းမိူင်းပိုၼ်ႉတီႈ ႁဵတ်းႁႃၵိၼ် လဵင်ႉတွင်ႉ ယၢပ်ႇၽိုတ်ႇၵိၼ်းလိူဝ်ၵဝ်ႇမႃးတေႉတေႉ။

မိူၼ်ၼၼ်ၼင်ႇၵဝ်ႇ ၵၢၼ်ပၢႆးမၢၵ်ႈမီးၼႂ်းဝဵင်းမူႇၸေႊၵေႃႈ ႁၢၼ်ႉတေႃႇထိုင်ယၢမ်းလဵဝ် ဢမ်ႇၶႅမ်ႉၶိုၼ်ႈမႃး ၶိုၼ်းတေႉ တေႉ။ ၸဝ်ႈႁၢၼ်ႉတၢင်းၶၢႆ ၵူၼ်းၵႃႉၶဝ် မီးၼမ် ႁၼ်ၵၢၼ်မၢၵ်ႈမီးၼႂ်းဝဵင်းပၼ်ႇၵၢၼ်လႆႈလီယူႇ သေတႃႉ မီးၵူၼ်းၶၢႆၼမ်လိူဝ်သေ ၵူၼ်းသိုဝ်ႉဝႆႉတေႉတေႉလႄႈ ၵူၼ်းမိူင်းပိုၼ်ႉတီႈ တေႃႉတႄႉပေႃးၵုမ်ႇၵိၼ် ၵုမ်ႇၸၢႆႇႁင်းၽႂ်မၼ်းၵူၺ်း ၼႆယဝ်ႉ။

ၼႂ်းဝဵင်းမူႇၸေႊၼႆႉ မီးၸုမ်းသိုၵ်းမၢၼ်ႈ လႄႈ ပျီႇတူႉၸိတ်ႉ ၸိူဝ်းယူႇတႂ်ႈဢႃႇၼႃႇသိုၵ်းမၢၼ်ႈ မွၵ်ႈ 15 ၸုမ်း တူင်ႉၼိုင်ၵႂႃႇမႃးၼႂ်းဝဵင်းၵူၺ်းဢမ်ႇၵႃး ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၵေႃႈ တူင်ႉၼိုင်ၵႂႃႇမႃးၸွမ်းသၢပ်ႇဝဵင်းမူႇၸေႊ။ ၵွပ်ႈၼႆလႄႈၵႆႉမီးလွင်ႈလၼ်ႇၵွင်ႈယိုဝ်းၵၼ် လွင်ႈလၵ်ႉၸၵ်ႉၶုတ်ႈၸူၼ်ႁိမ်ၵၼ်၊ တီႉဢဝ်ၵူၼ်းၵႂႃႇသေ ႁႂ်ႈဢဝ်ငိုၼ်းမႃးထုတ်ႇၶိုၼ်း ၸိူဝ်းၼႆႉယူႇဢမ်ႇထၢတ်ႇ။