ႁွင်ႈၵၢၼ်ၽွင်းလူင်ၾၢႆႇႁူမ်ႇလူမ်ႈၵူၼ်းမိူင်း မိူင်းၶႄႇ ပိုၼ်ၽၢဝ်ႇၵႂႃႇ ၼႂ်းဝၼ်းတီႈ 17 လိူၼ်မေႊၼႆႉဝႃႈ လႆႈႁူမ်ႈၵၼ်တင်း ၸုမ်းပလိၵ်ႈ ဢမေႊရိၵၼ်ႊ လႄႈ UAE သေ ၽႅၼ်ၵၢၼ်တိုၵ်းတေႃးၽဵဝ်ႈမူၺ်ႉ ၸုမ်းလွၵ်ႇလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊ တီႈဝဵင်းတူႊပၢႆႊ ပဵၼ်ပွၵ်ႈၵမ်းႁႅၵ်ႈ ဝႃႈၼႆ။
ၸုမ်းပလိၵ်ႈၸိူဝ်းၼႆႉ လႆႈႁူမ်ႈၵၼ်ၽႅၼ်ၵၢၼ် ၵူၼ်ႇပင်းပႅတ်ႈ ဢွင်ႈတီႈလွၵ်ႇလႅၼ်ငိုၼ်း 9 တီႈ၊ လႆႈတီႉၺွပ်းၵူၼ်းၸိူဝ်း မီးလွင်ႈထၢင်ႇထိူမ်ဝႆႉ တႃႇ 276 ၵေႃႉ ၼႆယဝ်ႉ။
လႆႈႁူႉဝႃႈ ၸုမ်းလွၵ်ႇလႅၼ်ႇၸိူဝ်းၼၼ်ႉ ၸႂ်ႉတိုဝ်းသိုဝ်ႇတူင်ႇဝူင်းၵူၼ်း ဢဝ်ၸိူင်းတၢင်းႁၵ်ႉပွမ်သေ ၶဝ်ႈဢိူမ်ႈၸူး တူဝ်ယိူဝ်ႇ၊ သင်လႆႈလွင်ႈယုမ်ႇယမ်ၸႂ်ယဝ်ႉ ၶိုၼ်းႁူၺ်းသူၼ်းႁႂ်ႈၵႂႃႇလူင်းတိုၼ်းလၢင်း တီႈၼႂ်း cryptocurrency သေ လွၵ်ႇလႅၼ်ဢဝ်ငိုၼ်းပိူၼ်ႈၵႂႃႇ ဝႃႈၼႆ။
ၸုမ်းပလိၵ်ႈမိူင်းၶႄႇၼႆႉ တေသိုပ်ႇႁူမ်ႈမိုဝ်းၵၼ်တင်း ပလိၵ်ႈလၢႆလၢႆမိူင်းသေ တေသိုပ်ႇႁဵတ်းသၢင်ႈ ၽႅၼ် ၵၢၼ် တိုၵ်းတေႃးၽဵဝ်ႈမူၺ်ႉ ၸုမ်းလွၵ်ႇလႅၼ်ၵိၼ်ငိုၼ်းၵႂႃႇၵႂၢင်ႈၶႂၢင်၊ တေသိုပ်ႇတီႉၺွပ်းၵူၼ်း ၸိူဝ်းမီးလွင်ႈ ၵဵဝ်ႇၶွင်ႈ လႄႈ ၵႅတ်ႇၶႄႁႄႉၵင်ႈပၼ် ၽွၼ်းလီပုၼ်ႈပၢင်ႈၵူၼ်းၵူႈမိူင်းမိူင်းၵႂႃႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ