မိူဝ်ႈၼႆႉ ဝၼ်းတီႈ 2 လိူၼ်ဢေႊပရႄႇ ယၢမ်းၵၢင်ၼႂ် ၵူၼ်းၸၢႆးၵေႃႉၼိုင်ႈ ပဵၼ်ၵူၼ်းႁေႃႈရူတ်ႉၵႃး တၢင်းဝဵင်းပၢင်သၢင်း ၺႃးၵူၼ်းယိပ်းၵွင်ႈ ယူႇၾၢႆႇလင်သေ လၵ်ႉယိုဝ်းလႄႈ မၢတ်ႇ ၸဵပ်းၵႂႃႇ တီႈပွၵ်ႉ (3) ၼႂ်းဝဵင်းလႃႈသဵဝ်ႈ မိူင်းတႆးပွတ်းႁွင်ႇ ၼႆယဝ်ႉ။
ၵူၼ်းမိူင်းပိုၼ်ႉတီႈ ဝဵင်းလႃႈသဵဝ်ႈ ၵေႃႉႁူႉႁၼ်ၸွမ်းပိူင်ပဵၼ် လၢတ်ႈၼႄတီႈၽူႈတွႆႇႁွၵ်ႈဝႃႈ “ၸဝ်ႈၵႃးၵေႃႉၼိုင်ႈ မၼ်းမႃးသူင်ႇၶူဝ်းႁႄ ၺႃးယိုဝ်း။ မၼ်းႁွင်ႉၵၼ်ဝႆႉ ၵူၼ်းတေမႃး ဢဝ်ၶူဝ်းၼႆၼၼ်ႉႁႄ ၺႃးယိုဝ်းၵႂႃႇ 2 ၵမ်း။ ပဵၼ်ၶူဝ်းဢၼ်လုၵ်ႉတၢင်းဝဵင်းပၢင်သၢင်း မႃးသူင်ႇၼႆ။ ၸဝ်ႈၵႃးဢၼ်ၺႃးယိုဝ်းတႄႉ ဢမ်ႇတၢႆၼင်ႇၵဝ်ႇ။ မၢၵ်ႇၵွင်ႈတိူဝ်ႉၵႂႃႇႁိမ်းၶေႃးမၼ်းၼၼ်ႉ” ဝႃႈၼႆ။
ၵူၼ်းၸၢႆးၵေႃႉၺႃးယိုဝ်းၼၼ်ႉ ယၢမ်းလဵဝ် ၸဝ်ႈၼႃႈတီႈၽူႈမီးပုၼ်ႈၽွၼ်းၶဝ် ဢဝ်သူင်ႇယူတ်းယႃတူဝ်ဝႆႉ တီႈႁူင်းယႃလူင်ဝဵင်းလႃႈသဵဝ်ႈယူႇ။ လႆႈႁူႉဝႃႈ ၵူၼ်းၵေႃႉၼႆႉ ပဵၼ်ၵူၼ်း ႁေႃႈၵႃး ႁပ်ႉသူင်ႇၵူၼ်း လႄႈ ၶူဝ်း ဝဵင်းပၢင်သၢင်း-ဝဵင်းလႃႈသဵဝ်ႈ ၼႆယဝ်ႉ။
မိူဝ်ႈပူၼ်ႉမႃး လိူၼ်ၾႅပ်ႉပိဝ်ႊရီႇ ဝၼ်းတီႈ 24 ၼၼ်ႉၵေႃႈ ၼၢင်းယိင်းၵေႃႉၼိုင်ႈ ၺႃးၵူၼ်းၸၢႆးသၢမ်ၵေႃႉ ယိပ်းၵွင်ႈၵၢင်ႇသေ ၶဝ်ႈၸူၼ်ဢဝ်ငိုၼ်းၼႂ်းႁၢၼ်ႉၶၢႆၵုၼ်ႇ ၵူၺ်းဢမ်ႇၵႃး ႁွင်ႉဢဝ်ပႃးၸဝ်ႈၶွင်ႁၢၼ်ႉၵႂႃႇသေ ယွၼ်းၵႃႈထုတ်ႇတူဝ်ၶိုၼ်း ၼႆယဝ်ႉ။
ဝဵင်းလႃႈသဵဝ်ႈၼႆႉ ပဵၼ်ဝဵင်းဢၼ်သိုၵ်းမၢၼ်ႈယိုတ်းမိူင်း ၵုမ်းၵမ်ပၼ်ႇၵၢၼ်ၽွင်းငမ်းဝႆႉပဵၼ်တၢင်းၵၢၼ်သေ ၵမ်းၵမ်း ပဵၼ်လွင်ႈၸူၼ်ၵၼ် ၶႃႈႁႅမ်ၵၼ်တၢႆ ၸိူဝ်းၼႆႉယူႇၵူႈလိူၼ်လႄႈ ႁဵတ်းႁႂ်ႈၵူၼ်းမိူင်းၸိူဝ်းယူႇၼႂ်းပိုၼ်ႉတီႈ ဢမ်ႇမီးလွင်ႈႁူမ်ႇလူမ်ႈ ၼႆယဝ်ႉ။
သိုၵ်းမၢၼ်ႈယိုတ်းမိူင်းၼႆႉ ၵုမ်းၵမ်ပၼ်ႇၵၢၼ်ၽွင်းငမ်းလႆႈ ၼႂ်းဝဵင်း 12 ပွၵ်ႉၵူၺ်းသေ ၾၢႆႇၼွၵ်ႈဝဵင်းလႃႈ သဵဝ်ႈ ႁွပ်ႈႁွပ်ႈတႄႉ ပဵၼ်ၸုမ်းသိုၵ်းၵဝ်ႈၵၢင်ႉ ၵုမ်းၵမ်ဝႆႉပဵၼ်တၢင်းၵၢၼ်ယူႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ