ၵူၼ်းႁဝ်းၼႆႉ ယူႇလႂ်ၵေႃႈ ႁိုဝ်တေလိူဝ်လႆႈၵၢၼ်ႁႃၵိၼ်လဵင်ႉတွင်ႉ ၊ တႃႇယူႇလႆႈၵိၼ်လႆႈၼၼ်ႉ တိုၼ်းတေလႆႈ ၸိုၼ်ႇၶတ်းၸႂ်ယူႇတႃႇသေႇ ။ ၵူၺ်းၵႃႈ ၵိၼ်ဢမ်ႇထုၵ်ႇၼိုင်ႈၵမ်း ၵႂႃႇဢမ်ႇထုၵ်ႇ ၼိုင်ႈယၢင်ႈ သေ ၵႆႉၸၢင်ႈထူပ်းၽေးဢုပၢတ်ႈၽွင်းႁႃၵိၼ်လဵင်ႉတွင်ႉ ။ မိူၼ်ၼင်ႇ ၵူၼ်းမိူင်းလၢဝ်း 7 ၵေႃႉ ၸိူဝ်းႁဵတ်းၵၢၼ်ႁႃၵိၼ်လဵင်ႉတွင်ႉယူႇၼႂ်းထမ်ႈ တီႈမိူင်းလွင်ႉၸႅင်ႉ ၸႄႈတွၼ်ႈသႆႊသူမ်ၿုၼ်ႊၼၼ်ႉ ဢမ်ႇသၢင်ႇထုၵ်ႇသေ ၶမ်ႈယူႇၼႂ်းထမ်ႈပဵၼ်ဝူင်ႈပၢႆ ။ မိူဝ်ႈလဵဝ် လွတ်ႈဢွၵ်ႇမႃးမူတ်းယဝ်ႉ ဝႃႈၼႆ ။

ၾူၼ်တူၵ်းႁႅင်း ၼမ်ႉႁူၺ်ႈၼမ်ႉလွႆၵိုင်ႉၵၢင်ႉယိုင်ႈၼွင်းလႄႈ ၵူၼ်းလၢဝ်းၸိူဝ်းႁဵတ်းၵၢၼ်ယူႇၼႂ်းထမ်ႈ 7 ၵေႃႉ ၶမ်ၼႂ်းထမ်ႈ ႁိုင်ဝူင်ႈပၢႆ ။ ထမ်ႈၼၼ်ႉမီးတီႈမိူင်းလွင်ႉၸႅင်ႉ ၸႄႈတွၼ်ႈတွၼ်ႈသႆႊသူမ် မိူင်းလၢဝ်းတွၼ်ႈၵၢင် ဢၼ်ယၢၼ်ၵႆၵၼ်တၢင်း ဝဵင်းၸၼ် 75 လၵ်း ။ လွင်ႈၼႆႉ လိုဝ်းလင် တူဝ်ႈယူႇ ၼိူဝ်သူဝ်ႊသျႄႊမီႊတီႊယိူဝ်ႊသေႁဵတ်းႁႂ်ႈလုမ်ႈၾႃႉႁူႉၸွမ်း ။ ၶႂ်ႈငၢႆးပိူင်ပဵၼ် ၸုမ်းလုၵ်ႈဢွၼ်ႇၶမ်ထမ်ႈတီႈမိူင်းထႆးၽွင်းပီ 2018 ။

ၸုမ်းၸွႆႈထႅမ် ၶူၼ်ႉႁႃႁိုင်ထိုင် 9 ဝၼ်း ၸင်ႇထူပ်းႁၼ် 5 ၵေႃႉဢွၼ်တၢင်း ၊ ၸိုဝ်ႈၶဝ်ပဵၼ် မိတ်ႊ လႅၼ်ႊ ယီႊ ၶမ်ႊ လိၼ်ႊ ။ ၸွမ်းၼင်ႇ လႆႈႁၼ် ငဝ်းတူင်ႉဢၼ်ၸုမ်းၸွႆႈထႅမ်ၶဝ် ထၢႆႇဝႆႉ မိူဝ်ႈတႄႇထူပ်းႁၼ် 5 ၵေႃႉၼၼ်ႉ ၵူဝ်ႈၵူမ်ႇၵူဝ်ႈလိၼ် ၊ တီႈၼႃႈၽၢၵ်ႇၶဝ် သုပ်းဝႆႉၾႆးသၢႆတႆႈၾႆးဝႆႉႁင်းၽႂ်မၼ်းသေ ၼင်ႈတုမ်ၵၼ်ယူႇၼိူဝ်မၢၵ်ႇႁိၼ် တေႃႉတႄႉ လွတ်ႈၼမ်ႉလႄႈ တေႃႉတႄႉပေႃးထူၺ်ႈၸႂ်လႆႈ ။ ၽွင်းၵူၼ်းၸွႆႈႁွတ်ႈတီႈၶဝ်ၼၼ်ႉ ယိၼ်းၸူမ်းထိုင်ၸႂ်ႁႅင်းၼႃႇလႄႈ မၢင်ၵေႃႉ ႁွင်ႉႁႆႈဢွၵ်ႇသဵင် ပေႃးၵွင်ႈလူင်ဝႆႉ။

ၽွင်းၼၼ်ႉ ၸုမ်းၸွႆႈထႅမ် ပၼ်ႁႅင်း ႁႂ်ႈၵူၼ်းထူပ်းၽေးၸႂ်ၼိမ် ။ ယူႇဢမ်ႇႁိုင် ၸင်ႇၸႅင်ႈႁႂ်ႈၸုမ်းၸွႆႈထႅမ် ဢၼ်ယူႇ ၾၢႆႇၼွၵ်ႈထမ်ႈ ႁၢင်ႈႁႅၼ်းသူင်ႇပၼ်တၢင်းၵိၼ်ဢၼ်ၵိၼ်ငၢႆႈ ၊ယႃႈယႃ ၼမ်ႉၵိူဝ် ၸိူဝ်းၼႆႉ ႁႂ်ႈပဵၼ်ႁႅင်းၵမ်ႉတူဝ် ၵူၼ်းထူပ်းၽေးၸိူဝ်းၼၼ်ႉ ။

ၸုမ်းၸွႆႈထႅမ် လၢတ်ႈတီႈသိုဝ်ႇတူင်ႇၵူၼ်းဝႃႈ – “ ၵူၼ်းထူပ်းၽေးၸိူဝ်းၼၼ်ႉ ဢမ်ႇလႆႈၵိၼ်သင်မႃး ပဵၼ်ဝူင်ႈပၢႆ ။ သင်ၵိုင်ႉၵၢင်ႉထူပ်းႁၼ်သေ ဢဝ်ဢွၵ်ႇထမ်ႈၵမ်းလဵဝ်ၸိုင် ႁႅင်းၸၢင်ႈဢူၼ်ႈ ထိုင်သၢႆၸႂ်လႆႈ ။ တႃႇဢဝ်ၵူၼ်း ထူပ်းၽေး ဢွၵ်ႇလႆႈငၢႆႈလူမ်ၸႂ်ၼၼ်ႉ ၸုမ်းၸွႆႈထႅမ် ၸွႆႈၵၼ်ဢဝ်ၶိူင်ႈၸၢၵ်ႈသေ ၸုပ်ႇၼမ်ႉဢွၵ်ႇထမ်ႈ ႁႂ်ႈၼမ်ႉယွမ်း ႁႂ်ႈပေႃးပႆလီလီ ” – ဝႃႈၼႆ

ဝၢႆးသေ ထူပ်းႁၼ် 5 ၵေႃႉ မွၵ်ႈ 7 မူင်းၵၢင်ၶမ်ႈ ယဝ်ႉ ၸင်ႇၶူၼ်ႉထူပ်းႁၼ်ထႅင်ႈ 2 ၵေႃႉ ၶၢဝ်း 11 မူင်းၵၢင်ၶိုၼ်း ။ ၸွႆႈလႆႈမူတ်းယဝ်ႉတင်း 7 ၵေႃႉ ။ ၵူၼ်းမိူင်းလၢဝ်းပတ်းပိုၼ်ႉ ဢွၼ်ၵၼ် ယိၼ်းလီယိၼ်းၸူမ်း ထိုင် ၸုမ်းၸွႆႈၵူႈမူႇ ၵူႈၸုမ်း ႁၼ်သိုဝ်ႇၼႂ်းပိုၼ်ႉတီႈမိူင်းလၢဝ်းလၢႆဢၼ် ႁၢႆးငၢၼ်းဝႆႉၼင်ႇၼႆ။

ၼႂ်းၸုမ်းၸွႆႈထႅမ်ၼၼ်ႉ လိူဝ်သေမီးၸုမ်းၸွႆႈထႅမ် ၼႂ်းမိူင်းလၢဝ်း Laos Rescue Volunteer for People ယဝ်ႉ ၸုမ်းၸွႆႈထႅမ် ဢၼ်ၵတ်ႉလႅၼ်ႇၾၢႆႇလမ်လုၺ်းၼမ်ႉ မိူင်းထႆး ၊ ၽူႈၵတ်ႉလႅၼ်ႇလမ်ၼမ်ႉ တီႈမိူင်းၾိၼ်ႊလႅၼ်ႊ ၵေႃႉၼိုင်ႈ ၸိုဝ်ႈ မိၵ်ႊၵူဝ်ႊ ၸိူဝ်းၼႆႉၵေႃႈ ပႃး ။ ၸိူဝ်းၶဝ် ယၢမ်ႈမီးတူဝ်ထူပ်းၸွႆႈထႅမ် ၵူၼ်းၼုမ်ႇ ၸုမ်းမူႇပႃႇ 13 ၵေႃႉ ဢၼ်ၶမ်ထမ်ႈ တီႈဝဵင်ႈမႄႈသၢႆ မိူဝ်ႈ 2018 ၼၼ်ႉ ဝႃႈၼႆ ။

ၵူၼ်းဢၼ်ၶမ်ယူႇၼႂ်းထမ်ႈ 7 ၵေႃႉၼၼ်ႉ တင်းမူတ်း ပဵၼ်ၵူၼ်းၸၢႆး ။ ၶမ်ၸဵမ်မိူဝ်ႈဝၼ်းတီႈ 19/05/2026 ။ ႁိုင်ထိုင် ၶၢဝ်းတၢင်း 9 ဝၼ်း(ဝၼ်းတီႈ 27/05/2026) ၼႆႉ ၸင်ႇထူပ်းႁၼ် ၼႆ သိုဝ်ႇၶၢဝ်ႇလၢဝ်း ຂ່າວເສດຖະກິດ-ການຄ້າ Lao Economic Daily ႁၢႆးငၢၼ်းဝႆႉၼင်ႇၼႆ ။

ၽွင်းၶဝ် တိုၵ်ႉႁဵတ်းၵၢၼ်ႁႃၶမ်း ယူႇၼႂ်းထမ်ႈၼၼ်ႉ ၵိုင်ႉၵၢင်ႉၾူၼ်တူၵ်းႁႅင်း လႄႈ ႁဵတ်းႁႂ်ႈၼမ်ႉယိုင်ႈ ထူမ်ႈၸွမ်းပၢၵ်ႇထမ်ႈ ။ ၼမ်ႉၵိုင်ႉၵၢင်ႉ ၶိုၼ်ႈဝႆးၼႃႇလႄႈ ၵူၼ်းၸိူဝ်းယူႇၼႂ်းထမ်ႈဢမ်ႇတၼ်းတင်ႈတူဝ် ထိုင်တီႈၶမ်ႈယူႇၼႂ်းထမ်ႈ သိုဝ်ႇ BBC ႁၢႆးငၢၼ်းဝႆႉ။

ၾူၼ်ၵေႃႈဢမ်ႇႁိူတ်ႇ ၼမ်ႉၵေႃႈယိုင်ႈၶိုၼ်ႈယူႇၵူႈယၢမ်းသေတႃႉ ၸုမ်းၸွႆႈထႅမ် ဢမ်ႇယင်ႉဢမ်ႇလိုဝ်ႈ ႁူမ်ႈၵၼ် ပဵၼ်ၼမ်ႉၼိုင်ႈၸႂ်လဵဝ်ၽွမ်ႉၵၼ် လမ်ၼမ်ႉ လုၺ်းၼမ်ႉ ထိုင်တီႈပေႃးၵတ်းပေႃးလၢင်ႈတင်းတူဝ် ။ ဢမ်ႇထိုင်တီႈ လူႉသုမ်းသၢႆၸႂ်သေတႃႉ ပဵၼ်ဢၼ်လိူဝ်ႁႅင်းဝႆႉတႄႉတႄႉ ၼႆယူႇ။

ၸုမ်းၸွႆႈထႅမ်ၾၢႆႇထႆး ဢၼ်ၵႂႃႇၸွႆႈထႅမ်တီႈထမ်ႈၼၼ်ႉ လၢတ်ႈတီႈသိုဝ်ႇ Thairath News – ข่าวไทยรัฐ ဝႃႈ –ႁူးထမ်ႈဢၼ်ၵူၼ်းၶမ်ၼႂ်းမၼ်းၼႆႉ ဢမ်ႇၸႂ်ႈႁူးထမ်ႈဢၼ် ပဵၼ်မႃးၸွမ်းသၽႃႇဝ ။ ပဵၼ်ႁွင်ႈမိူင် ဢၼ်သိုပ်ႇၶုတ်းထႅင်ႈၼႂ်းထမ်ႈ ။ ၸင်ႇၼၼ်လႄႈ ၽွင်းၼမ်ႉယိုင်ႈၶဝ်ႈၼၼ်ႉ ႁဵတ်းႁႂ်ႈလိၼ်ၸိူဝ်းၼၼ်ႉ ပဵၼ်ၵူမ်ႇပဵၼ်ဢုင် ႁူးဢၼ်ၸၢင်ႈၶဝ်ႈၸၢင်ႈဢွၵ်ႇၸိူဝ်းၼၼ်ႉၵေႃႈ တၼ်ပႅတ်ႈ ” – ဝႃႈၼႆ။

ဝၢႆးသေ ၸုမ်းၸွႆႈထႅမ် ၸွႆႈလႆႈသဵင်ႈမူတ်းယဝ်ႉၼၼ်ႉ သၢႆပီႈသၢႆၼွင်ႉ ၵူၼ်းထူပ်းၽေးလႄႈ ၵူၼ်းမိူင်းလၢဝ်း ဢၼ်ၵႂႃႇပႂ်ႉတူၺ်းငဝ်းလၢႆး ဢွၼ်သိူဝ်းၸႂ်ႁူမ်ၸူမ်း ထိုင်တီႈပေႃးၵျွၵ်းၵႃႈၵျွၵ်းဝႅၼ် ၊ မၢင်ၵေႃႉ ၸူမ်းထိုင်တီႈၼမ်ႉတႃလႆ ။

ထမ်ႈဢၼ်ၵူၼ်းလၢဝ်းၵႂႃႇၶမ် 7 ၵေႃႉၼႆႉ သဵၼ်ႈတၢင်းၵႂႃႇထိုင်ၵေႃႈ ယၢပ်ႇ ၵႆသဵၼ်ႈတၢင်းလူင် ၊ ၾူၼ်ၵေႃႈသမ်ႉတူၵ်းလႄႈ ၸုမ်းၸွႆႈထႅမ်မီးလွင်ႈၶွင်ႈၶမ်တင်းၼမ် ။ တႃႇၵႂႃႇထိုင်တီႈပၢၵ်ႇထမ်ႈၼၼ်ႉ ၸုမ်းၸွႆႈထႅမ် လႆႈပႆ မွၵ်ႈ 2 လၵ်းပၢႆ ပဵၼ်သဵၼ်ႈတၢင်းလွႆသုင် ။

တႃႇၵႂႃႇၸူးထမ်ႈၼၼ်ႉ လႆႈလတ်းမၢၵ်ႇၽႃမၢၵ်ႇႁိၼ်လၢႆတီႈလႄႈ ၽူႈၵဵဝ်ႇၶွင်ႈၼႂ်းမိူင်းလၢဝ်းၶဝ် ပၼ်ၾၢင်ႉလၢႆပီယဝ်ႉသေတႃႉ ၵူၼ်းပိုၼ်ႉတီႈ တိုၵ်ႉဢွၼ်ၵၼ် ၵႂႃႇႁႃၶမ်း ႁႃတူဝ်သတ်းၼႂ်းထမ်ႈၼၼ်ႉယူႇ ၵူၼ်းလၢဝ်းၵေႃႉၼိုင်ႈ လၢတ်ႈတီႈသိုဝ်ႇတူင်ႇၵူၼ်းၼင်ႇၼႆ။