ႁႅင်းၵၢၼ်ယၢၼ်မိူင်း ၸိူဝ်းႁွတ်ႈၼႂ်းမိူင်းထႆးၼႆႉ ဢမ်ႇပိူင်ၼိုင်ႈၵေႃႈပိူင်ၼိုင်ႈ လႆႈၾၢင်ႉယူႇသေႇသေႇ ။ ၵူၼ်းမိူင်းတႆးမိူင်းမၢၼ်ႈပႃးၸဵမ်ၵူၼ်းတၢင်ႇမိူင်း ဢၼ်လႆၶဝ်ႈမိူင်းထႆးၵေႃႈ မီးယူႇၵူႈမိုဝ်ႉၵူႈဝၼ်း ။ ၸိူဝ်းမီးဝတ်းဝႂ်တဵမ်ထူၼ်ႈသေၶဝ်ႈၵေႃႈမီး ၸိူဝ်းဢၼ်ဢမ်ႇမီးဝႂ်သင်သေၶဝ်ႈၵေႃႈမီး ။ ၼႂ်းၵႄႈၼၼ်ႉ ၵူၼ်းၸိူဝ်းတင်ႈၸႂ်မႃးႁဵတ်းၵၢၼ်ဢၼ်ဢမ်ႇၸွမ်းၶွပ်ႇၸွမ်းပိူင်ၵေႃႈ သမ်ႉမီးၼမ်လႄႈ ၸဝ်ႈၼႃႈတီႈထႆး ၵမ်းၵမ်းပိုၼ်ၽၢဝ်ႇတႃႇၵႂၢတ်ႇလၢင်ႉ ။

ပွၵ်ႈၼႆႉ ၸဝ်ႈၼႃႈတီႈထႆး ပိုၼ်ၽၢဝ်ႇ ၽႅၼ်ၵၢၼ်ၶၢဝ်းယၢဝ်းၶၢဝ်းပွတ်း တႃႇၵႂၢတ်ႈလၢင်ႉ ၵူၼ်းၵေႃႇၵၢၼ်ႁၢႆႉ ၵူၼ်းၸိူဝ်းဢမ်ႇထုၵ်ႇၸွမ်းပိူင်ၼႆထႅင်ႈ ။

ႁွင်ႈၵၢၼ်ၾၢႆႇပလိၵ်ႈမိူင်းထႆး ဝၢင်းၽႅၼ် တႃႇၵႂၢတ်ႇလၢင်ႉ ၽဵဝ်ႈမူၺ်ႉ ႁႅင်းၵၢၼ် ၸိူဝ်းဢၼ်ဢမ်ႇယူႇမႅၼ်ႈၸွမ်း ပၵ်းပိူင်မၢႆမီႈ ။

လွင်ႈႁႄႉႁၢမ်ႈႁႅင်းၵၢၼ်ႁဵတ်းၽိတ်းပၵ်းပိူင်တႄႉ ယၢမ်ႈဢွၵ်ႇမႃးလၢႆၵမ်းယဝ်ႉသေတႃႉ ဢမ်ႇၸႅၵ်ႇၶၢဝ်းယၢဝ်းၶၢဝ်းပွတ်း ။ ပွၵ်ႈၼႆႉသမ်ႉ တမ်းဝၢင်းၽႅၼ်ၵၢၼ် ၶၢဝ်းယၢဝ်းလႄႈၶၢဝ်းပွတ်း မီးယူႇ 3 ၶၵ်ႉတွၼ်ႈ။
1)ၽႅၼ်ၵၢၼ် ၶၢဝ်းတၢင်း 3 လိူၼ် တႃႇလူင်းပိုၼ်ႉတီႈၵူတ်ႇထတ်းႁႅင်းၵၢၼ်ဢၼ်ဢမ်ႇၸွမ်းပိူင်

ၼႂ်းတွၼ်ႈၼႆႉ ၸဝ်ႈၼႃႈတီႈထႆးၵူႈဝၢၼ်ႈၵူႈဝဵင်း တေၸႅၵ်ႇပုၼ်ႈၽွၼ်းၵၼ် လူင်းၵူတ်ႇထတ်းၼႂ်းပိုၼ်ႉတီႈဢၼ်ႁႅင်းၵၢၼ်ယူႇသဝ်း ၊ တေၵူတ်ႇထတ်းပႃး ဢွင်ႈတီႈဢၼ်ၵဵဝ်ႇၶွင်ႈယႃႈမဝ်းၵမ် ၊ တေၵူတ်ႇထတ်းပႃး လွင်ႈၵဵပ်းၶွၼ်ႇ လႄႈ ၵၢၼ်ဢွၼ်ႊလၢႆႊ ၸိူဝ်းၼႆႉ ။
ၸင်ႇၼၼ်လႄႈ ႁႅင်းၵၢၼ်ၵိုင်ႇလီငိူင်ႉဝႄႈဝႆႉ လွင်ႈၶွၼ်ႈတုမ်ၵၼ်ၼမ်ၼမ် ၊ လွင်ႈဢူၼ်ဢၢၼ်မေႃးမႄး ၸိူဝ်းၼႆႉ။ ဢမ်ႇသၢင်ႇထုၵ်ႇ ၸၢင်ႈၺႃးၸဝ်ႈၼႃႈတီႈ ၵူတ်ႇထတ်းဢဝ်လိူင်ႈလႆႈတၢင်းၽိတ်းလၢႆသႅၼ်းလၢႆပိူင် ၼႆ ၽူႈတူင်ႉၼိုင်တႃႇႁႅင်းၵၢၼ်ၵေႃႉၼိုင်ႈလၢတ်ႈ။

2) ၽႅၼ်ၵၢၼ် ၶၢဝ်းတၢင်း 6 လိူၼ် တေႃႇ 9 လိူၼ် တေၵဵပ်းၶေႃႈမုလ်း ထတ်းထွင်ဝႂ်ဝီႊသႃႊ (Visa)
ၼႂ်းတွၼ်ႈၼႆႉ ပလိၵ်ႈၾၢႆႇၵူတ်ႇထတ်းၵူၼ်းၶဝ်ႈမိူင်း တေလူင်းထတ်းထွင်ပႃး ႁႅင်းၵၢၼ်လႄႈၵူၼ်းၼွၵ်ႈမိူင်း ၸိူဝ်း ႁဵတ်းဝႂ်ၶၢမ်ႈမိူင်း ဝီႊသႃႊ (Visa) ၸိူဝ်းၼႆႉသေထင်သဝ်းၼႂ်းမိူင်းထႆး ။ ဢမ်ႇဝႃႈ တေပဵၼ်ၵူၼ်းလူင်းတိုၼ်းလၢင်းပဵၼ်ပေႃႈလဵင်ႉမႄႈလဵင်ႉ ၊ ၵူၼ်းၵိၼ်ၸၢင်ႈၵေႃႈယဝ်ႉ တေထတ်းထွင်ဝႃႈ ထုၵ်ႇဢမ်ႇထုၵ်ႇၸွမ်းပၵ်းပိူင် ၼႆၸိူဝ်းၼႆႉ။ သင်ထူပ်းႁၼ် ၽိတ်းပၵ်းပိူင် တေဢဝ်လိူင်ႈပၼ်တူတ်ႈတၢမ်ႇၼၵ်းၼႃ ၼင်ႇပိူင်မီးဝႆႉ ၼႆယူႇ။

3)ၶၢဝ်းတၢင်း 1ထိုင် 2 ပီၼၼ်ႉ တေဢၢၼ်းၵဵပ်းၶေႃႈမုလ်းႁႅင်းၵၢၼ်လႄႈၵူၼ်းၼွၵ်ႈမိူင်းႁႂ်ႈမီးတီႈလဵဝ်။

ၼႂ်းတွၼ်ႈၼႆႉ ၸဝ်ႈၼႃႈတီႈၸိူဝ်းၵဵဝ်ႇၶွင်ႈ တေၵဵပ်းၶေႃႈမုလ်းႁႅင်းၵၢၼ်လႄႈၵူၼ်းၼွၵ်ႈမိူင်း ၶွၼ်ႈဝႆႉတီႈလဵဝ် One Police ။ ႁႂ်ႈၵပ်းသိုပ်ႇလႆႈၵွင်ႉသၢၼ်ၵၼ်လႆႈၵူႈႁွင်ႈၵၢၼ် ။ တူဝ်ယၢင်ႇမၼ်း သင်ငမ်းငဝ်းႁူႉငိၼ်းဝႃႈ ႁႅင်းၵၢၼ် ႁိုဝ် ၽူႈလႂ်ၽႂ်ၵေႃႉလႂ်ၵေႃႈယဝ်ႉ လႅပ်ႈမီးတၢင်းၽိတ်းၸိုင် ႁႂ်ႈၶူၼ်ႉသွၵ်ႈပိုၼ်းသုၼ်ႇတူဝ်ႁႅင်းၵၢၼ်ႁိုဝ် ၵူၼ်းၵေႃႉလႂ်ၵေႃႉၼၼ်ႉ ၵပ်းသိုပ်ႇထတ်းထွင်လႆႈၵမ်းသိုဝ်ႈ ။

တူၵ်ႇလၢတ်ႈပႃးဝႃႈ ပႃးၸဵမ်ၸဝ်ႈၼႃႈတီႈ သင်ၵိၼ်သူးၵိၼ်လၢပ်ႈၸိုင် ၸၢင်ႈထတ်းထွင်ဢဝ်လိူင်ႈၵႂႃႇလႆႈၵမ်းသိုဝ်ႈ ဝႃႈၼႆ။
ၶေႃႈပိုၼ်ၽၢဝ်ႇၸိူဝ်းၼႆႉ ဢွၵ်ႇမႃး မိူဝ်ႈဝၼ်းတီႈ 12/05/2026 ။ လွင်ႈလူင်းပိုၼ်ႉတီႈ ၵူတ်ႇထတ်းၸိူင်ႉၼႆ လူင်ပွင်ၸိုင်ထႆးတႄႉလၢတ်ႈဝႃႈ တႃႇႁၵ်ႉသႃ လွင်ႈၼိမ်တဵင်ႈဝၢၼ်ႈမိူင်းဝႃႈၼႆသေတႃႉ တႃႇႁႅင်းၵၢၼ်တႄႉ ဢမ်ႇၵႂႃႇမႃးထၢင်ႇႁၢင်ႈလွတ်ႈလႅဝ်း ၵူဝ်ၸဝ်ႈၼႃႈတီႈထၢင်ႇထိူမ်လၢႆလွင်ႈသေ တူၵ်းပဵၼ်တူဝ်ယိူဝ်ႇၼႂ်းၽႅၼ်ၵၢၼ်ၸိူဝ်းၼႆႉ ။

ႁႅင်းၵၢၼ်ၵူႈၵေႃႉ ႁႂ်ႈဢဝ်ဝတ်းဝႂ်ၵိုၵ်းတူဝ်ဝႆႉတႃႇသေႇ ပေႃးၺႃးၸဝ်ႈၼႃႈတီႈၵူတ်ႇထတ်းၵေႃႈ ႁႂ်ႈၸၢင်ႈဢဝ်ၼႄလႆႈၵမ်းလဵဝ် ။ ႁႂ်ႈမေႃယူႇမေႃၵိၼ် ႁႂ်ႈၾၢင်ႉၵၼ်ယႂ်ႇၼမ် ၼႆ MIC – သုၼ်ၶေႃႈမုၼ်း ႁႅင်းၵၢၼ်ယၢၼ်မိူင်း ၵေႃႈပၼ်ၾၢင်ႉဝႆႉယူႇ။
ၽွင်းပိုၼ်ၽၢဝ်ႇဢွၵ်ႇၽႅၼ်ၵၢၼ်ၸိူဝ်းၼႆႉၵူၺ်း ၸဝ်ႈၼႃႈတီႈထႆး ၶဝ်ႈၵူတ်ႇထတ်း ၵူၼ်းၸၢဝ်းၶႄႇၸုမ်းၼိုင်ႈ ဢၼ်ႁဵတ်းၵၢၼ်ပဵၼ်လၢမ်ႈ ၊ ၼၢႆးၼႃႈ ဢၼ်ဢမ်ႇၶဝ်ႈတၢင်းၵၢၼ် ။ တီႉၺွပ်းလႆႈ ၸၢဝ်းၶႄႇ 15 ၵေႃႉ လႄႈ ၵူၼ်းမိူင်းမၢၼ်ႈ 2 ၵေႃႉ ။

ယိုတ်းလႆႈပႃး ၶွမ်ႊ 10 ၶိူင်ႈ ၊ ၾူၼ်း 26 ၶိူင်ႈ ၊ ၶဝ်တၢင်းမူတ်းၼႆႉ ႁဵတ်းၵၢၼ်ဢွၼ်ႊလၢႆႊ ဢၼ်လွၵ်ႇလႅၼ်ၵူၼ်းၸၢဝ်းၶႄႇၶိုၼ်း ။ လႅၼ်ႁႂ်ႈလူင်းတိုၼ်းလၢင်းၼႂ်းဢႅပ်ႊပလီႊၶေႊသျိၼ်ႊ ၊ မီးၵူၼ်းတူၵ်းပဵၼ်တူဝ်ယိူဝ်ႇၸွမ်း ဢမ်ႇယွမ်း 1 သႅၼ်ၵေႃႉ ။ သုမ်းငိုၼ်းၸွမ်း 100 လၢၼ်ႉယႂၼ်ႊ ငိုၼ်းၶႄႇ ၼပ်ႉငိုၼ်းထႆး 500 လၢၼ်ႉၿၢတ်ႇ ၼႆ Thai PBS ႁၢႆးငၢၼ်းဝႆႉၼင်ႇၼႆ။

ၽွင်းၸဝ်ႈၼႃႈတီႈမိူင်းထႆး ၵူတ်ႇထတ်းႁႅင်းယူႇၼႆႉ ၾၢႆႇၵူၼ်းၸိူဝ်းႁဵတ်းၵၢၼ်ၽိတ်းပၵ်းပိူင်ၸိူဝ်းၼႆႉၵေႃႈ တိုၼ်းတေႁႃလၢႆးတၢင်းတႃႇယူႇလွတ်ႈၶဝ်ယူႇတိၵ်းတိၵ်းလႄႈ ၸဝ်ႈၼႃႈတီႈ တေၵူတ်ႇထတ်းႁႂ်ႈယွႆႈယႅမ်းလိူဝ်ၵဝ်ႇယူႇၼႆ – ၽူႈမီးပုၼ်ႈၽွၼ်းၾၢႆႇၵူတ်ႇႁႅင်းၵၢၼ်လၢတ်ႈၵႂႃႇတီႈသိုဝ်ႇ Thai PBS ၼင်ႇၼႆ။

မိူင်းထႆးၼႆႉ ပဵၼ်ဝႆႉဢွင်ႈတီႈဢၼ် ၵူၼ်းတၢင်ႇတီႈသီႇလႅၼ်ၶွၼ်ႈယူႇသဝ်းဝႆႉၼမ် ၊ မၢင်ၸိူဝ်း ပဵၼ်ၸဝ်ႈငိုၼ်းသႃး သိုဝ်ႉဢဝ်ၶၢတ်ႈဢဝ် ၸိုဝ်ႈၵူၼ်းထႆးသေ ႁဵတ်းၵၢၼ်သႅၼ်းဢၼ်ဢမ်ႇထုၵ်ႇၸွမ်းပၵ်းပိူင်ၸိူဝ်းၼႆႉ ။ မၢင်ၸိူဝ်းသမ်ႉ တင်ႈၸႂ် ၽွတ်ႈၸုမ်းလွၵ်ႇလႅၼ်ယူႇၼႂ်းမိူင်းထႆးလႄႈ ႁဵတ်းႁႂ်ႈမီးလွင်ႈဢမ်ႇၼိမ်သဝ်းမႃး ။

လွင်ႈၼႆႉ ယိင်းမူဝ်ၶၢဝ်ၼူၼ်း ၽူႈၸတ်းလၢႆးၵၢၼ်ၾၢႆႇတႆး တီႈႁူင်းပွႆႇသဵင်သေႃဝေႃႊထေႃႊ ၵဵင်းမႂ်ႇ AM 1476 KHz လၢတ်ႈၼႄၼင်ႇၼႆ

ယွၼ်ႉဝႃႈ မိူင်းထႆးၼႆႉ မၼ်းပဵၼ်ဢွင်ႈတီႈဢၼ်ၵူၼ်းၸိူဝ်းႁဵတ်းၵၢၼ်ဢၼ်ဢမ်ႇလီမႃးလိုဝ်ႈဝႆႉ ။ယဝ်ႉၵေႃႈ မႃးၸႂ်ႉၸိုဝ်ႈၵူၼ်းထႆးႁႃႉ ဢဝ်ငိုၼ်းမွၼ်ႁေ မိူၼ်ၼင်ႇဝႃႈ ပီႈမီးဝတ်းထႆးႁႃႉၼႆၵေႃႈ ဢဝ်ၸိုဝ်ႈႁဝ်းပဵၼ်ဢၼေႃႊမီႊၼီႊၵႂႃႇပႅတ်ႈ ။ၵႂႃႇသိုဝ်ႉဢီႈသင်တၢင်ႇမဵဝ်းသေ ၵၢၼ်တၢင်ႇၵေႃႉသမ်ႉမႃးႁဵတ်းၵၢၼ်ႁဵတ်းၼႆဢေႃႈ။တႃႇၵႂၢတ်ႇလၢင်ႉၸိူဝ်းႁဵတ်းၵၢၼ်ၵျႃႊၽျႅၼ်ႉပႃး

ၸင်ႇၼၼ် ယူႇတီႈလူင်ပွင်ၸိုင်ႈထႆး ၸင်ႇၽႅၼ်ၵၢၼ် တႃႇႁႄႉၵင်ႈလႆႈ လွင်ႈသုၵ်ႉၸိူဝ်းၼႆႉ ။ ယွၼ်ႉၵၢၼ်ၽိတ်းပၵ်းပိူင်ၼမ်မႃးသေ ၼႂ်းၵႄႈၼႆႉ ၽူႈလၵ်ႉၵူၼ်းၸူၼ် ၵူၼ်းၵေႃႇၵၢၼ်ႁၢႆႉၼမ်မႃးၸွမ်းလႄႈ ၸင်ႇမီးၽႅၼ်ၵၢၼ်ၶၢဝ်းပွတ်းၶၢဝ်းၸိူဝ်းၼႆႉမႃးၼႆ
ယိင်းမူဝ်ၶၢဝ်ၼူၼ်း သိုပ်ႇ လၢတ်ႈၼႄၼင်ႇၼႆ –

မၼ်းတုမ်ႉတိူဝ်ႉလွင်ႈမၼ်ႈၵိုမ်းတၢင်းမိူင်းၸိုင်ႈထႆး ။ ၸင်ႇၼၼ်လႄႈ ၵႂၢတ်ႇလၢင်ႉပႅတ်ႈ ၵူၼ်းၸိူဝ်း ၵေႃႇၵၢၼ်ႁၢႆႉ ႁဵတ်းၵၢၼ်ဢမ်ႇလီ ။ ၵူဝ်တုမ်ႉတိူဝ်ႉ လွင်ႈယူႇသဝ်းၵိၼ်သၢင်ႈ ၶႃႈဝၢၼ်ႈၵူၼ်းမိူင်း ။မၼ်းၸၢင်ႈမီးၽူႈလၵ်ႉၸၵ်ႉၶုတ်ႈလိူင်ႇၼမ်မႃးႁဵတ်းၼႆၼၼ်ႉၼႃႇ

တႄႇဢဝ် လိူၼ်ၵျၼ်ႊၼိဝ်ႊရီႊ 2026 ၼၼ်ႉမႃး ထိုင်လိူၼ်မၢတ်ႉၶျ်ပူၼ်ႉမႃးၼႆႉၵူၺ်း ၸဝ်ႈၼႃႈတီႈထႆး တီႉၺွပ်းလႆႈ ၵူၼ်းမိူင်းႁူမ်ႈတုမ်မၢၼ်ႈၸွမ်းလႅၼ်ၶႅၼ်ႈမိူင်း ၸမ် 900 ၵေႃႉ ၼႆ ၸုမ်းသုၼ်ႇလႆႈၵူၼ်းမိူင်းမွၼ်း (HURFOM) ပိုၼ်ၽၢဝ်ႇဝႆႉမိူဝ်ႈလိူၼ်ဢေႊပရိူဝ်ႊလ်ဝႆႉၼင်ႇၼႆ။

ၵူၼ်းၸိူဝ်းဢၼ်ၺႃးၺွပ်းၼၼ်ႉ မီးၵူၼ်းႁပ်ႉၸၢင်ႈတႃႇႁွင်ႉၶဝ်ႈမိူင်းထႆး ၼိုင်ႈၵေႃႉလႂ် လႆႈၸၢႆႇငိုၼ်း 2 မိုၼ်ႇထိုင် 2 မိုၼ်ႇႁႃႈ ငိုၼ်းထႆးလူးၵွၼ်ႇ ။ ၵမ်ႈၼမ် ၼၢႆးၼႃႈ လမ်ႇမၢၵ်ႈသေ ဢမ်ႇသွၼ်ႇတေႃႇၵၢၼ်ႁူမ်ႇလူမ်ႈၵူၼ်းမိူင်း ။ ႁူႉဝႃႈ ၶႂ်ႈလႆႈငိုၼ်းၵူၺ်း ၼႆ ႁႅင်းၵၢၼ်ၵေႃႉၼိုင်ႈလၢတ်ႈ ။
လွင်ႈတၢင်းၸိူဝ်းၼႆႉ မီးမႃးလၢႆၵမ်းယဝ်ႉသေတႃႉ ၾၢႆႇတၢင်းမိူင်းမၢၼ်ႈတႄႉဢမ်ႇတွၼ်ႉၵႄႈလိတ်ႈသင်ပၼ်ၵူၼ်းမိူင်းလႆႈ ။ ၵူၼ်းမိူင်းတႄႉ တေဝႃႈယူႇၼႂ်းမိူင်းသမ်ႉႁဵတ်းၵၢၼ်ႁႃၵိၼ်ယၢပ်ႇ ၊ တေဝႃႈ ဢွၵ်ႇၼွၵ်ႈမိူင်းသမ်ႉ ထူပ်းၽေးလၢႆလွင်ႈ ။ ၸူဝ်ႈမိူင်းႁူမ်ႈတုမ်မၢၼ်ႈ ပႆႇၼိမ်တဵင်ႈတႄႉ ၵူၼ်းမိူင်း တိုၼ်းတေၺႃးၸိူင်ႉၼႆယူႇၶိူဝ်းယႂ်းၼႆ ႁႅင်းၵၢၼ်ယၢၼ်မိူင်းၵေႃႉၼိုင်ႈလၢတ်ႈၼင်ႇၼႆ။