ထၢင်သၢႆးၵူၼ်ႇတဵင် ၵူၼ်းၵႂႃႇၶုတ်းသၢႆး တၢႆ 2 ၵေႃႉ မၢတ်ႇၸဵပ်းၵေႃႉၼိုင်ႈ တီႈဝဵင်းဝၢၼ်ႈငႂ်ႈ( ယႂႃႇငၢၼ်ႇ ) ၸိုင်ႈတႆးပွတ်းၸၢၼ်း ။
မိူဝ်ႈဝႃးဝၼ်းတီႈ 17 /5/2026 ယၢမ်းၵၢင်ၼႂ် 11 မူင်းၶိုင်ႈၼၼ်ႉ ထၢင်သၢႆးဢၼ်မီးတီႈဝၢၼ်ႈယၵျီး (ယကြီး) ၵူၼ်ႇတဵင်သႂ်ႇ ၵူၼ်းဝၢၼ်ႈ3 ၵေႃႉၽွင်းၵႂႃႇၶုတ်းသၢႆး ။
ၼႂ်းသၢမ်ၵေႃႉၼၼ်ႉ 2 ၵေႃႉတႄႉၺႃးသၢႆးၵူၼ်ႇတဵင်တၢႆထင်တီႈ ၊ ထႅင်ႈၵေႃႉၼိုင်ႈတႄႉ ၵူၼ်းပိုၼ်ႉတီႈ ၸွႆႈသေပူၼ်ႉလွတ်ႈတၢင်းတၢႆမႃးလႆႈသေတႃႉ မၢတ်ႇၸဵပ်းႁၢဝ်ႈႁႅင်းဝႆႉလႄႈ ယၢမ်းလဵဝ် သူင်ႇၵႂႃႇယူတ်းယႃတူဝ်ဝႆႉတီႈႁူင်းယႃဝၢၼ်ႈမျၢႆႇ ၼႂ်းၸႄႈဝဵင်းယႂႃႇငၢၼ်ႇဝႆႉ ဝႃႈၼႆ ။
ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “တဵင်တႄႉ တဵင်ၸဵမ်မိူဝ်ႈၵၢင်ဝၼ်းၼႆႉ ၊ မွၵ်ႈ 4 မူင်းၼႆႉၸင်ႇထူပ်းႁၼ်တူဝ်တၢႆၶိုၼ်း ၊ ၸူဝ်ႈဝူင်ႈဝၢင်ႈၼႆႉ ၾူၼ်တူၵ်း ၶူၺ်လိၼ်ၶူၺ်သၢႆး ယူၼ်ႈသေၵူၼ်ႇတဵင်ႇၺႃး ၊ ၼႂ်းသၢမ်ၵေႃႉၼၼ်ႉ သွင်ၵေႃႉတႄႉၺႃးလိၼ်ၵူၼ်ႇတဵင်လူင်းၵႂႃႇ လိုၵ်ႉၼႃႇလႄႈ ၸွႆႈဢမ်ႇတၼ်းၶိုတ်း ၊ ထႅင်ႈၵေႃႉၼိုင်ႈတႄႉ တၼ်းၸွႆႈလွတ်ႈလႆႈယူႇ မိူဝ်ႈလဵဝ်သူင်ႇႁူင်းယႃ ယူတ်းယႃတူဝ်ဝႆႉ”- ဝႃႈၼႆ ။
ၵူၼ်းၸၢႆးသွင်ၵေႃႉဢၼ်လူႉတၢႆၵႂႃႇၼၼ်ႉ ဢႃယုမီး 20 ပၢႆ ။ ပဵၼ်ၵူၼ်းဝၢၼ်ႈ ယၵျီး ၵေႃႉၼိုင်ႈလႄႈ ၵူၼ်းဝၢၼ်ႈတမႄး ၵေႃႉၼိုင်ႈ ။
ၵူၼ်းၵႂႃႇၸွႆႈထႅမ်ဢဝ်တူဝ်တၢႆဢွၵ်ႇမႃးၼၼ်ႉ လၢတ်ႈၽူႈတွႆႇႁွၵ်ႈဝႃႈ -“ ၵူၼ်းမႃးတူၺ်းမၼ်းတႄႉ ၼမ်ၼႃႇ မိူဝ်ႈဝႃးၼႆႉ ၵူၼ်းၸွႆႈတႄႉတႄႉမၼ်းတႄႉဢမ်ႇမီး ၊ ပေႃးပဵၼ်ၶၢဝ်းၾူၼ်ၸိူင်ႉၼႆ ၵူၼ်းဝၢၼ်ႈႁဵတ်းႁႃၵိၼ်ယၢပ်ႇၼႃႇ ပေႃးၵႂႃႇၼႂ်းထိူၼ်ၵေႃႈ လႆႈမႆႈၸႂ်လွင်ႈ ၼမ်ႉလွႆၼွင်း ၊ မိူဝ်ႈလဵဝ်ၼႆႉၵေႃႈ ဢမ်ႇထၢင်ႇထိူမ်သေဢိတ်း လီဢဝ်တွၼ်ႈသွၼ်ၾၢင်ႉၵၼ်တႄႉတႄႉ”- ဝႃႈၼႆ ။
ထၢင်ႇသၢႆးဢၼ်ၵူၼ်ႇတဵင်ၵူၼ်းဝၢၼ်ႈၼၼ်ႉ ပဵၼ်ထၢင်ႇသၢႆးဢၼ်မီးၼႂ်းၵႄႈ ဝၢၼ်ႈ ယၵျီး (ယကြီး )လႄႈ ပူၺ်းပျၢတ်ႉ(ပွေးပြတ်) ၊ ပဵၼ်ထၢင်ႇသၢႆးဢၼ်ၵူၼ်းပိုၼ်ႉတီႈပိုင်ႇဢိင် ၵႆႉၵႂႃႇၶုတ်းဢဝ်မႃးၸႂ်ႉမႃးၶၢႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ