ၸုမ်းဢႃႇၵႃႇသ မိူင်းဢမေႊရိၵၼ်ႊ (NASA) ႁၢႆးငၢၼ်းၼႄဝႆႉ လွင်ႈႁၢင်ႈႁႅၼ်း တႃႇတေၵႂႃႇၵေႃႇသၢင်ႈဢွင်ႈတီႈယူႇသဝ်း ၼိူဝ်လိူၼ်၊ ၼႂ်းၼၼ်ႉ လႆႈႁၼ်မီးပႃး ႁုၼ်ႇၸၢၵ်ႈ ဢၼ်ၵႂႃႇမႃးလႆႈ လႄႈ ၶိူင်ႈတရူၼ်း ၸိူဝ်းၼႆႉ။

တႃႇတေၵႂႃႇလဵပ်ႈႁဵၼ်းၼိူဝ်လိူၼ်ၼၼ်ႉ ၸုမ်းၼႃႊသႃႊ (NASA) ဝၢင်းၽႅၼ်ဝႆႉယူႇ လၢႆလၢႆၶၵ်ႉတွၼ်ႈ။ 1 – တေပွႆႇႁုၼ်ႇၸၢၵ်ႈၵႂႃႇၼိူဝ်လိူၼ် တွၼ်ႈတႃႇတေၸၢမ်းတူၺ်း လွၵ်းလၢႆးပၢႆးၸၢင်ႈ လႄႈ တႃႇၵႂႃႇလဵပ်ႈႁဵၼ်းပိုၼ်ႉတီႈ ၼိူဝ်လိူၼ်၊ 2- ပေႃးထိုင်မႃးၼႂ်းပီ 2029 မုင်ႈမွင်းဝႆႉဝႃႈ တေၵႂႃႇတႄႇၵေႃႇသၢင်ႈႁူင်းၵေႃႇၵၢႆႇ၊ ဢွင်ႈတီႈ ဢၼ်တေယူႇသဝ်းလႆႈတႃႇသေႇ၊ 3- တေပၼ်ပုၼ်ႈၽွၼ်း ၸဝ်ႈႁူႉမေႃၾၢႆႇ ဢႃႇၵႃႇသၶဝ် ပၼ်ႇပုတ်ႈၵၼ် ၵႂႃႇႁဵတ်းၵၢၼ်လဵပ်ႈႁဵၼ်းတီႈၼိူဝ်လိူၼ် ဝႃႈၼႆ။

ၶွမ်ႊပၼီႊဢႃႇၵႃႇသ ၶွင် Jeff Bezos ၽူႈၵေႃႇတင်ႈ Amazon ၼၼ်ႉၵေႃႈ တေၶဝ်ႈပႃးၼႂ်းၶၵ်ႉတွၼ်ႈ ဢၼ်တေၵေႃႇသၢင်ႈၶိူင်ႈၸၢၵ်ႈၸိူဝ်းၼၼ်ႉ။

ဢမေႊရိၵၼ်ႊၼႆႉ မီးၵၢင်ၸႂ်ၶႂ်ႈၶိုၼ်ႈၵႂႃႇၼိူဝ်လိူၼ်ထႅင်ႈၵမ်းၼိုင်ႈ ၵွၼ်ႇၸွမ်ၸိုင်ႈ တေႃႈၼႄႊလ်ထရမ်ႉ ပႆႇလိုဝ်ႈတၼ်းႁဵင်းပဵၼ်ၸွမ်ၸိုင်ႈ ၼႂ်းပီ 2029။

ၵူၺ်းၵႃႈ တႃႇတေသူင်ႇၵူၼ်းၶိုၼ်ႈၵႂႃႇၼိူဝ်လိူၼ်ထႅင်ႈၵမ်းၼိုင်ႈၼႆႉ ၸုမ်း NASA မိူင်းဢမေႊရိၵၼ်ႊ လႆႈၶဵင်ႇတႃႉၵၼ်တင်း မိူင်းၶႄႇဝႆႉ။ ယွၼ်ႉဝႃႈ ပေႃးထိုင်မႃးၼႂ်းပီ 2030 မိူင်းၶႄႇၵေႃႈမီးဝႆႉၶပ်ႉမၢႆ တႃႇၵူၼ်း တေၵႂႃႇယူႇသဝ်းလႆႈၼိူဝ်လိူၼ် ဝႃႈၼႆ။

မိူဝ်ႈလိူၼ်မၢတ်ႉၶျ်ပူၼ်ႉမႃးၼႆႉ ၸုမ်း NASA ယၢမ်ႈပိုၼ်ၽၢဝ်ႇဝႆႉဝႃႈ ပေႃးထိုင်မႃးၼႂ်းပီ 2032 ၸိုင် တေဢၢၼ်းၵႂႃႇၵေႃႇသၢင်ႈပၼ်တီႈယူႇသဝ်း ဢၼ်ၸႂ်ႉတိုဝ်းႁႅင်းထၢတ်ႈသူဝ်ႊလႃႊ လႄႈ ၼိဝ်ႊၶလီႊယိူဝ်ႊ တီႈၼိူဝ်လိူၼ်၊ တေသဵင်ႈငိုၼ်း မွၵ်ႈ 20 ပီႊလီႊယၼ်ႊတေႃႇလႃႇ။

ၵဵဝ်ႇလူၺ်ႈလွင်ႈၸိူဝ်းၼႆႉသေ ၽူႈမီးၸၼ်ႉသုင် တီႈၸုမ်း NASA ၵေႃႈ လၢတ်ႈဝႃႈ – တႃႇတေၶိုၼ်ႈၵႂႃႇ ပၵ်းသဝ်းလႆႈၼိူဝ်လိူၼ်ၼၼ်ႉ ဢမေႊရိၵၼ်ႊ တိုၼ်းတေဢမ်ႇမီးဝၼ်းယွမ်းၵၢၼ်ႉထွႆလင် ၼႆယဝ်ႉ။