ၼႂ်းႁူဝ်လိူၼ်မေႊမႃးၼႆႉ သိုၵ်းၵဝ်ႈၵၢင်ႉ ဝဵင်းပၢင်ႇသၢႆး သင်ႇႁႂ်ႈၵူၼ်းမိူင်း ပိုၼ်ႉတီႈ ၵူႈၸၢဝ်းၶိူဝ်း ၶဝ်ႈႁၢပ်ႇၵၢၼ်သိုၵ်း ၼႂ်းၸုမ်းသိုၵ်း MNDAA ၵူႈႁိူၼ်း – ၵႂႃႇၾိုၵ်းၵၢၼ်သိုၵ်းၸွမ်း ၸုမ်းသိုၵ်းလႂ်မႃးၵေႃႈယဝ်ႉ ဝႃႈၼႆ ။

ၵဵဝ်ႇၵပ်းလူၺ်ႈလွင်ႈၼႆႉ ၵူၼ်းမိူင်း ဝဵင်းပၢင်ႇသၢႆး သပ်းလႅင်းၼႄ ၸုမ်းၶၢဝ်ႇၽူႈတွႆႇႁွၵ်ႈဝႃႈ – “ၸဵမ်မိူဝ်ႈၶဝ်တႄႇ ၶဝ်ႈမႃး ၵုမ်း ပၼ်ႇၵၢၼ်ၽွင်းငမ်း (ဝၢႆးလင်ပၢင်တိုၵ်းၽႅၼ်ယၼ်ႇ သိုၵ်း 1027) ၼၼ်ႉသေ ၶဝ်ၵဵပ်းသိုၵ်းႁႅင်းတေႉၶႃႈဢေႃႈ။ မိူဝ်ႈၼၼ်ႉ ၶဝ်ထတ်းသဵၼ်ႈမၢႆႁူဝ်ၵူၼ်း ႁိူၼ်းလႂ်ႁိူၼ်းၼၼ်ႉ ပေႃးမီးလုၵ်ႈၸၢႆး 2 ၵေႃႉ လုၵ်ႈယိင်း 1 ၵေႃႉ ဢႃယု ၵေႃႈ သမ်ႉပူၼ်ႉ 18 တင်း 3 ၵေႃႉယဝ်ႉၼႆ – ၶဝ်ဢဝ်ၶူဝ်းသိုၵ်းၶဝ်မႃးပၼ်ထိုင်ႁိူၼ်းဢေႃႈ။ ႁႂ်ႈပုတ်ႈၶူဝ်းသိုၵ်းၵမ်းလဵဝ်ႁႄ ႁႂ်ႈၵႂႃႇပႂ်ႉၵဵတ်ႉၵမ်းသိုဝ်ႈၵွၼ်ႇဢေႃႈ။ ၸိူဝ်းပဵၼ် ႁိူၼ်းၸၢဝ်းၶိူဝ်း ၶႄႇၼၼ်ႉတႄႉ ဢမ်ႇလွတ်ႈႁႄႁိူၼ်းၶႃႈ ” ဝႃႈၼႆ။

လွင်ႈသိုၵ်းၶႄႇၵဝ်ႈၵၢင်ႉ ၵဵပ်းသိုၵ်းယူႇယၢမ်းလဵဝ် ဢၼ်ဝႃႈၼၼ်ႉ ပဵၼ်ၵၢၼ်ႁွင်ႉဢဝ်ၶိုၼ်း ၵူၼ်းၸိူဝ်းယၢမ်ႈၵႂႃႇႁဵတ်းသိုၵ်း တဢၢင်းသေ ပွၵ်ႈမႃးယူႇၶိုၼ်းႁိူၼ်းၼၼ်ႉၵူၺ်း ဢမ်ႇ ၸႂ်ႈဝႃႈ ၵဵပ်းယွၼ်း တဵၵ်းႁႂ်ႈၵူၼ်းမိူင်း ၸိူဝ်းယူႇၼႂ်းပိုၼ်ႉတီႈ ဝႆႉၼၼ်ႉၵႂႃႇၼႆ – ၵူၼ်းမိူင်းပိုၼ်ႉတီႈ ဝဵင်းပၢင်ႇသၢႆး လၢတ်ႈၼင်ႇၼႆ။

လႆႈႁူႉဝႃႈ ၸိူဝ်းပဵၼ်ဝၢၼ်ႈတႆး လႄႈ ဝၢၼ်ႈၶၢင် ၼႂ်းဝဵင်းပၢင်ႇသၢႆးၼႆႉ သိုၵ်းၸၢဝ်းၶိူဝ်းၽႂ်မၼ်း မႃးႁပ်ႉႁွင်းဝႆႉဝႃႈ ပဵၼ်ၵူၼ်းၸွႆႈ ၼႂ်းၸုမ်းၽႂ်မၼ်းၼႆသေ လႆႈယူႇလွတ်ႈဝႆႉ ဢမ်ႇထိုင်တီႈလႆႈၺႃးတဵၵ်းတဵင် ၵႂႃႇၶဝ်ႈႁဵတ်းသိုၵ်းၶႄႇၵဝ်ႈၵၢင်ႉ ၼႆယဝ်ႉ။

ၵူၼ်းမိူင်းပိုၼ်ႉတီႈၵေႃႉယူႇဝႆႉၼႂ်းဝဵင်းပၢင်ႇသၢႆး လၢတ်ႈၼႄတီႈၽူႈတွႆႇႁွၵ်ႈထႅင်ႈဝႃႈ “ၶႄႇၶဝ်တႄႉ ၶဝ်ဢမ်ႇၸၢင်ႈၶဝ်ႈ ၸုမ်းလႂ် လႄႈ ၵႃႈလႆႈႁဵတ်းသိုၵ်းၵႂႃႇ ၼိုင်ႈႁိူၼ်းၼိုင်ႈၵေႃႉ။ ၸိူဝ်းဢမ်ႇၶႂ်ႈႁဵတ်းၵေႃႈ လႆႈပၢႆႈတင်းႁိူၼ်းယဝ်ႉၶႃႈ။ မၢင်ၸိူဝ်း ၵေႃႈ ပွႆႇၵူၼ်းထဝ်ႈယူႇႁိူၼ်းဝႆႉ။ ပေႃးပဵၼ်ၸၢဝ်းၶိူဝ်းတႆး တင်း ၶၢင်ၸိူဝ်းၼႆႉတႄႉ ၽူႈမီးပုၼ်ႈၽွၼ်း ၼႂ်းၸုမ်းသိုၵ်း ၽႂ်မၼ်းမႃးၸွႆႈလၢတ်ႈဝႃႈ ၼႆႉပဵၼ်ၵူၼ်းႁဝ်းဢိူဝ်ႈ ၶဝ်ၸွႆႈၵၢၼ်ႁဝ်းဝႆႉဢိူဝ်ႈၼႆယူႇ။ မိူဝ်ႈလိူၼ်ထူၼ်ႈ 3 ၼၼ်ႉ ၶဝ်ၶိုၼ်းၵဵပ်းသဵၼ်ႈမၢႆႁူဝ်ၼပ်ႉၵူၼ်းထႅင်ႈ တႃႇၵဵပ်းသိုၵ်း တီႈဝၢၼ်ႈတႆးႁဝ်းတႄႉ သိုၵ်းတႆး (SSPP/SSA) မႃးၸွႆႈလၢတ်ႈ ပၼ်ဝႆႉဝႃႈ ပဵၼ်ၵူၼ်းႁဝ်းဢိူဝ်ႈ ၼႆႁႄ ဢမ်ႇမီးၽႂ်လႆႈၵႂႃႇႁဵတ်းသိုၵ်း။ ၸိူဝ်းဢၼ်တဵမ်ၸႂ်ႁႄၵႂႃႇႁဵတ်းသိုၵ်းၶႄႇၵဝ်ႈၵၢင်ႉၵေႃႈ မီးယူႇ။ ၵူၺ်း ပဵၼ်ၵမ်ႈဢေႇၵူၺ်း။ ၶဝ်ၵေႃႈ မုင်ႈမွင်းတႃႇၽွၼ်းလီ ၵၢၼ်မၢၵ်ႈမီးၶဝ်ႁႄ ၶဝ်ႈၵႂႃႇႁဵတ်းၵူၺ်း” ဝႃႈၼႆ။

ၼင်ႇႁိုဝ်ၵူၼ်းပိုၼ်ႉတီႈ ပေႃးတေသူၼ်ၸႂ်ၶဝ်ႈၵႂႃႇႁၢပ်ႇၵၢၼ်သိုၵ်း ၼႂ်းမုၵ်ႉၸုမ်းၼၼ်ႉ ၸုမ်းသိုၵ်းၶႄႇၵဝ်ႈၵၢင်ႉ ၸႂ်ႉလၢႆးတၢင်း ဢဝ်လွင်ႈၵၢၼ်ႁုၼ်ႈမုၼ်း ၼႂ်းပိုၼ်ႉတီႈ မိူၼ်ၼင်ႇ ႁဵတ်းပၼ်ၵၢၼ်သိူဝ်ႇတၢင်း ပၼ်သုၼ်ႇလႆႈႁဵတ်းပွႆးလၢမ်း ၸွင်ႇၼင်ႇၾိင်ႈငႄႈၾိင်ႈထုင်းမီးသေ ပၼ်ငိုၼ်းလိူၼ်သုင်ၼမ်လိူဝ်တၢင်ႇၸုမ်း ၸိူဝ်းၼႆႉသေႁူၺ်းသူၼ်းဢဝ်။ သင်ဢမ်ႇလႆႈၸိုင် ပိၼ်ႇလၢႆးတၢင်း ၸႂ်ႉၵၢၼ်လွၵ်ႇငိုတ်ႈသေ ႁႂ်ႈၶဝ်ႈႁၢပ်ႇၵၢၼ်သိုၵ်းၼႆ ၵူၼ်းမိူင်းပိုၼ်ႉတီႈလၢတ်ႈၼင်ႇၼႆ။

ၼင်ႇႁိုဝ် တေၵဵပ်းလႆႈသဵၼ်ႈမၢႆႁူဝ်ၼပ်ႉၵူၼ်း ၼႂ်းပိုၼ်ႉတီႈတႅတ်ႈတေႃးမႃးၶိုၼ်းၼၼ်ႉ ၾၢႆႇၸုမ်းသိုၵ်းၵဝ်ႈၵၢင်ႉ တႄႇႁဵတ်းပၼ် မၢႆၾၢင် လႄႈ သဵၼ်ႈမၢႆမုင်ႉႁေႃႁိူၼ်း ဢိၵ်ႇတင်း ပပ်ႉၶၢမ်ႈၽၵ်းတူလႅၼ်လိၼ် မိူင်းမၢၼ်ႈ-မိူင်းၶႄႇ ၸဵမ်ၸိူဝ်းၼႆႉဝႆႉယူႇ ၼႆယဝ်ႉ။