မေႃသွၼ်ယိင်း ယူႇဝၢၼ်ႈမိၼ်းမူႇ (မြင်းမူ) ဝဵင်းပၢင်လႃႈ ၸိုင်ႈတႆးပွတ်းၸၢၼ်း လဵၼ်ႈၵဵမ်ႊဢွၼ်ႊလၢႆႊ ထိုင်တီႈတိတ်းၼီႈၶွတ်ႇ ဢမ်ႇမီးငိုၼ်းသၢႆႈ – ၵႂႃႇၸူၼ်ၶူဝ်းၶွင်ငိုၼ်းၶမ်း ၵူၼ်းၼႂ်းဝၢၼ်ႈ 2 ပႃႈလၢၼ် သေယဝ်ႉတႅင်းတၢႆ ။
ၼႂ်းဝၼ်းတီႈ 19/5/2026 ယၢမ်းႁူဝ်ၶမ်ႈ 7 မူင်းၶိုင်ႈၼၼ်ႉ မေႃသွၼ်ယိင်း ၸိုဝ်ႈ- တေႃႇၼူႉၼူႉထူၺ်း ဢၼ်သွၼ်လိၵ်ႈယူႇဝႆႉတီႈႁူင်းႁဵၼ်းၸၼ်ႉဢွၼ် ၼႂ်းဝၢၼ်ႈၶဝ်ၼၼ်ႉ ၶဝ်ႈၼႂ်းႁိူၼ်း 2 ၵေႃႉပႃႈလၢၼ် (ဢၼ်ပိုတ်ႇႁၢၼ်ႉၶၢႆၶူဝ်းၵုၼ်ႇဝႆႉ ၼႂ်းဝၢၼ်ႈလဵဝ်ၵၼ်) ၼၼ်ႉသေ ဢဝ်မိတ်ႈၸမ်ႈ ၸူၼ်ၶူဝ်းၶွင်ငိုၼ်းၶမ်း။ ဝၢႆးၼၼ်ႉ ဢဝ်မိတ်ႈတႅင်း 2 ပႃႈလၢၼ်ၼၼ်ႉလၢႆလၢႆၵမ်း ထိုင်တီႈတၢႆထင်တီႈ။
ၵူၼ်းၸွႆႈထႅမ်ၼႂ်းပိုၼ်ႉတီႈ လၢတ်ႈဝႃႈ -“ ၽွင်းၼၢႆးလၢၼ်သွင်ၵေႃႉ မီးဝႆႉတီႈႁိူၼ်းယူႇၼၼ်ႉ မေႃသွၼ်ယိင်း ၶဝ်ႈမႃးၼႂ်းႁိူၼ်း ဢဝ်မိတ်ႈတႅင်း ၵေႃႉပဵၼ်ပႃႈ ဢွၼ်တၢင်း ။ ၽွင်းလၢၼ်ယိင်းမၼ်း ႁွင်ႉသႅၼ်ႇႁႃတၢင်းၸွႆႈထႅမ်ယူႇၼၼ်ႉ မေႃသွၼ်ၼၼ်ႉမႃးတႅင်းၵေႃႉပဵၼ်လၢၼ်ယိင်းၼၼ်ႉထႅင်ႈ။ၵူၼ်းႁိမ်းႁွမ်း ႁူမ်ႈၵၼ်တီႉၺွပ်းမေႃသွၼ်ယိင်းၼၼ်ႉလႆႈ။ 2 ၵေႃႉပႃႈလၢၼ် မၢတ်ႇၸဵပ်းလိူဝ်ႁႅင်း ထုၵ်ႇသူင်ႇယူတ်းယႃတူဝ်တီႈႁူင်းယႃ”- ဝႃႈၼႆ။
ၵေႃႉပဵၼ်ပႃႈ ၵႂႃႇတၢႆတီႈႁူင်းယႃလူင်ဝဵင်းတူၼ်ႈတီး။ ၵေႃႉပဵၼ်လၢၼ်ယိင်းသမ်ႉတၢႆတီႈႁူင်းယႃ ဝဵင်းပၢင်လႃႈ ဝႃႈၼႆ။
2 ၵေႃႉၵႃႈလၢၼ် ဢၼ်ထုၵ်ႇမေႃသွၼ်ယိင်း တႅင်းတၢႆၼၼ်ႉ ၸိုဝ်ႈပႃႈမျႃႉၸီႇ လႄႈ လၢၼ်ယိင်း ၸိုဝ်ႈမသၢၼ်းသၢၼ်းဢေး လုၵ်ႈႁဵၼ်းတိုၵ်ႉတွပ်ႇလိၵ်ႈၸၼ်ႉ 12 ဝႆႉပီၼႆႉ ။ မသၢၼ်းသၢၼ်းဢေး ၺႃးတႅင်း 5 ၵမ်းသေလူႉတၢႆ ။
ၽွင်းၵူၼ်းႁိမ်းႁွမ်း တီႉၺွပ်းၶင်ဝႆႉ မေႃသွၼ်ယိင်းၵေႃႉၼၼ်ႉ ၵူတ်ႇထတ်းႁၼ် ငိုၼ်း 50 သႅၼ်ပျႃးလႄႈ မွင်းၵူၺ်း 5 သႅၼ်ႈတီႈတူဝ်မၼ်းၼၢင်း ။ ၼႂ်းဝၼ်းတီႈ 20 /5/2026 ၵူၼ်းပိုၼ်ႉတီႈၸင်ႇလႆႈ ဢဝ်တူဝ်မၼ်းၼၢင်း ဢၢပ်ႈၼႂ်းမီးပုၼ်ႈၽွၼ်းၼႂ်းပိုၼ်ႉတီႈ ။
ၵူၼ်းၸွႆႈထႅမ်ၼႂ်းပိုၼ်ႉတီႈ တႅမ်ႈတၢင်ႇဝႆႉသိုဝ်ႇတူင်ႇဝူင်းဝႃႈ -“ ၽွင်းၸဝ်ႈၼႃႈတီႈၶဝ်ၵူတ်ႇထတ်းၼၼ်ႉ လႆႈႁူႉဝႃႈ မေႃသွၼ်လႄႈ မႄႈၶဝ် တိတ်းယိၼ်ႉၵဵမ်းဢွၼ်ႊလၢႆႊ ထုၵ်ႇၼီႈၼမ်ၼႃႇသေ ၸင်ႇလႆႈၵႂႃႇၸူၼ် ၶႃႈႁႅမ်ပိူၼ်ႈတၢႆ ”- ဝႃႈၼႆ ။
ယၢမ်းလဵဝ် မေႃသွၼ်ယိင်းၼၼ်ႉ ထုၵ်ႇၵုမ်းၶင်တူဝ်ဝႆႉတီႈႁူင်းပလိၵ်ႈဝဵင်းပၢင်လႃႈ ။ထုၵ်ႇဢဝ်လိူင်ႈဝႆႉ လူၺ်ႈဢမု (ပ) ၃၁/၂၀၂၆၊ ပုဒ်မ ၃၀၂/၄၅၈/၃၂၆ ၼႆယဝ်ႉ ။
ၵဵမ်းတေႃႇလွင်း ဢွၼ်ႊလၢႆႊ ဢၼ်ဝႃႈၼႆႉ လူတ်ႇဢဝ်ၼႂ်း Application မိုဝ်းထိုဝ်လႆႈငၢႆႈငၢႆႈ။ ပၢင်တေႃႇလွင်းၵဵမ်း ၸိူင်ႉႁိုဝ်ၵေႃႈမီး ။ မိူၼ်ၼင်ႇ ပႃးၸဵမ်ၵဵမ်းတေႃႇၽၢႆႉ၊ ၵဵမ်းၸူၵ်းၶႅပ်းၸၢမ်းၵၢမ်ႇ၊ ၵဵမ်းယိုဝ်းပႃ တႄႇၵႂႃႇၸိူဝ်းၼႆႉ မီးထႅင်ႈလၢႆလၢႆသႅၼ်း။
ပဵၼ်ၵဵမ်းဢၼ် လၢႆးႁပ်ႉ/ ၸၢႆႇငိုၼ်းတေႃႇလွင်းသမ်ႉ – ၼႂ်း App လဵၼ်ႈၵဵမ်းၼၼ်ႉ တေမီးပႃး ဢႅပ်ႇငိုၼ်းမႃးၵမ်းလဵဝ်။ ၵူၼ်းတေလဵၼ်ႈၵဵမ်းၼႆႉ တေလႆႈဢဝ်ငိုၼ်းၼႂ်း Kpay/ Wave pay ၸဝ်ႈၵဝ်ႇသေ သႂ်ႇဝႆႉ ၼႂ်းဢႅပ်ႇငိုၼ်းၼၼ်ႉ။
ဢိင်ၼိူဝ်ငဝ်းလၢႆးၵၢၼ်ႁႃၵိၼ်လဵင်ႉတွင်ႉ ယၢပ်ႇၽိုတ်ႇသေ မၢင်ၸိူဝ်း ၶႂ်ႈႁႃၵၢၼ် ဢၼ်လႆႈငိုၼ်းငၢႆႈ။ ၵမ်ႈၽွင်ႈၵေႃႈ ၸူးငၢႆႈၼႃႇၽႅဝ်သေ တူၵ်းပဵၼ်တူဝ်ယိူဝ်ႇ ပၢင်တေႃႇလွင်းၼႂ်းဢွၼ်ႊလၢႆႊ ၸိူဝ်းၼႆႉၵေႃႈမီးမႃးတင်းၼမ် ၼႆယဝ်ႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ