မိူဝ်ႈဝၼ်းတီႈ 29/4/2026 တႄႇယၢမ်းတၢမ်းၶမ်ႈ ၾူၼ်လူမ်းပတ်ႉထွင်းသႂ်ႇ ၼႂ်းၸႄႈဝဵင်းသီႇပေႃႉ မိူင်းတႆးပွတ်းႁွင်ႇႁၢဝ်ႈႁႅင်း ႁဵတ်းႁႂ်ႈၸိၵ်းၵွင်းမူးၵဝ်ႇၵႄႇလႄႈ ႁူင်းၵေႃႇၵၢႆႇၼႂ်းဝတ်ႉဝႃး တီႈပွၵ်ႉဝၢၼ်ႈၸၢတ်ႈ (ဇာတ်စုရပ်ကွက်) လူႉလႅဝ်ၵူၼ်ႇပင်းၵႂႃႇ ႁၢဝ်ႈႁႅင်း ၼႆယဝ်ႉ။
ဝၢႆးလင်ၶၢဝ်းပွႆးသွၼ်းၼမ်ႉယဝ်ႉ ၾူၼ်လူမ်းပတ်ႉႁႅင်း ၼႂ်းမိူင်းတႆး ၸွမ်းၸႄႈဝဵင်းသီႇပေႃႉ၊ ၵျွၵ်ႉမႄး၊ လႃႈသဵဝ်ႈ လႄႈ ဝဵင်းသႅၼ်ဝီ တင်း ဝဵင်းၵူတ်ႉၶၢႆၸိူဝ်းၼႆႉ။
ၼၢင်းယိင်းၵေႃႉယူႇဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈဝႃးၼႆႉ ၾူၼ်လူမ်းႁႅင်းၼႃႇ ၵွႆၵႂႃႇလၢႆလၢႆတီႈယူႇဢေႃႈ။ မၢင်တီႈၵေႃႈ လဵၵ်းမုင်းလင်ၶႃးႁိူၼ်းပိဝ် ႁႅင်းတေႉႁႅင်းဝႃႈ ၸိၵ်းၵွင်းမူးၵဝ်ႇ ပေႃးႁၵ်းတူၵ်းၵေႃႈမီးဢေႃႈ” ဝႃႈၼႆ။
မိူဝ်ႈပူၼ်ႉမႃးဝၼ်းတီႈ 25/4/2026 ၵၢင်ဝၼ်းၼၼ်ႉၵေႃႈ လူမ်းလႅင်းငူင်းၸၢင်ႉ (လူမ်းပၼ်ႇၽၼ်လူင်) ၶဝ်ႈတီႈဝဵင်းပၢင်ႇဢူးလူင် ပွၵ်ႈၵမ်းၼႆႉ ယႂ်ႇလႄႈႁႅင်းလိူဝ်လူမ်းဢၼ်ယၢမ်ႈပဵၼ်မႃးၸိူဝ်းၼၼ်ႉသေတႃႉ ယွၼ်ႉၽတ်ႉပဝ်ႇတီႈပၢင်ႇပဵင်း ႁိမ်းဝၢၼ်ႈၼမ်ႉလိၼ်းၶမ်းၼၼ်ႉၵူၺ်းလႄႈ ႁိူၼ်းယေးၵူၼ်းပိုၼ်ႉတီႈ ဢမ်ႇလူႉသုမ်းသင်ၵႂႃႇၸွမ်း ၼႆယဝ်ႉ။
ၾၢႆႇပၵ်းတႃပႂ်ႉတူၺ်းၾိင်ႈၾႃႉပိုၼ်ၽၢဝ်ႇပၼ်ၾၢင်ႉဝႆႉဝႃႈ ဝူင်ႈဝၢင်ႈၼႆႉ မိူင်းတႆးပတ်းပိုၼ်ႉ၊ မိူင်းၶၢင်၊ မိူင်းၶျၢင်း၊ တိူင်းၸႄႈၵႅင်းတွၼ်ႈၼိူဝ်၊ တိူင်းတႃႈလိူဝ်ႇ၊ တိူင်းပႃႇၵိူဝ်၊ မိူင်းမွၼ်း ၸိူဝ်းၼႆႉ တေမီးၾူၼ်လူင် မၢၵ်ႇႁဵပ်းတူၵ်း၊ ၾႃႉလင် ၾႃႉၽႃႇၸွမ်းလႄႈ ႁႂ်ႈၵူၼ်းၸိူဝ်းယူႇၸွမ်းတူၼ်းႁူၺ်ႈ ႁၢဝ်းသၼ်လွႆ ၊ ၸိူဝ်းယူႇတႂ်ႈပၢႆႉယႂ်ႇ လႄႈ ႁိမ်းတူၼ်ႈမႆႉယႂ်ႇၸိူဝ်းၼႆႉ ဢွၼ်ၵၼ်ၾၢင်ႉ ႁၢင်ႈႁႅၼ်းတူဝ် တႃႇႁႂ်ႈယူႇလွတ်ႈၽေး သၽႃႇဝ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ