မိူဝ်ႈဝၼ်းတီႈ 16/5/2026 ယၢမ်းၵၢင်ၼႂ်ၸဝ်ႉ မွၵ်ႈ 1 မူင်း ၾႆးမႆႈႁၢၼ်ႉၶၢႆၵုၼ်ႇၵူႈသႅၼ်းသႅၼ်း ၼႂ်းၵၢင်ဝဵင်းလႃႈသဵဝ်ႈ သဵၼ်ႈတၢင်းၵမ်ႇပေႃးၸ ဢမ်ႇၼၼ် ၵူၼ်းတင်းၼမ်ႁူႉၸၵ်းဝႃႈ ( ဝ တောင်တန်းလမ်းကြား) တီႈပွၵ်ႉ 2 ဝႃႈၼႆ။
ၵူၼ်းမိူင်းပိုၼ်ႉတီႈ ၵေႃႉယူႇၼႂ်းဝဵင်းလႃႈသဵဝ်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ “ၵိုင်ႉၵၢင်ႉလႆႈငိၼ်းသဵင် ၵႃးၶႄၾႆး ပၼ်းသၢၼ်ႈလႄႈ လုၵ်ႉတူၺ်း ႁၼ်ၾႆးမႆႈလၢမ်းႁႅင်းၼႃႇယဝ်ႉ။ ႁဵတ်းႁိုဝ်ႁႄလႄႈ ၾႆးတႄႇမႆႈၼၼ်ႉတႄႉ ဢမ်ႇပႆႇလႆႈႁူႉၸွမ်း။ တေလႆႈဝႃႈ ၵၢင်ၼႂ်ၸဝ်ႉယဝ်ႉၶႃႈဢေႃႈၼေႃႈ ပဵၼ်ၶၢဝ်း မွၵ်ႈ 1 မူင်းပၢႆၼၼ်ႉၼႃႇ မႆႈႁိုင်တၢၼ်ႇတၢၼ်ႇယူႇဢေႃႈ မွၵ်ႈ 2 မူင်းပၢႆၸိူဝ်းၼႆႉ ၸဝ်ႈၼႃႈတီႈၶဝ် ၸင်ႇၶႄၾႆးလႆႈၵႂႃႇ။ ၵတ်ႉၵႃႈဢမ်ႇလၢမ်းၵႂႃႇ ႁိူၼ်းႁိမ်းၶၢင်ႈၸိူဝ်းၼၼ်ႉထႅင်ႈၶႃႈဢေႃႈ ” ဝႃၼႆ။
လႆႈႁူႉဝႃႈ ၾႆးမႆႈႁႅင်းလူၼ်ႉလႄႈ ၵႃးသွင်လမ်း ဢၼ်မီးၼႂ်းဝၢင်းႁိူၼ်း ႁၢၼ်ႉၶၢႆၵုၼ်ႇၼၼ်ႉၵေႃႈ မႆႈၵႂႃႇၸွမ်း ၶူဝ်းၵုၼ်ႇၼႂ်းႁၢၼ်ႉတၢင်းၶၢႆၵေႃႈ ဢမ်ႇတၼ်းလႆႈဢဝ်သင်သေ ၾႆး လၢမ်းမႆႈၵႂႃႇပႅတ်ႈတင်းသဵင်ႈ။ ၵူၺ်းၵႃႈ ၵူၼ်းတႄႉ တၼ်းပၢႆႈဢွၵ်ႇမႃးယူႇတၢင်းၼွၵ်ႈ လွတ်ႈၽေးၵၼ်ၵူႈၵေႃႉယူႇ ၼႆယဝ်ႉ။
ၸိုဝ်ႈႁၢၼ်ႉၶၢႆၵုၼ်ႇဢၼ်ၺႃးၾႆးမႆႈၵႂႃႇၼႆႉ ပဵၼ် “စွယ်တော်ဖြူ ကုန်စုံဆိုင်” ၼႆယဝ်ႉ။
မိူဝ်ႈပူၼ်ႉမႃး ၼႂ်းဝၼ်းတီႈ 9/5/2026 ၼၼ်ႉၵေႃႈ ၶႅပ်းသူဝ်ႇလႃႇ လုၵ်ႉပဵၼ်ၾႆးသေ လၢမ်းမႆႈၵႂႃႇပႃး ၶူဝ်းၵုၼ်ႇ ၼႂ်းႁၢၼ်ႉၶၢႆၵုၼ်ႇယွႆႈ ဢၼ်မီးႁိမ်းၵၢတ်ႇလူင်လွႆယဵဝ်ႈ ၼႂ်းပွၵ်ႉ 12 ဝဵင်းလႃႈသဵဝ်ႈၼၼ်ႉယဝ်ႉ ပွၵ်ႈၼိုင်ႈ။
ယၢမ်းလဵဝ် ၾိင်ႈၾႃႉဢမ်ႇမႅၼ်ႈၸွမ်းၶၢဝ်း ပေႃးၶၢသ်းမႆႈၵေႃႈႁွတ်ႉႁႅင်းလူၼ်ႉလိူဝ်လႄႈ ထုၵ်ႇလီဢွၼ်ၵၼ် ၾၢင်ႉၽေးၾႆးလီငၢမ်းယူႇ။
ပိူဝ်ႈတႃႇလွတ်ႈၽေးၾႆးၼႆႉ ပေႃးတေဢွၵ်ႇႁိူၼ်းၵႂႃႇတၢင်းၼွၵ်ႈၸိုင် ၵိုင်ႇလီမွတ်ႇၾႆး၊ ထွၼ်သၢႆၾႆးၵူႈသဵၼ်ႈ ထွၼ်သၢႆႁႅင်းၾူၼ်ႊ သၢႆထႅမ်ႁႅင်းပႅတ်ႊထရီႊၸိူဝ်းၼႆႉၵူႈဢၼ် လီ ငၢမ်းယဝ်ႉၸင်ႇဢွၵ်ႇႁိူၼ်းၼႆ ၸဝ်ႈႁၢၼ်ႉၶၢႆၵုၼ်ႇယွႆႈ ၼႂ်းဝဵင်းလႃႈသဵဝ်ႈ ပၼ်ၾၢင်ႉလၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ